Aykano yelapno Komam Jahawil yebꞌ yip Komam
Salmo tzꞌibꞌnhebꞌilkano yu yaꞌ rey David
29
Hex ay hex yul satkanh, bꞌitnhewe isbꞌi Komam Jahawil,bꞌitnhewe isbꞌi Komam yu aykano yelapno Komam yebꞌ yip Komam Jahawil.
2 Aweko isqꞌaqꞌal yip isbꞌi Komam Jahawil hakaꞌ kaw yehi.
Iweyo hebꞌa tet Komam kaw saqꞌalkanoj, machi istxꞌojal yinh.
3 Chiꞌabꞌelax yul isnuqꞌ Komam Jahawil yibꞌanh ha haꞌ.
¡Kaw aykano yelapno Komam, haꞌ Komam chiꞌaqꞌni nhirlaho kꞌuh!
¡Chiꞌabꞌelax yul isnuqꞌ yibꞌanh haꞌ mar, haꞌ kaw nahat yehayto yich yebꞌ kaw nimajal sat!
4 Chiꞌabꞌelax yul isnuqꞌ Komam yinh kaw ip. Kaw chikꞌay kokꞌul jabꞌeni.
5 Chiqꞌahto teꞌ cedro yet chiꞌel yaw Komam.
¡Haꞌ yul isnuqꞌ Komam chiqꞌahnito teꞌ cedro ay bꞌey txꞌotxꞌ Líbano!
6 Chiyaqꞌbꞌilo Komam witz Líbano yebꞌ witz Sirión.
Hakaꞌ yah tꞌujla noꞌ tzehla wakax yebꞌ noꞌ winaj wakax xoltelajil,
hak tuꞌ isbꞌili witz yu Komam.
7 Yet chiꞌawi Komam Jahawil chiꞌelti xaj qꞌaꞌ yul istiꞌ.
8 Hayet chiꞌawi Komam chibꞌili txꞌotxꞌ desierto.
¡Haꞌ Komam chꞌaqꞌnibꞌilo txꞌotxꞌ desierto bꞌey Cades!
9 Hayet chiꞌawi Komam chiqꞌahto ej teꞌ hih,
matxa xin hunu teꞌ qꞌebꞌtaj chikan linhno ayto isxaj yu Komam.
Yul Yatut Komam sunil mak chihalni ta kaw kꞌul Komam.
10 Haꞌ Komam Jahawil chichejni nime yaxnhabꞌ.
Haꞌ Komam Rey kaw yahawil yekoj Tzꞌonhan yul yehobꞌal yinh sunilbꞌal tiempo.
11 Haꞌ Komam Jahawil chꞌaqꞌni yip iskonhobꞌ.
Haꞌ Komam chiꞌanayo isyaxilal yibꞌanh iskonhobꞌ, chaqꞌni aqꞌankꞌulal tet.