Istxah mak chiꞌekꞌ yinh istoholal
Salmo tzꞌibꞌnhebꞌilkano yu yaꞌ rey David
26
Il yinh tzet chinelikojan, Mamin, yuto hanintiꞌan yinhnhe istoholal chinekꞌan.Machi xin chikabꞌkon inkꞌulan tawinh,
wal xin tawinhnhe chikawxi inkꞌulan.
2 Mam Wahawil, il tzet chꞌekꞌ yul wanmahan,
yuto hach hawohtaj tzet chꞌekꞌ yinh innabꞌalan yebꞌ yinh wanmahan.
3 Aynhetikꞌako iskꞌulchꞌanil hakꞌulal yinh insatan yebꞌ yinh innabꞌalan,
kaw xin yijem hinan yinh hayelal.
4 Mach hunelo tiꞌ inhunbꞌa hinbꞌahan yebꞌ ebꞌnaj chalni leqꞌtiꞌal,
yebꞌ ebꞌnaj chal isbꞌa kꞌulal.
5 Mach chischah inwiꞌan yet chiskutxbꞌan isbꞌa ebꞌnaj txꞌoj.
Mach hunelo kinpisian yebꞌ ebꞌnaj chiwatxꞌen istxꞌojal.
6 Chinokan intxꞌahaꞌ inqꞌabꞌan chiyeniloj ta machi inmulan.
Chiwochehan Mam Wahawil,
chinhitzikojan bꞌay chꞌaqꞌlax xahanbꞌal tawet.
7 Kat kaxhinbꞌitnhenan yu waqꞌnihan yuchꞌandiosal tawet,
kat walnikꞌojan ej iskꞌulal chawatxꞌe.
8 Mam Wahawil, kaw chintzalahan yinh hawatut bꞌay ay hach,
bꞌay ay isqꞌaqꞌal hawip.
9 Mach chakꞌotzbꞌa inkawilan yinta ebꞌnaj mulum.
Machojabꞌ lahan chinelikojan hakaꞌ ebꞌnaj potxꞌwawom.
10 Hunteqꞌan ebꞌnaj tuꞌ hanhkꞌanhetikꞌa istxꞌojal chiswatxꞌe isqꞌabꞌ ebꞌnaj,
montemilo melyu ebꞌnaj.
11 Yaj hanintiꞌan chinbꞌelwihan yinh istoholal.
¡Kolinan, tzꞌayojabꞌ hakꞌul winhan!
12 Linhan hinan bꞌay tꞌinhan wehikojan.
Haꞌ bꞌay chiskutxbꞌa isbꞌa anma, haꞌ tuꞌ chinbꞌitnhehan Komam Jahawil.