Txah chiqꞌanni ta chiskolilo Komam ischejabꞌ tet ebꞌnaj ayko ishowal yinh
Salmo tzꞌibꞌnhebꞌilkano yu yaꞌ rey David
35
Mam Wahawil, kajwahanh yinh ebꞌnaj ayko ishowal winhan,ako howal yinh ebꞌnaj chiꞌaniko howal winhan.
2 Ikanh chꞌen escudo,
chꞌen chawako hawenheloj, kat hawul kolwal winhan.
3 Kat hawinikanh chꞌen lanza, kat hawaqꞌni howal yinh ebꞌnaj chintzumbꞌenikꞌojan.
Hal tet wanmahan: «Haninan hakolomal,» kachi.
4 Ebꞌnaj chiyoche kinispotxꞌoꞌkamojan,
yebꞌ ebꞌnaj chinani istxꞌojal winhan,
elojabꞌkanh ebꞌnaj yebꞌ sukchahojabꞌto yul iswiꞌ,
kat yaykꞌay yul isqꞌabꞌ txꞌixwilal.
5 Lahanojabꞌ chiꞌeliko ebꞌnaj hakaꞌ isqꞌal teꞌ chꞌim chiyijto jaqꞌeqꞌ.
Qꞌojlaxojabꞌkanayo ebꞌnaj yu yángel Komam Jahawil.
6 Qꞌejholojabꞌilo isbꞌeh ebꞌnaj yebꞌ xin kaw yolqꞌajojabꞌkanh;
tzumbꞌelaxojabꞌikꞌo ebꞌnaj yu yángel Komam Jahawil.
7 Machi inmulan, yajaꞌ yayo ebꞌnaj latzꞌabꞌ yul inbꞌehan.
Machi inmulan, yajaꞌ iswatxꞌe ebꞌnaj huneꞌ holan yunhe waykꞌayan yul.
8 ¡Mamin, aykꞌayojabꞌ ebꞌnaj yinh isyaꞌtajil!
¡Haꞌojabꞌ ebꞌnaj chiꞌaykꞌay yul islatzꞌabꞌ ayayo yu,
yaqꞌabꞌ elo ebꞌnaj istxꞌixwilal!
9 Hak tuꞌ chu waqꞌni tzalaho wanmahan yinh Komam Jahawil,
yuto haꞌ chinkolnilojan.
10 Sunil inbꞌajilan chalni hakaꞌ tiꞌ:
«Mam Wahawil, ¿mak hunuxa hakaꞌ hach tiꞌ?
Hach chakol makta matzet ayko yipo yanma,
yebꞌ makta mebꞌaꞌ, yebꞌ makta machi yip, yebꞌ makta chiꞌetalaxi,» kinchihan.
11 Chiꞌahwejna ebꞌnaj leqꞌtiꞌwom,
kat isqꞌambꞌen ebꞌnaj yinh tzettaj ye tuꞌ mach wohtajojan.
12 Haꞌ istxꞌojal chaqꞌ ebꞌnaj ispaj selelo iskꞌulal chinwatxꞌehan,
yunhe bꞌiskꞌulal chiꞌeliko wanmahan.
13 Hayet chiyabꞌilni ebꞌnaj, chitzꞌay inkꞌulan yinh ebꞌnaj,
chiwanikojan xilqꞌape yet bꞌiskꞌulal winhan, kat wokan txahloj,
mach chinwaꞌan; machi xin inbꞌejan intxahlihan yinh ebꞌnaj.
14 Yet chinekꞌan kaw bꞌiskꞌulal wehan yinh ebꞌnaj,
hakaꞌ hunu wamigohan, maka hunu wuxhtajan,
maka inmiꞌan bꞌay chitzꞌay inkꞌulan.
15 Yajaꞌ yet yul isyaꞌtajil wibꞌanhan iskutxbꞌako isbꞌa ebꞌnaj,
yok ebꞌnaj tzebꞌo winhan hakaꞌtanhe nan konhobꞌal hinan,
yebꞌ mach ohtabꞌilo hinan; kinismaqꞌnihan ebꞌnaj.
16 Aqꞌlax ekꞌoyaꞌ wanmahan yu ebꞌnaj,
kinisbꞌuchnihan ebꞌnaj, kaw xin how yuteko sat ebꞌnaj winhan, isnhetxꞌla yeh ebꞌnaj winhan.
17 Mamin, ¿hayebꞌtom tzꞌayik chiꞌaqꞌlax ekꞌoyaꞌ wanmahan?
Kolinan yul isqꞌabꞌ ebꞌnaj hakaꞌ noꞌ bꞌalam chiꞌekꞌi.
18 Chiwalan yuchꞌandios tawet yinh sat hakonhobꞌ kaw nimajalkanoj.
¡Chaxhinbꞌitnhenan sata hunteqꞌan anma tiꞌ!
19 Machojabꞌ chitzala ebꞌnaj ayko ishowal winhan yilni isyaꞌtajil chihul wibꞌanhtiꞌan,
yebꞌpaxo machojabꞌ chimutzꞌla sat ebꞌnaj tonhe ayko ishowal winhan.a
20 Hunteqꞌan ebꞌnaj tuꞌ maxhtaj aqꞌankꞌulal chissayikꞌo ebꞌnaj,
wal xin haꞌ yalni ebꞌnaj leqꞌtiꞌal yinh anma aqꞌankꞌulal ye yul konhobꞌ, haꞌ chu ebꞌnaj.
21 Nimejal yute ebꞌnaj ishajni istiꞌ istzotel winhan, yalni ebꞌnaj:
«Haꞌ kaw isbꞌaqꞌ kosatanh maꞌilni isyaꞌtajil bꞌay ayko naj,» xhi ebꞌnaj.
22 ¡Mam Wahawil, kaw chawil tzet chinutelaxan.
Mach chaxhkan tukno Mamin. Mach chachhitzilo inkꞌatanhan!
23 ¡Hach inDiosalan, ahanhwano Mamin,
ilo hawayanh, watxꞌe istoholal winhan, kolwahanh winhan!
24 Hach chawil yinh tzet chinelikojan Mam Wahawil,
yuto hach tiꞌ istoholalnhetikꞌa chawatxꞌe, machojabꞌ chitzebꞌi ebꞌnaj winhan.
25 Machojabꞌ chal ebꞌnaj yul yanma hakaꞌ tiꞌ:
«Haꞌ huneꞌ naj tiꞌ jetxa yehi.
Wal tinanh istanhxalo naj ju yinh kaw hunelnhe,» mach xhihojabꞌ ebꞌnaj.
26 Mamin, haꞌ mak chitzala yinh ej isyaꞌtajil chihul wibꞌanhan,
somchahojabꞌkanh yul iswiꞌ, kat yokkano yinh txꞌixwilal.
Yebꞌ makta niman yelapno chute isbꞌa wibꞌanhan,
kanojabꞌpaxkano yinh txꞌixwilal.
27 Yajaꞌ wal ebꞌnaj chiyoche chinqꞌojihan yinh mak ayko ishowal winhan,
elojabꞌ yaw ebꞌnaj yinh kaw ip yu tzalahilal, kat yalni ebꞌnaj hakaꞌ tiꞌ:
«Kaw aykano yelapno Komam,
kaw choche Komam iskꞌulal yinh ischejabꞌ,» xhihojabꞌ ebꞌnaj.
28 ¡Mamin, yu waqꞌan chiwalikꞌojan ta kaw tohol sunil tzet chawatxꞌe!
¡Sunilbꞌal tzꞌayik chaxhinbꞌitnhehan!