Hanhe iskolwal Komam Dios bꞌay chu iskawxi kokꞌul
Salmo tzꞌibꞌnhebꞌilkano yu yaꞌ rey David tet naj yahaw yinh isnuqꞌal bꞌit, yako naj yebꞌ munlabꞌal yet bꞌit Neginot
61
Mamin, hach inDiosalan,abꞌe tzet chinqꞌanan tawet.
Hajbꞌa hatxikin yet chintxahlihan tawet.
2 Bꞌajxanhetuꞌwal ayinan, walka nahat yul sat yibꞌanhqꞌinal tiꞌ,
tawet chiꞌahwawan. Kaw lanhan ispaxilo yip wanmahan chiwabꞌehan.
Aqꞌinahtojan yibꞌanh hunu chꞌen chꞌen yunhe inkolchahan.
3 Mamin, ayachiko wenhelojan,
lahan hach hakaꞌ hunu torre kaw ay yip bꞌay chinkol hinbꞌahan tet ebꞌnaj ayko ishowal winhan.
4 Mamin, chiwochehan yulnhetikꞌa hawatut ayinan hunun tzꞌayik.
Hach chinhakꞌubꞌahan,
hakaꞌ chu iskꞌubꞌan isbꞌa noꞌ nixhte chiyo yalanh xikꞌ ismiꞌ.
5 Mamin, hach inDiosalan xahawabꞌe tzet waltehan tawet,
hawaqꞌni inmajulan yinta ebꞌnaj kaw ay yelapno habꞌi yul sat.
6 Aqꞌ iskawil yaꞌ rey.a
Kaw txꞌiꞌalojabꞌ habꞌil chꞌekꞌ yaꞌ yul sat yibꞌanhqꞌinal tiꞌ.
7 Yinhojabꞌ sunilbꞌal tiempo chiꞌok yaꞌ yahawil yu hakꞌulal, Mamin.
Tanhe yaꞌ yu iskꞌulchꞌanil hakꞌul yebꞌ isyelal chawala.
8 Mamin, hak tuꞌ xin chinbꞌitnhehan habꞌi yinh sunilbꞌal ej tiempo,
kat inyijenan hunun tzꞌayik tzettaj chiwaltehan tawet.