Txah bꞌay chiqꞌanlax iskolwal Komam yebꞌ chibꞌitnhelaxi yu chispajtze Komam
Salmo tzꞌibꞌnhebꞌilkano yu yaꞌ rey David
28
¡Mam Wahawil, hach huneꞌ chꞌen chꞌen bꞌay inkol hinbꞌahan!¡Tawetnhe chiꞌahwawan! ¡Mach chamanhkꞌo tzet chinqꞌanan tawet,
yuto ta mach chapajtze tzet chinqꞌanan, ayinxakojan istzꞌajo ebꞌnaj kamnaxa!
2 Mamin, abꞌe tzet chiwalan yet chiꞌahwawan tawet,
yet chiwinikanhan inqꞌabꞌan yul hawatut.
3 Mach chinhatanhtzelojan yinta ebꞌnaj txꞌoj,
machojabꞌ lahan chintanhan yebꞌ ebꞌnaj chiwatxꞌen istxꞌojal.
Hunteqꞌan ebꞌnaj tuꞌ chitzotel yinh aqꞌankꞌulal tet yet anmahil,
yaj wal yanma ebꞌnaj xin nohna yu istxꞌojal.
4 Pajtze istxꞌojal ebꞌnaj tuꞌ, Mamin.
Haꞌtikꞌa istxꞌojal chiswatxꞌe ebꞌnaj, haꞌ chawaqꞌ ispaj selelo tet ebꞌnaj.
5 Yuto hunteqꞌan ebꞌnaj tuꞌ matxa chisnati ebꞌnaj tzettaj hawatxꞌe Mam Jahawil.
Yuxin chatanhtzelo ebꞌnaj, matxa xin chiꞌahwanoj.
6 ¡Hal-laxojabꞌ tzotiꞌ kꞌul yinh Komam Jahawil,
yuto mayabꞌe Komam tzet manqꞌanan tet!
7 Haꞌ Komam Jahawil, inkolomalan,
haꞌ ayko wenhelojan hakaꞌ hunu chꞌen escudo, kaw aykano yip.
Yinhnhe Komam chikawxi inkꞌulan, haꞌ kolwa winhan yuxin kaw chitzala wanmahan.
Yu inbꞌitan yuxin chiwaqꞌ bꞌinaꞌojan isbꞌi Komam.a
8 Haꞌ Komam Jahawil ayko yipo iskꞌul iskonhobꞌ.
Haꞌ Komam chikolwa yinh yaꞌ rey sikꞌbꞌililo yu, haꞌ Komam iskolomal yaꞌ.
9 Mamin, kol hakonhobꞌ. Ayo hakꞌulal yibꞌanh makta hawetxa yehi;
tanhe kat hawilni yinh sunilbꞌal ej tiempo.