Komam Jahawil intzejtahan yebꞌ xin inkolomalan
Salmo tzꞌibꞌnhebꞌilkano yu yaꞌ rey David
27
Haꞌ Komam Jahawil intzejtahan, haꞌpaxo inkolomalan,yuxin machi mak bꞌay wal inxiwan. Haꞌ Komam chiꞌaqꞌni yip wanmahan.
¿Maktaxka tet chinxiwan?
2 Hayet isbꞌulbꞌako isbꞌa ebꞌnaj txꞌoj winhan,
yebꞌ ebꞌnaj ayko ishowal winhan, yunhe kinistanhtzenkanilojan ebꞌnaj yalni,
yajaꞌ xin lekta ebꞌnaj, yaykꞌaykano ebꞌnaj.
3 Waxanhka hunbꞌulan ebꞌnaj aqꞌom howal chinhoynayojan,
mach chixiw wanmahan. Waxanhka chiꞌalaxiko howal winhan kaw matzet chal inkꞌulan.
4 Ay huneꞌ tzet ye tuꞌ xin inqꞌanan tet Komam Jahawil,
haꞌnhe xin chinsayan, haꞌ ton huneꞌ tiꞌ: Ta hunun tzꞌayik ayinnhetikꞌaktojan yul Yatut Komam Jahawil yulbꞌal itzitz hinan,
yu intzalakojan wilnihan issaqꞌalil Komam.
5 Hayet chihul istzꞌayikal isyaꞌtajil, haꞌ Komam chinkꞌubꞌanan yul yatut.
Haꞌ Komam chinkolnihan, hakaꞌtanhe chinyakanhan yibꞌanh hunu niman chꞌen.
6 Hak tuꞌ xin chinay tꞌanhnojan yibꞌanh ebꞌnaj hoyaniko winhan.
Chiwaqꞌnihan inxahanbꞌalan tet Komam yul yatut,
kat inbꞌitnhenan isbꞌi Komam Jahawil yinh tzalahilal.
7 ¡Mam Wahawil, tawetnhe chiꞌahwawan,
abꞌe tzet chiwalan, tzꞌayojabꞌ hakꞌul winhan!
¡Pajtze tzet chinqꞌanan tawet!
8 Chitzotel wanmahan, chalni wetan: «Sayilo Komam Dios,» xhi.
Yuxin chaxhinsayilojan, Mam Wahawil.
9 ¡Mamin, mach chawebꞌato hasat wetan!
¡Mach chinhawintanhenkaniltojan yu hahowal hanin hachejabꞌ intiꞌan!
Hachnhechꞌan hach chaxhkolwa winhan,
mach chinhabꞌejkanojan inchukilan,
hach inDiosalan yebꞌ inKolomalan.
10 Waxanhka chinbꞌejlaxkanojan yu inmaman yebꞌ yu inmiꞌan,
yaj hach chinhakꞌubꞌahan, Mam Wahawil.
11 Mam Wahawil, yelo bꞌeh wetan,
ijbꞌa hinan yinh isbꞌelal istoholal,
yunhe yilni ebꞌnaj ayko ishowal winhan.
12 Mach chinhabꞌejtzokojan yul isqꞌabꞌ ebꞌnaj ayko ishowal winhan,
yuto chiꞌahwejna ebꞌnaj hobꞌom tzotiꞌ winhan,
yebꞌ ebꞌnaj istxꞌojalnhetikꞌa chiswatxꞌe.
13 Wal xin paxmi wipan ta mach waytojan yul wanmahan,
ta chiwilan iskꞌulchꞌanil iskꞌul Komam Jahawil winhan,
yul sat yibꞌanhqꞌinal tiꞌ yinh sunilbꞌal ej tiempo.
14 ¡Yinhnhehojabꞌ Komam Jahawil chaxhechmali!
¡Iqꞌ yip hawanma, mach chaxhpax tawintaj!
¡Hoꞌ, yinhnhehojabꞌ Komam Jahawil, chikawxi hakꞌul!