Chitzꞌay iskꞌul Komam jinh
Salmo tzꞌibꞌnhebꞌilkano yu yaꞌ rey David tet naj yahaw yinh bꞌit
36
Yinh ebꞌnaj txꞌoj chiwalan yul wanmahan:«Maxhtikꞌa chiꞌekꞌ yinh isnabꞌal ebꞌnaj isxiw tet Komam Dios,» kinchihan.
2 Kaw ay yelapno ebꞌnaj yalni,
chistxumni ebꞌnaj tato mach chiyil Komam ismul ebꞌnaj,
yebꞌ ta mach chꞌay isyaꞌtajil jibꞌanh ebꞌnaj yu Komam.
3 Hanhkꞌanhetikꞌa istxꞌojal yebꞌ leqꞌtiꞌal chiꞌelti yul istiꞌ ebꞌnaj,
matxa kꞌulo isnabꞌal ebꞌnaj, xaꞌisbꞌejkano ebꞌnaj iswatxꞌen iskꞌulal.
4 Hayet hilan ebꞌnaj sat istxꞌat chistxumni ebꞌnaj iswatxꞌen istxꞌojal.
Ayiko ebꞌnaj yinh bꞌeh mach kꞌuloj,
yuxin matxa chisje ebꞌnaj isbꞌejaꞌkano iswatxꞌen istxꞌojal.
5 Mam Wahawil, wal iskꞌulchꞌanil hakꞌul yebꞌ hakꞌulal chitaahapno satkanh,
haꞌ tzet chawala chij isbꞌa masan chiꞌahapno xol moyan.
6 Wal istoholal chawatxꞌe ekꞌbꞌal yibꞌanh nimeta witz,
haxa chejbꞌanile chawal xin, hakaꞌ ha haꞌ kaw nahat yehayto yich.
Mam Wahawil, hach chawil anma, chatanhenpaxo ej no noqꞌ.
7 ¡Mamin, kaw saqꞌalkano iskꞌulchꞌanil hakꞌul, hakaꞌto ay haxikꞌ,
yalanh yenhel haxikꞌ tuꞌ xin chiskol isbꞌa yuninal ebꞌnaj winaj!
8 Kaw chinohkano iskꞌul anma yu isyaxilal ay yul hawatut,
kat hawaqꞌni ha haꞌ yukꞌuꞌ yinh huneꞌ ha haꞌ kaw saqꞌalkanoj.
9 Yuto tawinh chiꞌilcha huneꞌ ha haꞌ chiꞌaqꞌni qꞌinale,
yu issajilqꞌinal chawaqꞌ jetanh, yuxin chijilanh issajilqꞌinal.
10 Mamin, sunilbꞌal tzꞌayik chawaqꞌ iskꞌulal hakꞌul yebꞌ istoholal,
tet makta kach ohtanheni yebꞌ tet makta kꞌul yanma.
11 Mamin, mach chachah ta chinisxanhobꞌtanhehan ebꞌnaj loloꞌ chute isbꞌa.
Machojabꞌ chinistzumbꞌekꞌojan ebꞌnaj txꞌoj.
12 ¡Bꞌey tuꞌ aykꞌay ebꞌnaj txꞌoj!
¡Xaꞌaykꞌaykano ebꞌnaj yinh hunelnhe! ¡Matxa xin chiꞌahwano ebꞌnaj!