Haꞌ Komam Dios chiꞌaqꞌni tzalahilal yul yanma anma
Salmo tzꞌibꞌnhebꞌilkano yu yaꞌ rey David yet aykꞌo yaꞌ bꞌey desierto yet Judá
63
¡Mamin, Dios hach, hachnhechꞌan inDiosalan!¡Yet sahabꞌ sakꞌayal chachinsayilojan!
Chach yochepaxo wanmahan hakaꞌ chu yochen txꞌotxꞌ tajin txꞌotxꞌ haꞌ nhabꞌ.
2 Yunhe wilnihan hawip yebꞌ isqꞌaqꞌal hamay,
chiwochehan kach wilaꞌan yul hawatut.
3 Yuto haꞌ iskꞌulchꞌanil hakꞌul ekꞌbꞌal yelapno sata kokawilanh yul sat yibꞌanhqꞌinal,
yuxin chachinbꞌitnhehan, Mamin.
4 Yinh sunilbꞌal tiempo yulbꞌal itzitz hinan,
chiwalan kꞌul-la tzotiꞌ tawinh.
Hayet chintxahlihan tawet chiwakanh inqꞌabꞌan.
5 Kaw chitzala wanmahan tawinh,
hakaꞌ yaqꞌni tzalaho iskꞌul hunu mak yet ayko sat mexha yinh hunu niman qꞌinh.
Mamin, yinh tzalahilal chaxhinbꞌitnhehan yu intiꞌan.
6 Yet aqꞌbꞌalil yet chinwayan chꞌekꞌ innabꞌalan tawinh,
chachinnanitijan.
7 Yuto hach chinhakolan, hach ayachiko wenhelojan,
hakaꞌ chu yenhelnhen noꞌ miꞌe chiyo nixhte yunin, yuxin kaw chintzalahan.
8 Kaw aynhetikꞌako wanmahan tawinh,
mach chinisbꞌejtzohan hawatxꞌqꞌabꞌ.
9 Ebꞌnaj chiyoche kinispotxꞌoꞌan,
chiꞌaykꞌayto ebꞌnaj yul holan bꞌay ay kamikal.a
10 Chiꞌaqꞌlaxkamo ebꞌnaj yu chꞌen espada,
kat iskꞌuxlaxto isnimanil ebꞌnaj yu noꞌ oj.
11 Yajaꞌ wal yaꞌ rey chiyaqꞌ tzalaho yanma yaꞌ yinh Komam Dios.
Sunil mak chaqꞌ bꞌinaho isbꞌi Komam yinh tzet chala, chisbꞌitnhe isbꞌi Komam.
Yajaꞌ wal mak chihalni leqꞌtiꞌal, tonhe tukan hakaꞌto majchebꞌil istiꞌ.