Iskꞌulchꞌanil iskꞌul Komam Dios yebꞌ istxꞌojal anma Israel
Salmo tiꞌ tzꞌibꞌnhebꞌilkano yu yaꞌ Asaf
81
¡Bꞌitnhewe Komam Dios yinh tzalahilal,yuto haꞌ chiꞌaqꞌni jip!
¡Bꞌitnanhwe yinh kaw ip yinh kaw tzalahilal tet isDiosal jichmam Jacob!
2 Bꞌitnhewe Komam Dios yebꞌ pandereta,
yebꞌ teꞌ arpa kaw saqꞌal yoki,
yebꞌpaxo teꞌ salterio.
3 Cheyoqꞌtzewe chꞌen trompeta yet unin ixahaw,
hakpax tuꞌ yet chiyihbꞌi ixahaw,
yuto haꞌ ton tuꞌ istzꞌayikal niman qꞌinh.
4 Yuto hak tuꞌ yu yaqꞌnikano isDiosal jichmam Jacob,
chejbꞌanile tet anma Israel.
5 Haꞌ huneꞌ chejbꞌanile tuꞌ yaqꞌpaxo Komam tet yuninal yaꞌ José,
yet yel ebꞌnaj yul txꞌotxꞌ Egipto.
Yabꞌelax huneꞌ yul nuqꞌe halni hunteqꞌan tzotiꞌ mach chitxumcha ju hakaꞌ tiꞌ:a
6 «Xakexinkolan yalanh ijatz cheyikꞌo yibꞌanh hewixikꞌ,
yebꞌ xakexinkolan yinh munil bꞌay kaw kexekꞌyaꞌ.
7 Hayet ayexiko yinh isyaꞌtajil tuꞌ,
kinheyawtenan teyinh, kexinkolnihan.
Inpajtzenan teyet xol moyan yet isnhirlahi.
Kexwanikojan yinh ilwebꞌal bꞌey istiꞌ ha haꞌ bꞌey Meriba.b
8 Hex Israel, hex inkonhobꞌtiꞌan,
abꞌewe tzet chiwalan;
majaltam heyijen tzet chiwalan.
9 Matxahojabꞌ hunuxa heDiosal insatajan,
machojabꞌ cheyiyo hebꞌa tet tioxh.c
10 Hanin Yahawintiꞌan heDiosal wehan,
haninan kexwilojan sat txꞌotxꞌ Egipto.
Hajbꞌawe hetiꞌ, kat waqꞌnihan tzet cheloh, kinchihan.
11 Yajaꞌ xin machi yabꞌeto inkonhobꞌ tuꞌan tzet walan,
mach kinyochehan anma Israel tuꞌ.
12 Yu huneꞌ tuꞌ yuxin inbꞌejkanojan ebꞌnaj yinh ismanhkꞌomal,
iswatxꞌen ebꞌnaj tzet yoche iskꞌul.
13 ¡Tato yabꞌeto inkonhobꞌ tuꞌan tzet walan!
¡Yebꞌ ta bꞌelwikꞌo yul huneꞌ bꞌeh inyehkanojan tet!
14 Ta hak tuꞌ, kaw hunepchꞌanmi intanhtzelojan ebꞌnaj aniko howal yinh inkonhobꞌtiꞌan,
yebꞌ xin yinh anhemi wayojan inqꞌabꞌan yibꞌanh ebꞌnaj ayko ishowal yinh ebꞌnaj,» xhi Komam.
15 Haꞌ mak yahni Komam okmikano yinh xiwkilal,
kanmikano ebꞌnaj yinh isyaꞌtajil yinh hunelnhe.
16 Yajaꞌ wal tet iskonhobꞌ kaw nimanmi tzet chislo yaqꞌ Komam,
ham ixim trigo kaw kꞌul iswah ebꞌnaj,
yukꞌnipaxo ebꞌnaj iskabꞌil noꞌ txꞌilabꞌ ay satla chꞌen nime chꞌen,
yunhe isnoh iskꞌul ebꞌnaj.