Bꞌit bꞌay chiꞌaqꞌlax yuchꞌandiosal yu iskol Komam tet kamikal
Salmo tzꞌibꞌnhebꞌilkano yu yaꞌ rey David
30
Mamin, chaxhinbꞌitnhehan yuto makinhakolan.Mach hawaqꞌ hamanil tet ebꞌnaj ayko ishowal winhan yok tzebꞌoj.
2 Mam Wahawil, hach inDiosalan, inqꞌanan tawet ta chaxhkolwa winhan, wanhchahan hawu.
3 Mamin, kinhakolan yul isqꞌabꞌ naj kamikal,
hawaqꞌni inkawilan, mach kinhachahtojan xol anma kamom.
4 Hex yetxa Komam heyehi bꞌitnhewe bꞌit tet Komam.
Bꞌitnhewe isbꞌi Komam kaw ay yelapnoj.
5 Yuto hunepnhechꞌan chaqꞌ ishowal Komam, wal iskꞌulchꞌanil iskꞌul yinh sunilbꞌal tiempo aya.
Ta bꞌiskꞌulal je yinh aqꞌbꞌalil, haxa yet sahabꞌ sakꞌayal tzalahilalxa jehi.
6 Kaw tꞌinhan wehikojan yul isqꞌabꞌ Komam Dios, yuxin walan hakaꞌ tiꞌ: «Machi hunu mak tiꞌ chinaqꞌni aykꞌayojan,» kinchihan.
7 Mamin, yu iskꞌulchꞌanil hakꞌul winhan yuxin kaw tꞌinhan wehikojan,
yajaꞌ hayet hawebꞌan habꞌa wetan yok huneꞌ xiwkꞌulal winhan,
wokan yinh kꞌaykꞌulal.
8 Mam Wahawil, tawetnhe chiꞌahwawan,
tawetnhe chintxahlihan.
9 Qꞌinalo ta chinkaman kat inmujlaxan,
¿tzettaxka chiwiqꞌan yinh? ¿Chimyu kaxhisbꞌitnhen anma xaꞌok pojojal?
¿Chimyu yalnilo yinh tzettaj iskꞌulal chawatxꞌe? ¡Machoj!
10 Mamin, abꞌe tzet chinqꞌanan, tzꞌayojabꞌ hakꞌul winhan. ¡Mamin, kolwahanh winhan!
11 Kinkanhalwihan yu tzalahilal yu hakꞌulal isselelo oqꞌil.
Xahawilo hunteqꞌan xilqꞌape yet bꞌiskꞌulal ayko winhan,
hawaniko xilqꞌape yet qꞌinh winhan yinh tzalahilal.a
12 Yuxin mach chinkantuknojan.
¡Mamin, hach inDiosalan, chinbꞌitnhehan bꞌit chiꞌaniko hamay,
kat walnihan ta kaw ay hawelapno yinh sunilbꞌal ej tiempo!