Kaw kꞌul iskꞌul Komam yinh tzet iswatxꞌe
Salmo, tzꞌibꞌnhebꞌilkano yu yaꞌ rey David tet naj yahaw isnuqꞌal bꞌit
65
Mamin, hach isDiosal Sión.Hach tiꞌ hatzan habꞌitnhelaxi.
Hatzan isyijelax tzet chihaltelax tawet.
2 Hach tiꞌ, chawabꞌe txah.
Sunil anma ay yul sat yibꞌanhqꞌinal chihul tasataj.
3 Chonhaykꞌayanh yu kotxꞌojalanh,
yajaꞌ chawaqꞌ nimankꞌulal yinh komulanh.
4 Saqꞌal yet mak chasikꞌiloj, kat hawinito yul hawatut,
haꞌ bꞌey tuꞌ chawaqꞌ iskꞌulal tet.
Yul hawatut tuꞌ, mach istxꞌojal yuto hawet yehi.a
5 Hach koDiosalanh, hach tiꞌ chapajtze tzet chikoqꞌananh.
Chayeni issaqꞌalil istoholal jetanh, hach koKolomalanh.
Sunil anma ay sat txꞌotxꞌ tiꞌ yebꞌ sunil anma ay satakꞌto haꞌ mar tawinhnhe chikawxi iskꞌul.
6 Yu hawip yuxin mach chibꞌili ej witz,
yuto tzꞌunbꞌilayo hawu.
7 Hach chalinhbꞌa haꞌ mar yet chꞌekꞌ tixhla ishujuyal haꞌ,
kat hawaniko anma chiskajle isbꞌa yinh aqꞌankꞌulal yulaj iskonhobꞌ.
8 Hakpax tuꞌ anma nahat yekanto sat txꞌo txꞌotxꞌ tiꞌ,
chixiwi, kat iskꞌay iskꞌul yilni iskꞌulal chawatxꞌe.
Haꞌ anma ay bꞌey yetkꞌulal bꞌay chiꞌahilo tzꞌayik,
yebꞌ anma ay bꞌey bꞌay chito tzꞌayik chꞌawi yu tzalahilal.
9 Ayachiko hawilni txꞌo txꞌotxꞌ,
chawaniti haꞌ nhabꞌ yibꞌanh txꞌotxꞌ, kat yaqꞌni txꞌotxꞌ sat tzꞌunubꞌ.
Hach tiꞌ Mamin, chawati haꞌ nimeta nhabꞌ, kat yel yojomal haꞌ.
Chawaqꞌ chꞌibꞌo ixim trigo, kat yok yul ixim. Hak tuꞌ chawu yinh txꞌotxꞌ.
10 Hach chawaqꞌ chakꞌanbꞌo sat txꞌotxꞌ bꞌay ay istxolal tzꞌunubꞌ,
kat hawakꞌalnhen sat txꞌotxꞌ.
Chawaqꞌ chakꞌanbꞌo sat txꞌotxꞌ yu ej haꞌ nime nhabꞌ,
kat hawanayo isyaxil yibꞌanh sat ej tzꞌunubꞌ.
11 Hach chawayo hayaxil yibꞌanh hunun tiempo chꞌekꞌtoj,
kat hawaniti haꞌ nhabꞌ yet chꞌekꞌ moyan.
12 Sunil ej cheqꞌanh sat txꞌotxꞌ desierto kaw yaxnhetikꞌa,
haxa ej wonhan kaw saqꞌal jilni, chitzalahi.
13 Kaw chinohilo sat cheqꞌanh yu noꞌ meꞌ,
yet chꞌekꞌ noꞌ lowoj. Kat isnohilo sat ej akꞌal yu ixim trigo,
¡kat isbꞌitni kat yel yaw yinh tzalahilal!