Chihal-lax kꞌul-la tzotiꞌ yinh Komam Dios watxꞌenhe sat yibꞌanhqꞌinal yebꞌ xin chonhiskꞌubꞌa
33
Hex tohol hebꞌeybꞌal, aqꞌwe tzalaho heyanma yinh Komam Jahawil.Tzetkano saqꞌal isbꞌitni anma kꞌul isbꞌeybꞌal tet Komam.a
2 Aweko teꞌ arpa kat heyaqꞌni yuchꞌandiosal tet Komam Dios.
Bꞌitnanhwe tet Komam yebꞌ teꞌ hakaꞌ kitalaꞌ 10 (lahonhebꞌ) istxꞌanhal.
3 Aweko akꞌ bꞌit tet Komam,
¡kaw kꞌul cheyute hebꞌitnhen Komam yinh kaw tzalahilal!b
4 Yuto kaw tohol Istzotiꞌ Komam, sunil tzet chiswatxꞌe Komam,
haꞌ chiyeniloj ta kaw chisyije Komam yinh tzet chala.
5 Kaw chitzala Komam yinh istoholal yebꞌ yinh iskꞌulal.
Sunil yul sat yibꞌanhqꞌinal tiꞌ ayayo iskꞌulchꞌanil iskꞌul Komam.
6 Yu Istzotiꞌ Komam Jahawil yebꞌ yu xobꞌ istiꞌ Komam watxꞌi satkanh yebꞌpaxo sunil tzet ay satkanh.
Sunil tzet ay satkanh chitzotel yinh yejercito Komam.
7 Haꞌ Komam hunbꞌankanayo haꞌ nimeta mar,
haxa nimeta xabꞌ nahat yehayto yich haꞌ bꞌay chiskꞌubꞌa Komam ha haꞌ.
8 ¡Xiwanhwe tet Komam Jahawil sunil hex ay sat txꞌo txꞌotxꞌ tiꞌ!
¡Iweyo hebꞌa tet Komam hex ay yul sat yibꞌanhqꞌinal tiꞌ!
9 Yuto hayet istzotel Komam, iswatxꞌikano sunil.
Hayet ischejni Komam ta chiwatxꞌi, iswatxꞌikanoj.
10 Haꞌ ej nimeta konhobꞌ mach ohtanheho Komam Jahawil,
sunil tzet choche iswatxꞌeꞌ, mach chij isbꞌa yu haꞌ Komam chꞌetantoj.
11 Yajaꞌ wal tzet chiyoche Komam iswatxꞌeꞌ, chiyij isbꞌa, mach chitanhi;
yebꞌ aynhetikꞌa yinh sunilbꞌal tiempo tzet ay yul yanma Komam tet yuninal anma.
12 Saqꞌal yet nimeta konhobꞌ haꞌ Komam Dios ayko isDiosaloj,
yuto haꞌ Komam sikꞌnhelo huneꞌ konhobꞌ tuꞌ yetoj.c
13 Tꞌanhxayti Komam Jahawil yul satkanh,
yilni Komam iskꞌahol ebꞌnaj winaj.
14 Hata bꞌay ay yehobꞌal Komam chilayti yinh sunil anma ay sat txꞌo txꞌotxꞌ.
15 Haꞌ Komam watxꞌenhe yanma sunil anma,
chilni Komam sunil tzet chiswatxꞌe.
16 Machi hunu naj yahaw konhobꞌ chikolcha yu kaw niman ebꞌnaj yet howal tzujan yintaj.
Mach chikolchapaxo ebꞌnaj kaw ay yip yu ishelanil.
17 Hakpax tuꞌ noꞌ cheh, machi hunu mak chu iskolcha yu noꞌ,
waxanhka kaw ay yip noꞌ, mach chu iskolni noꞌ hunu maka.
18 Yajaꞌ wal Komam, chistanhe makta chiyiyo isbꞌa tet,
yebꞌ makta chikawxi iskꞌul yinh iskꞌulal iskꞌul Komam.
19 Haꞌ Komam chikolni yul isqꞌabꞌ kamikal,
chaqꞌni Komam iskawil yinh istzꞌayikal wahil.
20 Hanhonh tiꞌ yinh Komam chikawxi kokꞌul.
¡Haꞌ Komam chikolwa jinh, haꞌ aypaxiko jenheloj, kat konhiskolni!
21 Yuxin kaw chitzala janma yinh Komam.
Haꞌ isbꞌi Komam kaw tohol, bꞌay ayko janma.
22 ¡Mam Jahawilanh, sunilojabꞌ tiempo ayayo iskꞌulchꞌanil hakꞌul jibꞌanhanh,
yuto tawinh chikawxi kokꞌulanh!