Saqꞌal yet mak chiꞌaqꞌlax nimankꞌulal yinh ismul
Salmo tiꞌ, Masquil, tzꞌibꞌnhebꞌilkano yu yaꞌ rey Davida
32
Saqꞌal yet mak xaꞌaqꞌlax nimankꞌulal yinh sunil ismul yebꞌ yinh istxꞌojal.b2 Saqꞌal yebꞌ mak mach ismul chiꞌilchalo yinh yu Komam Dios,
yebꞌ mach txꞌojo tzet nabꞌil yu.c
3 Yet maxhto chiwalati inmulan tet Komam Dios paxilo wipan,
yu inqꞌajwihan sunilbꞌal tzꞌayik.
4 Yet tzꞌayikal yebꞌ yet aqꞌbꞌalil hawayo yalil haqꞌabꞌ wibꞌanhan.
Hakaꞌ chu istajkanh yaxla cheqꞌanh yu waresma, hak tuꞌ eliko wipan.
5 Yajaꞌ walilojan inmulan tawet, Mamin,
machi xin webꞌahan intxꞌojalan yul hasat. Walnihan hakaꞌ tiꞌ:
«Wal tinanh, chiwalahti inmulan tet Komam,» kinchihan.
Hawaqꞌni nimankꞌulal yinh intxꞌojalan.
6 Yuxin yinh istzꞌayikal isyaꞌtajil chiꞌah yaw sunil ebꞌnaj yijem tawet,
waxanhka kaw chihul isyaꞌtajil hakaꞌ haꞌ elomaꞌ yajaꞌ matxa chiꞌapni haꞌ yinh.
7 Hach tiꞌ inkolomalan chinhakꞌubꞌahan tet istzꞌayikal isyaꞌtajil.
Hoybꞌil hinan yu ej bꞌit chitzotel yinh inkolbꞌanilan hawaqꞌa.
8 Yalni Komam: «Haninan chiwaqꞌan hawohtanheloj,
kat kaxhinkuynihan yinh tzet bꞌehal bꞌay wal hatohi. Haninan chaxhintanhehan.
9 Mach chawute habꞌa hakaꞌ noꞌ cheh maka noꞌ mula mach isnabꞌal.
Noꞌ cheh tuꞌ chito okto chꞌen freno yul istiꞌ noꞌ, katto isyijen noꞌ.
Ta mach xin mach chihitziko noꞌ takꞌatanh,» xhi Komam.
10 Kaw txꞌiꞌal isyaꞌtajil chil ebꞌnaj txꞌoj, yajaꞌ wal ebꞌnaj chikawxi iskꞌul yinh Komam,
hoybꞌilayo ebꞌnaj yu iskꞌulchꞌanil iskꞌul Komam.
11 Hex chewatxꞌe iskꞌulal yebꞌ hex tohol heyanma,
tzalahanhwe yinh Komam, ¡bꞌitnanhwe kaw ip yu tzalahilal!