Yinhnhehojabꞌ Komam Dios chikawxi kokꞌul
Salmo tzꞌibꞌnhebꞌilkano yu yaꞌ rey David tet naj yahaw bꞌit
31
Tawinhnhe Mam Wahawil ayko wanmahan.¡Mamin, machojabꞌ hunelo chinhawakanojan yinh kꞌaykꞌulal!
Kolinan yuto hach tiꞌ istoholalnhetikꞌa chawatxꞌe.
2 Hajbꞌa hatxikin yinh tzet chiwalan, kolinan yinh anhe.
¡Lahan hach hakaꞌ hunu chꞌen niman chꞌen bꞌay chinkol hinbꞌahan.
Hakaꞌ hunu ehobꞌal bꞌay mach chu yok ebꞌnaj chichiwa iskꞌul winhan, tawinhnhe ay kolbꞌanile!
3 Lahan hach hakaꞌ hunu chꞌen nhachꞌen yebꞌ hunu nime nha yet howal.
Yuxin kaw xahan ay habꞌi hawu,
yuxin chinhawijbꞌakꞌojan kat kinhawilnihan.
4 ¡Kolinilojan yul huneꞌ txꞌanh hakꞌ bꞌay ayinikotiꞌan,
yuto hachnhechꞌan inkolomalan!
5 Yul haqꞌabꞌ chiwabꞌenhetojan wanmatiꞌan.
¡Hach hawaqꞌ inkolbꞌanilan Mam Wahawil! ¡Hach tiꞌ isDiosal isyelal!a
6 Chinkajwahan yinh mak chiyiyo isbꞌa tet tioxh, hunteqꞌan machi yelapnoj.
Tawinhnhe Mam Wahawil, chikawxi inkꞌulan.
7 Kaw chintzalahan yu iskꞌulchꞌanil hakꞌul winhan,
kaw hawohta isyaꞌtajil chiwaqꞌlehan, yebꞌ isbꞌiskꞌulal ye wanmahan.
8 Mach chinhawakojan yul isqꞌabꞌ ebꞌnaj ayko ishowal winhan,
hawayo wojan yul huneꞌ ehobꞌal kaw nimajal sat.
9 Tzꞌayojabꞌ hakꞌul winhan, Mam Wahawil, yuto ayinikojan yinh isyaꞌtajil.
Chipáxilo yip inmujlubꞌalan yu bꞌiskꞌulal,
yebꞌpaxo wanmahan yebꞌ innimanilan.
10 Lanhan intanhilojan yu isyaꞌil yebꞌ yu oqꞌil.
Lanhan istanhilo innimanilan yu isyaꞌtajil inwatxꞌehan,
lanhan ispaxilo yip inbꞌajilan.
11 Tet ebꞌnaj ayko ishowal winhan machi welapnojan yul sat ebꞌnaj,
kat kinisbꞌuchnihan anma ayayo inkawilalan.
Sunil mak ohtanhe hinan chitxꞌixwilo wetan.
¡Makta chinilnihan yul bꞌeh chiꞌelkanh wetan yu xiwkilal!
12 Hunelnhe kinalaxkanojan, hakaꞌtanhe kamom inxahan yul sat,
lahan hinan hakaꞌ hunu txꞌotxꞌ xhalu pohnaxatoj.
13 Yuto chiwabꞌehan ta kaw txꞌiꞌal anma chibꞌuchwa winhan,
bꞌajxanhetuꞌwal chintohan chinxibꞌtelaxan.
Chishunbꞌa isbꞌa anma kat islahtiꞌnhen isbꞌa kinispotxꞌnihan.
14 Yajaꞌ wal hanintiꞌan Mam Wahawil,
tawinhnhe chikawxi inkꞌulan, yuxin chiwalan hakaꞌ tiꞌ:
«Hach tiꞌ inDiosalan,» kinchihan.
15 Mamin, yul haqꞌabꞌ ayko inkawilan.
Kolinan tet ebꞌnaj ayko ishowal winhan,
yebꞌ chintzumbꞌenikꞌojan.
16 Hulujabꞌ isqꞌaqꞌal hasat winhan,
hanin kinhachejabꞌ intiꞌan. ¡Kolinan yu iskꞌulchꞌanil hakꞌul!
17 Mach chinhawakojan yinh txꞌixwilal, Mam Wahawil.
Wal xin haꞌojabꞌ ebꞌnaj chiwatxꞌen istxꞌojal, haꞌ chawako yinh txꞌixwilal. ¡Tanhojabꞌ ebꞌnaj bꞌay tzꞌinan, bꞌay ay kamom!
18 Kanojabꞌkano ebꞌnaj leqꞌtiꞌwom yinh sukal,
ebꞌnaj chibꞌuchwahi, ebꞌnaj chiyahwa yinh ebꞌnaj chiwatxꞌen iskꞌulal.
19 ¡Mamin, hanta iskꞌulal hakꞌul yinh makta chiyiyo isbꞌa tawet!
¡Hanta iskꞌulal chayelo tet mak chikawxi iskꞌul tawinh sata anma!
20 Chawebꞌalo ebꞌnaj bꞌay ewan, bꞌay ayach, chakolni ebꞌnaj tet ebꞌnaj chinahni istxꞌojal yinh.
Chawako ebꞌnaj yul hawatut, chatanhen ebꞌnaj tet ebꞌnaj chibꞌuchwahi.
21 Hal-laxojabꞌ kꞌul-la tzotiꞌ yinh Komam
yuto hantanhe iskꞌulal iswatxꞌe winhan,
bꞌey huneꞌ konhobꞌ kaw ay yip.
22 Mamin, yinh istzꞌayikal isyaꞌtajil,
ekꞌ yinh innabꞌalan ta kinhanahulnhetojan,
yajaꞌ yet inqꞌannihan ta chinhakolan hawabꞌen wawihan.
23 Hex yijem hex tet Komam Dios, tzalahanhwe yinh Komam.
Haꞌ mak tohol yanma tanhebꞌil yu Komam,
yajaꞌ wal ebꞌnaj chiyikanh isbꞌa kaw how chu yaqꞌni Komam ispaj selel tet.
24 Sunil hex chikawxi hekꞌul yinh Komam,
aweko heyip, kat heyiqꞌni yip heyanma.