Komam Dios Jahawil kaw aykano yelapnoj
Salmo tzꞌibꞌnhebꞌilkano yu yaꞌ rey David
24
Yet Komam Jahawil ye txꞌo txꞌotxꞌ tiꞌ, yebꞌ sunil tzet ayayo sat txꞌotxꞌ,yetpaxo Komam ye sunil anma yebꞌ sunil ej no noqꞌ ay sat txꞌotxꞌ.
2 Haꞌ Komam watxꞌenheto xeꞌ txꞌotxꞌ,
istzꞌunnayo Komam yibꞌanh haꞌ mar yebꞌ haꞌ nimeta haꞌ.a
3 ¿Maktaxka chu yahto bꞌey wonhan yet Komam Jahawil?
¿Maktaxka chu yehikꞌo yul Yatut Komam,
huneꞌ nha kaw yet Komam yehi?
4 Hanhe mak machi istxꞌojal chiswatxꞌe yu isqꞌabꞌ,
yebꞌpaxo xin saj yanma, haꞌ mak mach chisjahbꞌa isbꞌa tet ej tioxh,
yebꞌ mak mach chiꞌaniko leqꞌtiꞌal.
5 Haꞌ mak tuꞌ chischah iskꞌulal Komam Jahawil,
kat iswatxꞌen Komam istoholal yinh, yuto yinhnhe Komam ay kolbꞌanile.
6 Hak tuꞌ isbꞌeybꞌal makta chisaynikꞌo Komam Dios,
makta chisaynikꞌo yilni Komam,
isDiosal jichmam Jacob.
7 ¡Hex konhobꞌ hajwe hepulta, hunteqꞌan pulta payat watxꞌinaj,
yuto chiꞌokto Komam Dios Jahawil, Komam kaw aykano yelapnoj!
8 ¿Mak xin huneꞌ Jahawil kaw aykano yelapnoj tuꞌ?
Haꞌ ton Komam Dios Jahawil, Komam kaw aykano yip,
Komam kaw aykano ismay; kaw chiqꞌoji Komam yinh howal.
9 ¡Hex konhobꞌ hajwe hepulta, hunteqꞌan pulta payat watxꞌinaj,
yuto chiꞌokto Komam Dios Jahawil,
Komam kaw aykano yelapnoj!
10 ¿Mak xin huneꞌ Jahawil kaw aykano yelapno tuꞌ?
¡Haꞌ ton Komam Dios, Yahawil kaw aykano yip!
¡Haꞌ Komam Jahawil, Komam kaw aykano yelapnoj!