Chiqꞌanlaxi ta chismeltzoko Komam Dios iskonhobꞌ yinh iskꞌulal hunelxa
Salmo tiꞌ tzꞌibꞌnhebꞌilkano yu yaꞌ Asaf
80
Mamin, hach chatanhe hakonhobꞌ Israel.Hakaꞌ istanhelax noꞌ meꞌ, hak tuꞌ chu hatanhen yuninal yaꞌ José.
Hach tiꞌ Tzꞌonhan hach yul hatzꞌonhobꞌal xolbꞌal ebꞌnaj querubín chaxhtzejtzoni.
Mamin, abꞌe tzet chijalanh.a
2 ¡Yelo isqꞌaqꞌal hawip sata ebꞌnaj yuninal yaꞌ Efraín,
yaꞌ Benjamín yebꞌ yaꞌ Manasés, hulanh kat hakolwa jinhanh!
3 ¡Mamin, hach koDiosalanh, meltzohonhikojanh yinh iskꞌulal,
hakaꞌ yet yalanhtokanoj. Tzꞌayojabꞌ hakꞌul jinhanh kat konhhakolnihanh!
4 Mamin, Dios hach, yahaw yinh ebꞌnaj aqꞌom howal yul satkanh,
¿bꞌaqꞌinh chabꞌej hawanayo hahowal jibꞌanhanh
kat hahajbꞌan hatxikin hawabꞌen istxah hakonhobꞌ?
5 Haꞌ yal kosatanh ok jitahojanh,
haꞌ yal kosat tuꞌanh haꞌ jukꞌpaxojanh.
6 Chonhbꞌahlaxanh yu anma ayayo kokawilalanh,
yebꞌ kotzeyelaxanh yu anma ayko ishowal jinhanh.
7 ¡Mamin, hach tiꞌ Dios hach, kaw aykano hawip!
¡Meltzohonhikojanh yinh iskꞌulal, hakaꞌ yet yalanhtokanoj!
Tzꞌayojabꞌ hakꞌul jinhanh kat konhhakolnihanh.
8 Haꞌ bꞌey Egipto hawiti huneꞌ yoj teꞌ uva,
hatzumbꞌenilo nime konhobꞌ, hatzꞌunnayo teꞌ uva tuꞌ sat istxꞌotxꞌ.
9 Hawinilo yaqꞌinal teꞌ, isto xeꞌ teꞌ yul txꞌotxꞌ,
ispohkanto teꞌ sat txꞌo txꞌotxꞌ.
10 Haꞌ hunteqꞌan wonhan ok teꞌ yenheloj.
Istopaxo isqꞌabꞌ teꞌ yenhelo teꞌ nime cedro yet Komam Dios.
11 To lehno isqꞌabꞌ teꞌ istiꞌ haꞌ mar,
isto lehno iswol isqꞌabꞌ teꞌ bꞌey haꞌ niman haꞌ.b
12 ¿Tzet yinh yuxin hawetato ispeyabꞌil teꞌ uva tuꞌ,
chiyinilo anma chiꞌekꞌto yul bꞌeh sat teꞌ?
13 Lanhan yetaxto teꞌ yu noꞌ telajil txitam,
yebꞌ lanhan istanhilo teꞌ islohnito noꞌ xoltelajil noqꞌ.c
14 Mamin Dios, yahaw yinh ebꞌnaj aqꞌom howal yul satkanh,
meltzanhti tinanh, ilayti yul satkanh tuꞌ,
kat hananitij kat hatuklen huneꞌ tzꞌunubꞌ tiꞌ.
15 Hach kaw hach tzꞌunnhe teꞌ uva tiꞌ,
hawaqꞌni chꞌibꞌo iswol teꞌ oko hawu.d
16 ¡Mamin, haꞌ mak chiꞌinilo sat teꞌ uva tuꞌ yebꞌ mak chinhusnito teꞌ,
tanhtzekanilo yu hahowal!
17 Yajaꞌ wal naj sikꞌbꞌililo hawu, kolwahanh yinh naj.
Haꞌ ton naj iskꞌahol naj winaj, naj hawako yinh ismunil.e
18 Hak tuꞌ xin matxa bꞌaqꞌinhal chachjakanojanh,
kat hawaqꞌni koqꞌinalanh.
Tawetnhe xin chiꞌah jawanh.
19 ¡Mam Wahawil, hach koDiosalanh, hach tiꞌ kaw aykano hawip.
Aqꞌ meltzoho iskꞌulal jilaꞌanh, hakaꞌ yet yalanhtokanoj!
¡Tzꞌayojabꞌ hakꞌul jinhanh, kat konhhakolnihanh!