Txah chiqꞌanni ta Komam Dios chitennilo ebꞌnaj chichiwa iskꞌul
Salmo tiꞌ tzꞌibꞌnhebꞌilkano yu yaꞌ rey David tet naj yahawil isnuqꞌal bꞌit
64
Mamin, hach inDiosalan, tawet chiꞌahwawan,abꞌe inbꞌiskꞌulalan chiwalan tawet.
Kolinan yunhe mach chinxiwan tet ebꞌnaj chichiwa iskꞌul winhan.
2 Ebꞌa intojan tet ebꞌnaj txꞌoj yebꞌ tet tzet chiyoche ebꞌnaj iswatxꞌe winhan yinh ewantajil.
Kolinan yinh tzettaj chislahtiꞌnhe ebꞌnaj txꞌoj chiswatxꞌe winhan.
3 Hunteqꞌan ebꞌnaj tuꞌ,
kaw lahan yaqꞌ ebꞌnaj hakaꞌ chꞌen espada kaw qꞌaqꞌiꞌ yeh.
Chalni ebꞌnaj tzotiꞌ kaw txꞌoj winhan,
lahan hakaꞌ teꞌ litꞌ chati ebꞌnaj winhan.
4 Ebꞌabꞌil isbꞌa ebꞌnaj yu islitꞌni anma mach ismul,
chiyeta ebꞌnaj anma tuꞌ, yaj mach chixiw ebꞌnaj.
5 Chiyiptzele isbꞌa ebꞌnaj iswatxꞌen istxꞌojal.
Chislahtiꞌnhe isbꞌa ebꞌnaj yanayo latzꞌabꞌ yinh ewantajil.
Chalni ebꞌnaj: «¿Maktaxka chiꞌilni?» xhi.
6 Chako sunil yanma ebꞌnaj istxumni istxꞌojal chiswatxꞌe.
Kaw tzetkꞌa yitzꞌatil iswiꞌ ebꞌnaj chaqꞌbꞌalnhe yinh istxꞌojal.a
7 Yajaꞌ wal Komam Dios chistanhtzelo Komam ebꞌnaj yu teꞌ litꞌ yet tona nahul ay ebꞌnaj.
8 Haꞌtikꞌa istzotiꞌ ebꞌnaj chꞌaqꞌni aykꞌayoj.
Haꞌ mak chiꞌilni ebꞌnaj chꞌok tzebꞌo yinh ebꞌnaj.
9 Hayet chiyilni anma hakaꞌ tuꞌ, kat yinayo isbꞌa tet Komam Dios,
kat yok tzotelo yinh tzettaj iswatxꞌe Komam,
kat istxumchalo yu yinh tzettaj iswatxꞌe Komam.
10 Haꞌ anma kꞌul isbꞌeybꞌal chiyaqꞌ tzalaho yanma yinh Komam Jahawil,
kat issayni iskolbꞌanil yinh Komam.
¡Hakpax tuꞌ ebꞌnaj chiwatxꞌen iskꞌulal,
chaqꞌ tzalaho yanma ebꞌnaj yinh Komam!