Bꞌit tet Komam Dios yu tzettaj kaw ay yelapno chiswatxꞌe
Salmo tet naj yahawil isnuqꞌal bꞌit
66
Bꞌitnanhwe tet Komam Dios yinh tzalahilal,sunil hex ay hex yul sat yibꞌanhqꞌinal tiꞌ.
2 Aweko bꞌit tet Komam Dios,
yuto kaw aykano yelapno isbꞌi Komam.
Aweko bꞌit kaw saqꞌal yok tet Komam.
3 Halwe tet Komam Dios hakaꞌ tiꞌ:
«Mamin, haꞌ tzet chawatxꞌe kaw chikꞌay kokꞌul jilni.
Yu kaw aykano hawip, yuxin sunil ebꞌnaj ayko ishowal tawinh,
chikankano yalanh hawoj.
4 Sunil anma ay yul sat yibꞌanhqꞌinal tiꞌ,
chiyiyo isbꞌa tawet, kat kach isbꞌitnheni, chisbꞌitnhen habꞌi,» kexchi.
5 ¡Titanhwej, kat heyilni tzet iswatxꞌe Komam Dios,
hunteqꞌan kꞌaybꞌalkꞌule iswatxꞌe Komam yinh anma!
6 Ispoh Komam haꞌ mar, ismeltzoniko yinh tajin txꞌotxꞌal.
Yekꞌto ebꞌnaj jichmam yiktabꞌal haꞌ yu yoj,
yu huneꞌ tuꞌ xin kaw chonhtzala yinh Komam.a
7 Haꞌ Komam, chꞌaqꞌni yahawil yinh sunilbꞌal tiempo yebꞌ sunil yip.
Haꞌ Komam chitanhen ej konhobꞌ.
Wal ebꞌnaj manhkꞌom, mach chiꞌilaxkanh ebꞌnaj.
8 ¡Hex konhobꞌ hex tiꞌ, halwe kꞌul-la tzotiꞌ yinh koDiosal.
Aweko bꞌit tet Komam, kat yabꞌelaxi!
9 Haꞌ Komam kꞌubꞌan kokawil, mach konhischah aykꞌayoj.
10 Yuto hach Mamin, konhhawilwehanh,
konhhawatxꞌelojanh hakaꞌ chu issajnhelax chꞌen plata.
11 Konhhabꞌejtzokojanh yul txꞌanh hakꞌ,
hawaniko yalil ijatz jibꞌanhanh.
12 Hach hachah xanhobꞌtanhelaxo kowiꞌanh yu anma.
¡Konhekꞌanh xol qꞌa qꞌaꞌ, yebꞌ xol haꞌ nime haꞌ, yajaꞌ konhhakolilojanh,
hawaqꞌni niman isyaxil jetanh!
13 Chinoktojan yul hawatut,
kat innhusnihan inxahanbꞌalan tawet,
kat inyijenan tzet haltebꞌil tawet wuhan.
14 Chinyijehan tzettaj waltehan tawet,
tzet walan yu intiꞌan yet ayinikojan yinh isyaꞌtajil.
15 Chinnhusan no noqꞌ kaw bꞌaqꞌich tawet yinh xahanbꞌal.
Chiwaltenan noꞌ meꞌ xahanbꞌal tawet.
Chiwanipaxikojan noꞌ winaj wakax yebꞌ noꞌ winaj chiw tawet yinh xahanbꞌalil.
16 ¡Titanhwe hesunil hex chexxiw tet Komam Dios,
kat heyabꞌen tzet chiwalan yinh tzettaj xaꞌiswatxꞌe Komam winhan!
17 Wawtehan Komam winhan,
winikanhan isbꞌi Komam yu intiꞌan.
18 Tato wako wanmahan yinh istxꞌojal machim yabꞌe Komam Dios tzet inqꞌanan.
19 Wal xin kaw yeli yabꞌe Komam tzet inqꞌanan,
ispajtzen Komam intxahan.
20 ¡Kaw saqꞌalkano Komam Dios,
yuto mach ismanhkꞌo Komam tzet inqꞌanan yinh intxahan,
mach ismanhkꞌopaxo Komam iskꞌulchꞌanil iskꞌul winhan!