Huneꞌ bꞌeh chabꞌil yu anma txꞌoj isbꞌeybꞌal
Salmo tzꞌibꞌnhebꞌilkano yu yaꞌ rey David
37
Machojabꞌ chiꞌok hahowal yinh hakꞌul yu ebꞌnaj txꞌoj.Machojabꞌ chichiwako hakꞌul yinh ebꞌnaj chiwatxꞌen istxꞌojal.
2 Yuto yinh anhe chitanhilo ebꞌnaj hakaꞌ chu iskꞌuplaxkanh teꞌ chꞌim,
chitanhilo ebꞌnaj hakaꞌ chu istajilo teꞌ yaxla telaj.
3 Yinhnhehojabꞌ Komam Dios chikawxi hakꞌul,
kat hawatxꞌen iskꞌulal, kat hawehikꞌo sat txꞌo txꞌotxꞌ, yijemojabꞌnhetikꞌa hach.
4 Aqꞌ tzalaho hakꞌul yinh Komam Jahawil,
kat yaqꞌni Komam sunil tzet chal hawanma.
5 Abꞌenheko habꞌa yul isqꞌabꞌ Komam, kawxojabꞌ hakꞌul yinh Komam,
kat iskolwa Komam tawinh.
6 Kat istzejla hakꞌulal yebꞌ hatoholal yu Komam
hakaꞌ istzejla tzꞌayik yinh chuman.
7 Okanh tukno sata Komam, nimanojabꞌ chawute hakꞌul hawechman kaxhiskolni.
Machojabꞌ chichiwa hakꞌul yinh mak chitzujcha apno tzet ye tuꞌ yu yul sat yibꞌanhqꞌinal tiꞌ,
maka yinh anma chiwatxꞌen istxꞌojal.
8 Bꞌejkano ischiwa hakꞌul yebꞌ istit hahowal,
yuto yet chitit hahowal txꞌiꞌal tzet chetatoj.
9 Yuto haꞌ anma txꞌoj chikꞌaytzelaxiloj,
yajaꞌ wal mak chikawxi iskꞌul yinh Komam Jahawil chischah ismajul sat txꞌo txꞌotxꞌ.
10 Yinhxanhe hayebꞌ tzꞌayikal matxa chawil anma chiwatxꞌen istxꞌojal,
waxanhka chasayikꞌoj, matxa chiꞌilcha hawu.
11 Yajaꞌ wal mak kꞌul isbꞌeybꞌal chischah txꞌo txꞌotxꞌ ismajuloj,
kat xin yaqꞌlax aqꞌankꞌulal tet.
12 Huneꞌ mak txꞌoj chistxumiko iswatxꞌen istxꞌojal yinh hunu anma tohol isbꞌeybꞌal,
kaw xin chinhetxꞌla yeh yu ishowal.
13 Yajaꞌ kaw chitzebꞌi Komam yinh anma txꞌoj tuꞌ,
yuto lanhan yul istzꞌayikal bꞌay chiꞌaqꞌlax ekꞌoyaꞌ yanma.
14 Ebꞌnaj txꞌoj chiyihti ebꞌnaj yespada yul yatut, kat isnhikꞌni ebꞌnaj islitꞌ,
yunhe yaqꞌni aykꞌayo ebꞌnaj anma kꞌul isbꞌeybꞌal,
yebꞌ anma matzet ayko yipo yanma, kat ispotxꞌnikamo ebꞌnaj.
15 Yajaꞌ haꞌtikꞌa yespada ebꞌnaj tuꞌ chiqꞌaxponikꞌto yul yanma,
yebꞌ xin hayebꞌtam qꞌahilal chiꞌelkaniko islitꞌ ebꞌnaj.
16 Haꞌ hanikꞌ ay yul isqꞌabꞌ anma tohol isbꞌeybꞌal ekꞌbꞌalto kꞌul sata sunil isqꞌalomal anma txꞌoj.
17 Wal anma txꞌoj chisqꞌahto Komam isqꞌabꞌ,
kat istanhtzenilo Komam, wal anma tohol isbꞌeybꞌal chako Komam yip.
18 Haꞌ Komam ohtanhe makta machi ismul,
haꞌ xin ismajul chiꞌaqꞌlaxi aynhetikꞌa yinh sunilbꞌal ej tiempo.
19 Haꞌ yinh istzꞌayikal isyaꞌtajil yet ay wahil,
mach chiꞌel istxꞌixobꞌal yuto kaw ay tzet chislo.
20 Haꞌ anma txꞌoj chinhuslaxtoj hakaꞌ isnhuslaxto teꞌ tajin telaj.
Haꞌ mak ayko ishowal yinh Komam Jahawil chikꞌaykanilo hakaꞌ chu iskꞌaykanokanh nhubꞌ.
21 Haꞌ anma txꞌoj isbꞌeybꞌal chisqꞌan tzet ye tuꞌ kꞌamil, yajaꞌ matxa chaqꞌ meltzohoj,
yajaꞌ wal anma kꞌul isbꞌeybꞌal kaw saqꞌal yebꞌ kaw kꞌulchꞌan iskꞌul.
22 Mak chayo Komam isyaxilal yibꞌanh, haꞌ chischah ismajul,
haꞌ ton txꞌo txꞌotxꞌ; yaj wal anma tzꞌaktiꞌnhebꞌil yu Komam xin chitanhtzelaxiloj.
23 Haꞌ anma chitzala Komam Jahawil yinh,
haꞌ Komam chiꞌijbꞌan isxalabꞌ, kat yaniko yinh bꞌeh bꞌay choche Komam.a
24 Waxanhka chiꞌaykꞌayi yajaꞌ mach chiꞌaykꞌaykano yinh hunelnhe,
yuto tzabꞌil isqꞌabꞌ yu Komam Jahawil.
25 Hanintiꞌan xakinekꞌan yinh intzehalan,
wal tinanh icham inxahan,
yajaꞌ mach hunelo tiꞌ wilan isbꞌejnikano Komam makta kꞌul isbꞌeybꞌal,
yebꞌ xin machi hunelo tiꞌ ekꞌ yuninal ebꞌnaj qꞌano wah.
26 Haꞌ mak tohol isbꞌeybꞌal, sunilbꞌal tiempo chitzꞌay iskꞌul yinh yet anmahil.
Ta ay mak chiqꞌanni hunu tzet ye tuꞌ kꞌamil tet, chaqꞌa.
Haxa yuninal xin isyaxilal chukanoj tet anma.
27 Hitzanhilo yinh istxꞌojal, kat hawatxꞌen iskꞌulal,
ta hak tuꞌ aynhetikꞌa bꞌay chaxhehi.
28 Yuto Komam Jahawil kaw chitzala yinh anma tohol isbꞌeybꞌal,
machi xin chisbꞌejkano Komam makta chiyijen tzet chala, kat iskꞌubꞌa Komam yinh hunelnhe.
Yajaꞌ wal yuninal anma chiwatxꞌen istxꞌojal chistanhtzelo Komam,
matxa xin yuninal yebꞌ yikꞌal chikankano yu Komam.
29 Haꞌ anma kꞌul isbꞌeybꞌal chischah txꞌo txꞌotxꞌ ismajuloj,
kat yehikꞌo yinh sunilbꞌal ej tiempo.
30 Haꞌ anma kꞌul isbꞌeybꞌal haꞌ iskꞌulal chal yu istiꞌ yuto ay yitzꞌatil iswiꞌ,
kat yalnipaxo istoholal.
31 Haꞌ kuybꞌanile chaqꞌ Komam Dios chistzꞌun yul yanma,
machi bꞌaqꞌinhal xin chiꞌel sulna yoj.
32 Ebꞌnaj txꞌoj kaw ayko ebꞌnaj yilni anma kꞌul isbꞌeybꞌal,
yunhe yaykꞌay yul isqꞌabꞌ ebꞌnaj, kat ispotxꞌni ebꞌnaj, yalni.
33 Yajaꞌ wal Komam mach chischayo Komam hunteqꞌan mak tuꞌ yul isqꞌabꞌ ebꞌnaj,
haꞌ xin Komam chikolwa yinh yunhe machi nichꞌano ismul chiꞌilcha yu ebꞌnaj txꞌoj tuꞌ.
34 Yinhnhehojabꞌ Komam Jahawil chikawxi hakꞌul kat hayijen tzet chala. Chako Komam hawinajil, kat yaqꞌni Komam txꞌo txꞌotxꞌ hamajuloj.
Haꞌ kaw isbꞌaqꞌ hasat chiꞌilni istanhtzelaxilo ebꞌnaj txꞌoj.
35 Kaw wilan yiqꞌni yip naj txꞌoj yinh ej ismachiswalilal,
hakaꞌ ischꞌibꞌ hunu teꞌ qꞌebꞌtaj kaw yax.
36 Yajaꞌ wal tinanh xin xakꞌaykanh naj,
matxa naj aykꞌoj.
Xaꞌinsayan naj yajaꞌ mach ilcha naj wuhan.
37 Ilkꞌanabꞌ mak kꞌul isbꞌeybꞌal,
yebꞌ kaw tohol, yuto haꞌ chꞌelikoj kaw saqꞌal yet, yuto yet aqꞌankꞌulal yehi.
38 Yajaꞌ wal anma manhkꞌom chitanhtzelaxilo yinh hunelnhe,
haꞌ istanhtzelaxiloj haꞌ chischah yet bꞌaqꞌinh.
39 Haꞌ anma kꞌul isbꞌeybꞌal haꞌ yinh Komam Jahawil chitit iskolbꞌanil.
Haꞌ Komam chikolni yinh istzꞌayikal isyaꞌtajil.
40 Haꞌ Komam Jahawil chikolwa yinh anma yu iskolni isbꞌa tet ebꞌnaj txꞌoj,
yuto yinh Komam chissay iskolbꞌanil, haꞌ xin Komam chikolni.