Chisqꞌan yaꞌ rey David ta Komam Dios chiꞌijbꞌani chꞌaqꞌni nimankꞌulal Komam yinh yebꞌ chikꞌubꞌani
Salmo tzꞌibꞌnhebꞌilkano yu yaꞌ rey David
25
Mam Wahawil, tawetnhe chꞌahilo inkꞌulan intxahlihan.2 Hach inDiosalan, tawinhnhe chikawxi inkꞌulan.
Machojabꞌ chꞌel inpixanan.
¡Machojabꞌ chitzala ebꞌnaj kintzeyenan ebꞌnaj ayko ishowal winhan!
3 Sunilojabꞌ mak chikawxi iskꞌul tawinh, machojabꞌ chisomchakanh yul iswiꞌ.
Wal xin haꞌ mak manhkꞌom tawet haꞌ wal iskankano yinh txꞌixwilal.
4 Yeh bꞌeh wetan, Mamin, kat kinhawijbꞌanan yul bꞌeh hakaꞌ chawoche.
5 Ijbꞌa inikꞌojan yinh isyelal, kat kinhakuynihan,
yuto hach tiꞌ inDiosalan yebꞌ inkolomalan.
Hachnhe chaxhwechmahan yinh hunun tzꞌayik.
6 Mam Wahawil, nati iskꞌulal hakꞌul, Mamin, yebꞌ iskꞌulchꞌanil hakꞌul,
huneꞌ aynhetikꞌa yinh sunilbꞌal ej tiempo.
7 Sunilal inmulan yebꞌ intxꞌojalan yinh intzehalan matxahojabꞌ chanatij.
Nahintijan yu hakꞌulal yebꞌ iskꞌulchꞌanil hakꞌul, Mam Wahawil.
8 Kaw kꞌulchꞌankano Komam Jahawil yebꞌ kaw toholkanoj,
haꞌ Komam chiꞌaniko anma mulum yinh bꞌeh yinh istoholal.
9 Kat yaniko Komam makta chewchotanhe chute isbꞌa isbꞌeybꞌalnhen istoholal.
Chiskuyni Komam ebꞌnaj kꞌul iskꞌul yinh tzet chiswatxꞌe.
10 Sunil chejbꞌanile yet Komam Jahawil chisyelo iskꞌulchꞌanil
yebꞌ isyelal tet mak chiyijen istrato Komam yebꞌ kuybꞌanile.
11 Kaw xahan ay habꞌi hawu, Mam Wahawil,
yuxin chinqꞌanan tawet ta chawaqꞌ nimankꞌulal yinh niman inmulan.
12 ¿Mak najil naj winajil chinanon tet Komam Jahawil?
Haꞌ mak tuꞌ chisyelo Komam tzet bꞌehal wal yinitoj.
13 Kaw kꞌul chꞌekꞌ yilaꞌ naj yinh tzet chꞌaqꞌlax tet naj yu Komam,
haxa yuninal naj chipohchakanh, haꞌ chischah ismajul sat txꞌo txꞌotxꞌ.
14 Kaw chitzala Komam Jahawil yinh mak chinanon tet,
yuto kaw ay yelapno Komam yul sat, kat yaqꞌni Komam istꞌinhanil istzotiꞌ yohtanheloj.
15 Wal hanintiꞌan yinhnhe Komam Jahawil tꞌanhan hinan,
yuto haꞌ Komam chikolnilo wojan yul hakꞌ.
16 Mamin, okanh tꞌanhno winhan, tzꞌayojabꞌ hakꞌul winhan,
yuto kaw inchukilan, yebꞌ ayinikojan yinh isyaꞌtajil.
17 Kaw hunun tzꞌayik ischꞌibꞌ bꞌiskꞌulal yul wanmahan.
Kolinilojan tet hunteqꞌan bꞌiskꞌulal tiꞌ.
18 Mamin, il isyaꞌtajil chiwaqꞌlehan yebꞌ inmunilan,
kat hawaqꞌni nimankꞌulal yinh inmulan.
19 Ilkꞌanabꞌi, hanta ebꞌnaj kaw chichiwa iskꞌul winhan,
yochebꞌal ebꞌnaj chinkamnahan.
20 Mamin, ¡kꞌubꞌa wanmahan, kat kinhakolnilojan!
Mach chinhachayojan yul isqꞌabꞌ txꞌixwilal,
yuto tawinhnhe ayko wanmahan.
21 Chinhakꞌubꞌahan Mamin, yuto kꞌul inbꞌeybꞌalan,
yebꞌ yu iskꞌulal chꞌekꞌ yinh innabꞌalan. Tawinhnhe ayto wechmabꞌalan.
22 ¡Mamin, kólonhilojanh, hanhonh Israel honhtiꞌanh, yinh sunil isyaꞌtajil!