Txah yu mak bꞌiskꞌulal ye yu ismul
Salmo tzꞌibꞌnhebꞌilkano yu yaꞌ rey David yu isnahlaxtija
38
Mam Wahawil, machojabꞌ chitit hahowal yet chinhakachnihan.Machojabꞌ xin yu hahowal chawayo isyaꞌtajil wibꞌanhan.
2 Winhan hul isqꞌojbꞌal halitꞌ,
kaw how hawuteyo haqꞌabꞌ wibꞌanhan.
3 Sunil innimanilan kaw yaꞌay yu hahowal,
yu inmulan wakojan yul hasat.
Machi hunu isbꞌajil innimaniltiꞌan kꞌul yehi.
4 Haꞌ intxꞌojalan, kaw xaꞌahtenno wibꞌanhan,
lahan hakaꞌ hunu ijatz kaw al, machi techa yalil wuhan.
5 Yu inhipalan yuxin kaw lanhan islowto innimanilan yu kaw chiqꞌatoj,
kaw xin ay sam.
6 Nhohaninayojan yet chinekꞌan, matxa xin tzet chiwalan,
kaw bꞌiskꞌulal wehan yinh sunilbꞌal tzꞌayik,
7 yuto kaw chinhilnhon wichinhan yu isqꞌaqꞌal yabꞌil ayko yinh sunil innimanilan.
8 Kaw bꞌuyanxato sunil innimanilan,
yebꞌ kaw matxatikꞌa nino wipan, kaw chiqꞌajwi wanmahan yu isyaꞌil.
9 Mamin, hawohtaj tzet choche wanmatiꞌan,
hunta el chꞌah inkꞌulan hawohtaj, mach chebꞌato isbꞌa tawet.
10 Kaw yinh anhe chitinhxi wanmatiꞌan,
lanhan ispaxilo wipan, lanhan ispaxilo yip inmujlubꞌalan.
11 Sunil ebꞌnaj wamigohan yebꞌ ebꞌnaj kaw wet lahan hinbꞌahan hebꞌi,
xakinisbꞌejkanojan ebꞌnaj yu yabꞌil ayko winhan;
haxa ebꞌnaj wikꞌalan, matxa chihitziko ebꞌnaj inkꞌatanhan.
12 Ebꞌnaj chiyoche kinispotxꞌoꞌan, chiyayo ebꞌnaj latzꞌabꞌ insatajan.
Ebꞌnaj choche kinyaqꞌaꞌ aykꞌayojan, chislahtiꞌnhe isbꞌa ebꞌnaj kinistanhtzenkanilojan.
Sunilbꞌal tzꞌayik ayko ebꞌnaj yilni yinh tzet chu waykꞌayan yinh istxꞌojal.
13 Yajaꞌ wal hinan mach chiwabꞌetojan tzet chal ebꞌnaj,
hakaꞌtanhe mach chiwabꞌehan.
Matxa xin tzet chiwalan hakaꞌtanhe suk chiwute hinbꞌahan.
14 Lahan hinan hakaꞌ hunu mak mach chabꞌe,
yebꞌ hakaꞌ hunu mak mach chu istzoteli yu iskolni isbꞌa.
15 Yuto hach Wahawil, hach inDiosalan,
tawetnhe chiwechmahan, hachojabꞌ chapajtze tet ebꞌnaj.
16 Mamin, tawet chiwalan: «Machojabꞌ chitzebꞌi ebꞌnaj winhan.
Machojabꞌ chibꞌitni ebꞌnaj yu tzalahilal ta chinaykꞌayan,» kinchihan.
17 ¡Yajaꞌ yinh kaw yeli lanhanxa waykꞌayan chiwabꞌehan!
¡Maxhtikꞌa nino chinisbꞌejkanojan isyaꞌil yabꞌil!
18 Yuxin, wal tinanh chiwalahtijan inmulan tawet,
kaw mach aqꞌankꞌulalo wehan yu inmulan.
19 Haꞌ ebꞌnaj chiyako ishowal winhan kaw ay yip,
chiꞌahkanokanh isbꞌisil ebꞌnaj.
Tonhe chichiwako iskꞌul winhan, yajaꞌ machi inmulan tet ebꞌnaj.
20 Haꞌ istxꞌojal chispajtze ebꞌnaj wetan selelo iskꞌulal chinwatxꞌehan,
yu hanhetikꞌa iskꞌulal chinsayan inwatxꞌehan, yuxin chiꞌok ishowal ebꞌnaj winhan.
21 Mam Wahawil, machojabꞌ chinhabꞌejkanojan inchukilan.
Hach inDiosalan mach chachhitzilo inkꞌatanhan.
22 ¡Mamin, hach inDiosalan, hach inKolomalan,
hulanh kolwal winhan yinh anhe!