Txannhe yoj kokawil yul sat yibꞌanhqꞌinal
Salmo tzꞌibꞌnhebꞌilkano yu yaꞌ rey David tet naj yahaw yinh bꞌit, haꞌ naj Jedutún
39
Walnihan hakaꞌ tiꞌ: «Kꞌul chiwute inbꞌeybꞌalan,yebꞌ mach chiwako inmulan yet chintzotelan.
Chinkachni waqꞌan yet ayinikojan sata ebꞌnaj chiwatxꞌen istxꞌojal,» kinchihan.
2 Hakaꞌ naj suk, hak tuꞌ wute hinbꞌahan, matzet walan,
nitam kintzotelan yinh iskꞌulal, yajaꞌ wal inyaꞌtajilan kaw ip yahkanh.
3 Huneꞌ qꞌaꞌ ok yinh wanmahan yinh istxam inkꞌulan,
yet yekꞌ innabꞌalan yinh huneꞌ tuꞌ, istzuji qꞌaꞌ yinh wanmahan,
walnihan yinh kaw ip yu waqꞌan hakaꞌ tiꞌ:
4 «Mam Wahawil, aqꞌ wohtanhelojan yinh tzet chintanhkanojan,
yebꞌ xin hantato tzꞌayik ayinikꞌojan yul sat yibꞌanhqꞌinal tiꞌ.
Txumchahojabꞌilo wuhan ta kaw txannhechꞌan yoj inkawilan.
5 Kaw hanikꞌchꞌan inkawilan hawu, kaw txannhechꞌan yoj inkawilan yul hasat.
Yinh kaw yeli sunil anma yul sat yibꞌanhqꞌinal tiꞌ,
hakaꞌnhe yah kokꞌul, hak tuꞌ chu yekꞌto iskawil.
6 Sunil anma yul sat yibꞌanhqꞌinal tiꞌ,
hakaꞌ yekꞌto yechel hunu tzet ye tuꞌ yu yoj tzꞌayik, hak tuꞌ yekꞌto istiempohal yinh anhe.
Nabꞌnhe chistenbꞌa isqꞌalomal, mach yohtajoj mak tet chikankano isqꞌalomal tuꞌ.
7 Ta hak tuꞌ, Mamin, ¿tzet chiwechmahan?
Wal xin hachnhechꞌan ayachiko yipo wanmahan.
8 Kolinan yinh inmulan,
machojabꞌ chinistzeyehan anma mach chꞌabꞌen tzet chawala.
9 Lahan wute hinbꞌahan hakaꞌ ebꞌnaj suk, mach kintzotelan,
yuto hach hawayo isyaꞌtajil tiꞌ wibꞌanhan.
10 Mamin, matxa chinamaqꞌan,
lanhan intanhilojan yu hahowal ayayo wibꞌanhan.
11 Haꞌ mak chako ismul yul hasat chawayo isyaꞌtajil yibꞌanh,
hak tuꞌ chu hakachwa yinh, haꞌ tzet bꞌay kaw ayko yanma xin, chameltzoko pojojal.
Yinh kaw yeli, yinh anhe chiꞌekꞌto kokawilanh hakaꞌnhe koxuni jaqꞌeqꞌ.
12 Mamin, abꞌe intxahan chiwaqꞌan tawet, hajbꞌa hatxikin yinh inyaꞌtajilan chiwalan tawet.
Machojabꞌ tonhe chachok tuknoj, chawilni yal insatan.
Hanintiꞌan ekꞌomnhe wekꞌan yul sat yibꞌanhqꞌinal tiꞌ yul hasat, hakaꞌ sunil ebꞌnaj wichmaman.
13 Mamin, ikanh hahowal wibꞌanhan,
kat xin wiqꞌni wipan yalanhto maxhto chinkaman,» kinchihan.