Komam Dios chu konhiskolni, machi hunuxa
Salmo tiꞌ tzꞌibꞌnhebꞌilkano yu yaꞌ rey David tet naj yahawil yinh isnuqꞌal bꞌit
62
Yinhnhe Komam Dios chixew wanmahan.Tet Komam chititpaxo inkolbꞌanilan.
2 Hanhe Komam chinkolnihan, kat kinyilnihan.
Mach chinaykꞌayan yuto haꞌ Komam chinkꞌubꞌanan.
3 Hex chichiwa hekꞌul winhan,
¿bꞌaqꞌinh chebꞌej ischiwa hekꞌul?
Cheyoche kinheyaqꞌaꞌ aykꞌayojan hakaꞌ hunu bꞌitzꞌabꞌ chꞌay bꞌuynahi,
maka hakaꞌ hunu kꞌubꞌ chipaxtixhna sat txꞌotxꞌ.
4 Hanhe kinheyaqꞌni aykꞌayojan ayko yinh henabꞌal.
Kaw chextzalahi cheyaniko leqꞌtiꞌal, wal hetiꞌ kaw saqꞌal istzotel winhan,
yajaꞌ wal yinh henabꞌal chinhetzꞌaktiꞌnhehan.
5 Yinhnhe Komam Dios chixew wanmahan yuto haꞌ Komam ayko yipo wanmahan.
6 Hanhe Komam chinkolnihan, kat kinyilnihan.
Mach chinaykꞌayan yuto haꞌ Komam chinkꞌubꞌanan.
7 Yul isqꞌabꞌ Komam chitit inkolbꞌanilan yebꞌ kaw ay welapnojan yul sat Komam.
Haꞌ Komam chinilnihan yebꞌ ayko wenhelojan hakaꞌ chꞌen chꞌen.
8 Hex wet konhobꞌ ¡kawxojabꞌ hekꞌul yinh Komam Dios yinh sunilbꞌal ej tiempo!
¡Tzotelanhwe tet Komam yinh hetxah yinh sunil heyanma!
¡Haꞌ Komam chonhkꞌubꞌani!
9 Yinh kaw isyelal, hakaꞌnhe yekꞌ jaqꞌeqꞌ,
hak tuꞌ ye anma, mach chu iskawxi kokꞌul yinh.
Waxanhka qꞌalom maka mebꞌaꞌ qꞌinalo ta chimalelax yul malbꞌal maxhtikꞌam nino yalil, matzet yelapnoj.
10 Mach cheyako istxꞌojal yipo hekꞌul, mach cheyetato hebꞌa yu eleqꞌ.
Ta chexqꞌalombꞌikanh mach cheyako heyanma yinh heqꞌalomal.
11 Hunelnhe tzotel Komam Dios,
kayel wabꞌehan huneꞌ tiꞌ, ta kaw aykano yip Komam.
12 Yebꞌ ta chaqꞌ Komam Dios ispaj selel tet hunun anma hakaꞌtikꞌa tzet chiswatxꞌe hunun.