Kolwa Komam Dios yinh iskonhobꞌ manhkꞌom
Salmo tiꞌ Masquil, tzꞌibꞌnhebꞌilkano yu yaꞌ Asaf
78
Hex wet konhobꞌ, abꞌewe kuybꞌanile chiwaltiꞌan,hajbꞌawe hetxikin heyabꞌen tzotiꞌ chiꞌelti yul intiꞌan.
2 Ay hunteqꞌan tzotiꞌ kaw ay yelapno chiwalan,
ay hunteqꞌan tzet ewanyehi yettaxtikꞌa payat tiempo, chiwaqꞌan heyohtanhehoj.a
3 Haꞌ hunteqꞌan tuꞌ xajabꞌe yebꞌ xakotxumu,
haꞌ halbꞌilkano jabꞌeꞌ yu ebꞌnaj komam icham.
4 Mach chu jebꞌanayo tet juninal,
chonhtzotel yinh iskꞌulal Komam, tet mak chito hul yul sat yibꞌanhqꞌinal tiꞌ,
kat jalni yinh yip Komam yebꞌ kꞌaybꞌalkꞌule iswatxꞌe koxol.
5 Yakano Komam chejbꞌanile tet yaꞌ Jacob,
yalnipaxkano Komam tzet yilal isbꞌeybꞌalnhen anma Israel.
Yalnikano Komam ta chiskuykanto yuninal,
yebꞌ anma chipoh yinh yuninal tuꞌ yinh chejbꞌanile yaqꞌkano Komam.
6 Yunhe yohtanhenilo anma chipohcha yinh anma Israel,
kat iskuynipaxkanto yuninal yinh hunteqꞌan chejbꞌanile tiꞌ.
7 Yunhe iskawxi iskꞌul yinh Komam Dios,
yebꞌ yunhe mach chisnahulnheto tzettaj iswatxꞌe Komam,
kat isyijen ischejbꞌanil Komam tuꞌ.
8 Yunhe mach lahano chiꞌeliko hakaꞌ ismanhkꞌomal yebꞌ yekꞌnajil ebꞌnaj jichmam. Ebꞌnaj jichmam tuꞌ,
kaw mach islinhbꞌa isbꞌa ebꞌnaj yinh tzet yal Komam,
machi xin hinano yute yanma isyijen tzet yal Komam.
Hunteqꞌan anma tuꞌ kaw mach isyije tzet yal Komam Dios.
9 Ebꞌnaj iskꞌahol yaꞌ Efraín, iqꞌbꞌil islitꞌ ebꞌnaj,
kaw helan ebꞌnaj islitꞌwahi, yajaꞌ xin meltzo ebꞌnaj yintaj yet ayko howal.
10 Kaw mach chiyelapno huneꞌ istrato Komam Dios yul sat ebꞌnaj.
Mach chisjepaxo ebꞌnaj isyijeꞌ kuybꞌanile yaqꞌkano Komam.
11 Wal xin isnahulnheto ebꞌnaj tzettaj iswatxꞌe Komam
yebꞌ ej kꞌaybꞌalkꞌule yelax tet ebꞌnaj.
12 Isye Komam kꞌaybꞌalkꞌule tet yichmam ebꞌnaj bꞌey txꞌotxꞌ Zoán yul ismajul txꞌotxꞌ Egipto.
13 Ispoh Komam haꞌ mar, yekꞌto ebꞌnaj yiktabꞌal haꞌ,
yah tenno haꞌ hakaꞌ hunu kꞌubꞌ yunhe yekꞌto ebꞌnaj.
14 Hayet ayko ebꞌnaj yinh isbꞌel,
yet tzꞌayikal ijbꞌabꞌil ebꞌnaj yu Komam yu huneꞌ moyan.
Haxa yet aqꞌbꞌalil huneꞌ niman qꞌaꞌ chitzejnhen isbꞌeh ebꞌnaj.
15 Bꞌey txꞌotxꞌ desierto hatkanh iskꞌul huneꞌ chꞌen niman chꞌen yu Komam,
yaqꞌni Komam ha haꞌ yukꞌuꞌ ebꞌnaj, hatatikꞌa hanta yoche ebꞌnaj yukꞌuꞌ.
16 Yaqꞌ pitzkꞌaho Komam huneꞌ niman isnuqꞌ ha haꞌ yul iskꞌul chꞌen niman chꞌen tuꞌ,
yelto yojomal haꞌ.
17 Yajaꞌ xin kaw islahiko ebꞌnaj yaniko ismul sata Komam Dios.
Kaw manhkꞌom yute isbꞌa ebꞌnaj tet Komam bꞌey txꞌotxꞌ desierto,
Komam kaw aykano yelapnoj.
18 Kaw yako ebꞌnaj Komam yinh ilwebꞌal,
isqꞌanni ebꞌnaj tzet chislo hakaꞌtikꞌa tzet choche yanma ebꞌnaj.
19 Yok ebꞌnaj bꞌuchwal yinh Komam, yalni ebꞌnaj:
«¿Tom chaqꞌaꞌko Komam mexha yinh kosat bꞌey txꞌotxꞌ desierto tiꞌ?
20 Yinh kaw yeli hatkanh huneꞌ chꞌen niman chꞌen yu Komam,
ispitzkꞌa huneꞌ niman isnuqꞌ ha haꞌ yul iskꞌul chꞌen, yelto hotxꞌ yu yojomal haꞌ, yajaꞌ xin,
¿tom chaqꞌ Komam Dios tzet chikolo bꞌey tiꞌ?
¿Tom chaqꞌ Komam chibꞌe kokꞌuxuꞌ, hanhonh konhiskonhobꞌonh tiꞌ?» xhi ebꞌnaj.
21 Hayet yabꞌen Komam tzet yal ebꞌnaj tuꞌ, kaw tit ishowal Komam.
Hakaꞌ chu yah xaj qꞌa qꞌaꞌ, hak tuꞌ yu istit ishowal Komam yinh yuninal yaꞌ Jacob,
haꞌ ton ebꞌnaj Israel.
22 Yuto mach kawxi iskꞌul ebꞌnaj yinh Komam Dios,
mach xin yayto ebꞌnaj yul yanma ta chu iskolwa Komam yinh ebꞌnaj.
23 Yajaꞌ xin ischej Komam moyan,
ishajni Komam ispultahil satkanh.
24 Yaniti Komam maná yul satkanh, yay wexhwon hakaꞌ haꞌ nhabꞌ,
yati Komam trigo yul satkanh yunhe iswahni ebꞌnaj.b
25 Ebꞌnaj jichmam tuꞌ isloh ebꞌnaj tzet chislo ebꞌnaj ángel,
yaqꞌ Komam tzet chislo ebꞌnaj yinh kaw niman.
26 Tit jaqꞌeqꞌ yul satkanh yinh yetkꞌulal bꞌay chiꞌahilo tzꞌayik yebꞌ yinh sur.
27 Hakaꞌ xin yay nhabꞌ, hak tuꞌ yu yay purna noꞌ chꞌik yu Komam,
yaqꞌ Komam chibꞌe iskꞌux ebꞌnaj. Hakaꞌ isbꞌisil arena ay istiꞌ haꞌ mar,
hak tuꞌ isbꞌisil noꞌ yati Komam.
28 Yati Komam noꞌ chꞌik tuꞌ yiktabꞌal campamento
yebꞌ yinhla ishoyanil qꞌap mantiado aykanh yatuto ebꞌnaj.
29 Kaw waꞌ ebꞌnaj yinh kaw kꞌul,
masanta kaw noh iskꞌul ebꞌnaj, yaqꞌ Komam tzet yoche iskꞌul ebꞌnaj.
30 Kaw lanhan ebꞌnaj iskꞌuxni noꞌ chibꞌe tuꞌ xin,
aytokto noꞌ yul istiꞌ ebꞌnaj,
31 istit ishowal Komam Dios yinh ebꞌnaj.
Istanhtzenilo Komam ebꞌnaj winaj kaw ay yip,
istanhtzenpaxilo Komam ebꞌnaj kaw ay yelapno xol ebꞌnaj Israel.
32 Waxanhka yu hunteqꞌan tuꞌ xol ebꞌnaj,
yajaꞌ kaw ekꞌbꞌalto islahiko ebꞌnaj yaniko ismul,
mach yayto ebꞌnaj yul yanma yinh ej kꞌaybꞌalkꞌule iswatxꞌe Komam tuꞌ.
33 Yuxin istanhtzelo Komam ebꞌnaj yinh hunepchꞌan.
Hakaꞌnhe yelti jaqꞌeqꞌ yul kotiꞌ, hak tuꞌ yu istanhtzelaxilo ebꞌnaj xol nime isyaꞌtajil.
34 Hayet chaniti Komam kamikal xol ebꞌnaj,
kat issayni ebꞌnaj Komam. Chimeltzo ebꞌnaj,
chissayni ebꞌnaj Komam yinh sunil iskꞌul.c
35 Kat isnahniti ebꞌnaj Komam Dios,
Komam kaw aykano yelapnoj;
tato haꞌ Komam chitanhen ebꞌnaj yebꞌ chikolni ebꞌnaj.
36 Yajaꞌ wal istiꞌ ebꞌnaj kꞌul istzotel yinh Komam,
yajaꞌ hunepixto chalni ebꞌnaj leqꞌtiꞌal tet Komam.
37 Kaw mach yinh sunil yanma ebꞌnaj issayikꞌo ebꞌnaj Komam.
Mach isyije ebꞌnaj istrato Komam yaqꞌ tet ebꞌnaj.d
38 Yajaꞌ wal Komam Dios kaw niman iskꞌul Komam yinh ebꞌnaj,
yaqꞌni nimankꞌulal Komam yinh ismul ebꞌnaj,
yuxin mach istanhtzelo Komam ebꞌnaj sunil.
Txꞌiꞌal el mach yati Komam ishowal yinh ebꞌnaj, mach yiti Komam ishowal iswiꞌ.
39 Yohta Komam tato machi yip ebꞌnaj winaj iskolni isbꞌa,
lahan ebꞌnaj hakaꞌ jaqꞌeqꞌ chiꞌekꞌi, matxa xin chimeltzohi.
40 ¡Txꞌiꞌal el ismanhkꞌo ebꞌnaj jichmam tuꞌ tet Komam Dios bꞌey txꞌotxꞌ desierto,
yako ebꞌnaj ishowal Komam yinh yanma!
41 Kaw naunhe chilwen ebꞌnaj Komam,
chaniko ebꞌnaj bꞌiskꞌulal yinh iskꞌul Komam,
Komam machi nino istxꞌojal, Komam isDiosal ebꞌnaj Israel.
42 Mach isnahti ebꞌnaj yip Komam yinh huneꞌ tzꞌayik yet iskolnilo Komam ebꞌnaj tet isyaꞌtajil.
43 Isye Komam yechel yip tet ebꞌnaj bꞌey Egipto.
Nime kꞌaybꞌalkꞌule isye Komam tet ebꞌnaj bꞌey Zoán yul ismajul txꞌotxꞌ Egipto,
44 ismeltzoniko Komam sunil isnuqꞌ ha haꞌ chikꞌal,
yebꞌ haꞌ chiꞌel yojomal, hak tuꞌ xin matxa yu yukꞌlax haꞌ.
45 Yati Komam noꞌ nime us xol ebꞌnaj ah Egipto tuꞌ,
ischilax ebꞌnaj yu noꞌ,
yanipaxti Komam noꞌ pahtzaꞌ xol ebꞌnaj yunhe yetalax ebꞌnaj yu noꞌ.e
46 Yako Komam sat istzꞌunubꞌ ebꞌnaj tet noꞌ qꞌul yetanpaxto noꞌ litꞌ istzꞌunubꞌ ebꞌnaj tuꞌ.f
47 Yati Komam chꞌen sajbꞌat yebꞌ chꞌen chew,
yetanto chꞌen sat teꞌ uva yebꞌ teꞌ higuera.
48 Iskampaxilo iswakax ebꞌnaj yebꞌ ismeꞌ ebꞌnaj yu chꞌen sajbꞌat tuꞌ yebꞌ yu kꞌuh.
49 Yati Komam ishowal yibꞌanh ebꞌnaj,
haꞌ ton xiwkilal, bꞌiskꞌulal yebꞌ isyaꞌtajil.
Yanipaxti Komam hunbꞌulan ebꞌnaj ángel aqꞌom howal yu istanhtzelaxilo ebꞌnaj.g
50 Kaw yíkanti ishowal Komam yinh ebꞌnaj,
mach yaqꞌ nimankꞌulal Komam,
wal xin isbꞌejtzoko Komam ebꞌnaj yul isqꞌabꞌ kamikal.
51 Yaqꞌkamo Komam isbꞌabꞌel winaj hunun nhahil anma ah Egipto,
haꞌ ton isbꞌabꞌel kꞌahol ebꞌnaj yuninal yuninal naj Cam.h
52 Yilo Komam iskonhobꞌ Israel sat txꞌotxꞌ Egipto.
Hakaꞌ chu istanhelax noꞌ meꞌ, hak tuꞌ yu yinikꞌo Komam iskonhobꞌ sat txꞌotxꞌ desierto.i
53 Kaw kꞌul yu yijbꞌanikꞌo Komam iskonhobꞌ tuꞌ yunhe machi bꞌaytet yinh chixiwi.
Yajaꞌ wal ebꞌnaj ayko ishowal yinh iskonhobꞌ Komam tuꞌ,
tanhkanilo ebꞌnaj xol haꞌ mar.
54 Yito Komam ebꞌnaj jichmam tuꞌ sat ismohonal txꞌotxꞌ sikꞌbꞌililo yu Komam,
txꞌotxꞌ witz yiqꞌa yet isqꞌoji yinh howal yu iswatxꞌqꞌabꞌ.j
55 Istanhtzelo Komam nime konhobꞌ yinh sat ebꞌnaj Israel,
ismalelax txꞌo txꞌotxꞌ, ispohnikanh Komam txꞌotxꞌ yinh ebꞌnaj Israel,
yehayo hunun majan ebꞌnaj Israel yul iskonhobꞌ anma tuꞌ.k
56 Yajaꞌ xin ok ebꞌnaj Israel tuꞌ yilweꞌ Komam Dios,
Komam kaw aykano yip, yaniko ebꞌnaj ishowal Komam yinh iskꞌul.
Ismanhkꞌon ebꞌnaj chejbꞌanile aykano yu Komam.l
57 Wal xin yichinh ebꞌnaj yato tet Komam, yok ebꞌnaj manhkꞌomal hakaꞌ yichmam.
Mach toholo yute isbꞌa ebꞌnaj,
lahan ebꞌnaj hakaꞌ isbꞌaqꞌ teꞌ litꞌ kotxan chu istohi, mach kꞌuloj.
58 Kaw yaqꞌ chíwaho ebꞌnaj iskꞌul Komam yet yaqꞌni ebꞌnaj isxahanbꞌal iswiꞌla witz,
yet yinayo isbꞌa ebꞌnaj tet tioxh, hak tuꞌ yu yaniko ebꞌnaj ishowal Komam yinh iskꞌul.
59 Yilni Komam tzet iswatxꞌe ebꞌnaj,
istit ishowal Komam yinh ebꞌnaj,
yintanhenkanilto Komam ebꞌnaj jichmam Israel tuꞌ.
60 Isbꞌejnikano Komam huneꞌ nha ay bꞌey Silo,
huneꞌ nha tuꞌ kaw Yatut Komam yeko xol ebꞌnaj.m
61 Yaniko Komam isKaxhahil isTrato yul isqꞌabꞌ ebꞌnaj ayko ishowal yinh ebꞌnaj tuꞌ.
Huneꞌ kaxha tuꞌ yechel isqꞌaqꞌal yip Komam yehi.n
62 Isbꞌejtzoko Komam iskonhobꞌ yul isqꞌabꞌ ebꞌnaj ayko ishowal yinh,
ispotxꞌlaxkamo ebꞌnaj yu chꞌen espada,
yu tit ishowal Komam yinh iskonhobꞌ tuꞌ.
63 Isnhusnito ebꞌnaj ebꞌnaj tzehtaj,
matxa hunu bꞌay abꞌelax bꞌit yet mohyilal yinh hunu ix qꞌopo yul konhobꞌ tuꞌ.
64 Wal ebꞌyaꞌ sacerdote potxꞌlaxkamo ebꞌyaꞌ yu chꞌen espada,
machi xin oqꞌ yixal ebꞌyaꞌ yinh.o
65 Lahwi tuꞌ xin, hakaꞌtanhe el iswayanh Komam,
hakaꞌ yel iswayanh anma,
yebꞌ hakaꞌ hunu naj aqꞌom howal kaw helan,
chiꞌel yaw yu teꞌ ukꞌe ayko yinh sat.
66 Yaniko Komam howal yinh ebꞌnaj aniko howal yinh ebꞌnaj jichmam tuꞌ.
Isqꞌoji Komam yinh ebꞌnaj yelkanh ebꞌnaj tet Komam.
Yokkano ebꞌnaj yinh txꞌixwilal yinh hunelnhe.
67 Yintanhenkanilto Komam ebꞌnaj yuninal yaꞌ José,
maxhtaj xin yuninal yaꞌ Efraín issikꞌilo Komam.p
68 Wal xin haꞌ yuninal yaꞌ Judá issikꞌilo Komam,
issikꞌnikanilo Komam wonhan Sión kaw ochebꞌil yu.
69 Yanikanh Komam yatut kaw nahat yukanh istel,
hakaꞌ isnahatil yekanh satkanh,
iskawxenkano Komam yinh hunelnhe, hakaꞌ yehayo txꞌo txꞌotxꞌ.
70 Issikꞌnilo Komam yaꞌ David ischejabꞌoj,
yel yaꞌ yinh tanhe meꞌ.
71 Yaꞌ David tuꞌ, matxa ok yaꞌ tanhe meꞌ,
wal xin yako Komam yaꞌ ijbꞌalo yinh yuninal yaꞌ Jacob,
iskonhobꞌ Komam, haꞌ ton Israel, ismajul Komam.q
72 Hak tuꞌ yu istanhen yaꞌ iskonhobꞌ Komam Dios yinh sunil yanma,
kaw xin helan yute isbꞌa yaꞌ istanheni.