Komam Dios chonhkꞌubꞌani
Salmo tzꞌibꞌnhebꞌilkano yu yaꞌ rey David yet yuteko isbꞌa yaꞌ hakaꞌtanhe sukal sata naj Abimelec
34
Chiwalan kꞌul-la tzotiꞌ yinh Komam Jahawil yinh sunilbꞌal ej tiempo.Hununnhetikꞌa tzꞌayik inbꞌitnhenan isbꞌi Komam.
2 Yinh Komam Jahawil chiwaqꞌ tzalaho wanmahan.
Hayet chiyabꞌen anma kꞌulchꞌan iskꞌul,
kat yaqꞌni tzalaho yanma.
3 Jalaꞌwelo yip iskꞌulchꞌanil iskꞌul Komam Jahawil,
kat jinikanh isbꞌi.
4 Insayilojan Komam Jahawil, intxahlihan tet,
yabꞌen Komam tzet walan, kiniskolnilojan Komam yinh bꞌay ej tet chinxiwan.
5 Haꞌ mak ok tꞌanhan yinh Komam,
kaw tzalahilalnhetikꞌa yehi, machi xin kan yinh txꞌixwilal.
6 Huneꞌ mak kꞌanchꞌan, awi tet Komam, yabꞌen Komam tzet yala,
iskolni Komam tet sunil isyaꞌtajil.
7 Haꞌ mak chiyo isbꞌa tet Komam,
haꞌ yángel Komam Jahawil chiꞌilni, kat iskolnilo tet istxꞌojal.a
8 Ilwej, kat heyohtanheniloj ta kaw kꞌul Komam Dios.
¡Saqꞌal yet mak chikawxi iskꞌul yinh Komam!
9 Hex yijem hex tet Komam, iweyo hebꞌa tet,
yuto haꞌ mak chiyo isbꞌa tet Komam machi hunu tzet tiꞌ matzet yul isqꞌabꞌ.
10 Haꞌ noꞌ nixhte tzeh bꞌalam chul isyaꞌtajil yinh, kat yaqꞌlen noꞌ wahil,
wal mak chisaynilo Komam sunil tzet ye tuꞌ ay yul isqꞌabꞌ.
11 Hex wuninal, hitzanhwekoj, kat heyabꞌen tzet chiwalan,
kat kexinkuynikanojan yinh tzet chu heyinayo hebꞌa tet Komam.
12 ¿Haꞌ mak choche chiꞌekꞌ niman tiempo yul sat yibꞌanhqꞌinal tiꞌ,
yebꞌ choche yilaꞌ tzalahilal?
13 Huneꞌ mak tuꞌ xin matxahojabꞌ chiyal istxꞌojal,
yebꞌ matxahojabꞌ chiyal leqꞌtiꞌal.
14 Ispohabꞌilo isbꞌa xol istxꞌojal,
kat iswatxꞌen iskꞌulal, kat issaynilo aqꞌankꞌulal, kat yok tzujno yintaj.
15 Haꞌ mak kꞌul isbꞌeybꞌal sata Komam Jahawil,
haꞌ Komam chitanheni, kat yabꞌen Komam tzet chisqꞌana.
16 Haꞌ mak chiwatxꞌen istxꞌojal chayo Komam Jahawil ishowal yibꞌanh,
chistanhtzelo Komam, matxa xin chibꞌina yul sat yibꞌanhqꞌinal tiꞌ.
17 Kaw chabꞌe Komam Jahawil tzet chisqꞌan makta chiwatxꞌen istoholal,
kat iskolnilo Komam tet sunil isyaꞌtajil.
18 Kawil yehiko Komam Jahawil yinh makta chiꞌekꞌyaꞌ yanma yu isyaꞌtajil,
yebꞌ makta chisomcha iskꞌul yu bꞌiskꞌulal, haꞌ Komam chikolni.
19 Haꞌ mak chiwatxꞌen istoholal, waxanhka kaw txꞌiꞌal ej isyaꞌtajil chul yinh,
yajaꞌ haꞌ Komam Jahawil chikolnilo yul isqꞌabꞌ isyaꞌtajil.
20 Haꞌ Komam chitanheni,
machi hunu isbꞌajil tiꞌ chiqꞌahtoj.b
21 Ebꞌnaj chiwatxꞌen istxꞌojal, haꞌtikꞌa istxꞌojal ebꞌnaj tuꞌ chiꞌaqꞌnikamoj.
Haꞌ mak ayko ishowal yinh anma tohol isbꞌeybꞌal chꞌay isyaꞌtajil yibꞌanh.
22 Haꞌ Komam Jahawil chikolni yanma ebꞌnaj ischejabꞌ.
¡Haꞌ mak chikawxi iskꞌul yinh Komam, mach chꞌay isyaꞌtajil yibꞌanh yu Komam!