Bꞌiskꞌulal yu uchkꞌalaxto konhobꞌ Jerusalén
Salmo tiꞌ tzꞌibꞌnhebꞌilkano yu yaꞌ Asaf
79
¡Mamin, hach inDiosalan, okti ebꞌnaj nan konhobꞌal yul hakonhobꞌ Jerusalén!¡Yetato ebꞌnaj hawatut, huneꞌ nha kaw hawet yehi.
Xayuchkꞌato ebꞌnaj hakonhobꞌ!a
2 ¡Ispotxꞌ ebꞌnaj ebꞌnaj hachejabꞌ,
kankano pakꞌno isnimanil ebꞌnaj, yunhe islohnito noꞌ usmij.
Iskꞌuxnipaxto noꞌ howla noqꞌ isnimanil makta hawetxa yehi!
3 Malto ischikꞌil ebꞌnaj hakaꞌ ha haꞌ sunil yul Jerusalén.
Machi xin mak mujni isnimanil ebꞌnaj.
4 Sunil anma ayayo kokawilalanh kaw chibꞌuchwa jinhanh,
kat istzebꞌipaxo anma ay yul ej konhobꞌ hoyaniko yinh kokonhobꞌanh.
5 Mam Wahawil, hach koDiosalanh, ¿hantato tiempo ayayo hahowal jibꞌanhanh?
¿Tom yinh sunilbꞌal tiempo chawayo hahowal hakaꞌ yah xaj qꞌa qꞌaꞌ?
6 ¡Mamin, ayo hahowal yibꞌanh anma mach kach ohtanheni,
hunteqꞌan anma tuꞌ mach chaxhyawte yinh!
7 Yuto xaꞌistanhtzekanilo ebꞌnaj yuninal yaꞌ Jacob,
yuchkꞌapaxkanto ebꞌnaj iskonhobꞌ.b
8 Machojabꞌ chikotohlahanh ismul ebꞌnaj jichmamanh.
¡Mamin, kaw tzꞌayojabꞌ hakꞌul jinhanh,
nati honhanh yuto kaw chonhekꞌ yaꞌanh!
9 ¡Mamin, hach koKolomalanh, kolwahanh jinhanh yu iskꞌulchꞌanil habꞌi!
¡Kolonhanh, kat hawaqꞌni nimankꞌulal yinh komulanh,
yu isxahanil ay habꞌi hawu!
10 Machojabꞌ chisqꞌambꞌe anma jetanh hakaꞌ tiꞌ:
«¿Bꞌaytuꞌwal ay heDios?» xhi.
¡Chijochehanh chawaqꞌ ispaj iskamikal ebꞌyaꞌ hachejabꞌ potxꞌbꞌilkamoj,
kat yohtanhenilo anma ay yulajla konhobꞌ mach kach ohtanheni!c
11 Haꞌ ebꞌnaj ayko preso, chiꞌawi tawet, abꞌe tzet chal ebꞌnaj.
Haꞌ mak halbꞌilxa ta chiꞌaqꞌlaxkamoj kolilo ebꞌnaj yu hawip.d
12 Mamin, ayo hujelo isyaꞌtajil yibꞌanh anma ayko iskonhobꞌ kokawilal tiꞌanh,
yu chibꞌuchwa tawinh, chiyinilo hapixan.
13 Wal hanhonh hakonhobꞌ honhtiꞌanh,
hakaꞌ hameꞌ jehanh. Chijaqꞌanh yuchꞌandios tawet yinh sunilbꞌal ej tiempo.
¡Kat janikojanh bꞌit tawet, yebꞌ yuninal juninalanh!