Chiqꞌanlax tet Komam Dios yaqꞌni ispaj tet ebꞌnaj chiwatxꞌen istxꞌojal
Salmo tiꞌ tzꞌibꞌnhebꞌilkano yu yaꞌ rey David
109
Mamin, hach inDiosalan,machojabꞌ tonhe chawabꞌe yet chintxahlihan tawet.
2 Yuto ebꞌnaj leqꞌtiꞌwom yebꞌ ebꞌnaj chiwatxꞌen istxꞌojal,
chisbꞌalkanh ebꞌnaj leqꞌtiꞌal winhan, chalnipaxo ebꞌnaj istxꞌojal winhan.
3 Hoyaniko ebꞌnaj chichiwa iskꞌul tuꞌ winhan,
tonhe xin chako ebꞌnaj ishowal winhan,
machi inmulan.
4 Wal hinan kꞌulchꞌan chiwute inkꞌulan yinh ebꞌnaj,
wal ebꞌnaj xin haꞌ howal chako ebꞌnaj winhan.
Yajaꞌ chintxahlihan tawet yinh ebꞌnaj Mamin.
5 Haꞌ istxꞌojal chiꞌaqꞌlax wetan selelo iskꞌulal chinwatxꞌehan.
Xahan chiwilan ebꞌnaj, wal ebꞌnaj xin chichiwako iskꞌul ebꞌnaj winhan.
6 Haꞌojabꞌ hunu naj juez kaw txꞌojkanoj chiꞌok ilno yinh tzet chiꞌeliko ebꞌnaj.
Haꞌojabꞌ naj Matzwalil chiꞌok linhno yinh iswatxꞌqꞌabꞌ naj.
7 Haꞌojabꞌ yet ayko ebꞌnaj sata naj juez tuꞌ,
kat iskawxelaxiko ismul ebꞌnaj yibꞌanh.
Hatikꞌahojabꞌ tzet chal ebꞌnaj, haꞌ chiqꞌanni isyaꞌtajil yibꞌanh.
8 Ebꞌnaj tuꞌ hanikꞌnhe tiempo ay iskawil ebꞌnaj yul sat yibꞌanhqꞌinal tiꞌ,
nanxa mak xin chiꞌok yinh ismunil ebꞌnaj.a
9 Haꞌ nixhte yuninal ebꞌnaj chikankano mebꞌaꞌ uninal,
kat iskankano yixal ebꞌnaj hunixal.
10 Haꞌ yuninal ebꞌnaj tuꞌ tonhehojabꞌ chiꞌekꞌ kolohi,
kat isqꞌanni tzet chislo tet anma, kat istzumbꞌelaxilo yul yatut uchkꞌanaxatoj.
11 Sunilojabꞌ tzet ay ebꞌnaj chiyikanilo naj chiꞌaqꞌni chꞌen melyu kꞌamil.
Komon anmahojabꞌ chiꞌelqꞌanto sat istzꞌunubꞌ ebꞌnaj.
12 Machojabꞌ hunu mak chitzꞌay iskꞌul yinh ebꞌnaj,
yebꞌ yinh yuninal ebꞌnaj chikankano mebꞌaꞌ uninal.
13 ¡Tanhojabꞌilo sunil anma titna yinh yuninal ebꞌnaj.
Yebꞌ xin matxahojabꞌ chibꞌina ebꞌnaj sat txꞌo txꞌotxꞌ tiꞌ!
14 Isnabꞌahabꞌti Komam Dios ismul ismam ebꞌnaj.
Machojabꞌ bꞌaqꞌinh chiholaxkanh ismul ismiꞌ ebꞌnaj.
15 Aynhehojabꞌnhetikꞌako ismul ebꞌnaj yinh isnabꞌal Komam.
Matxahojabꞌ mak chinaniti ebꞌnaj sat txꞌo txꞌotxꞌ tiꞌ.
16 Ebꞌnaj tuꞌ mach hunelo tiꞌ tzꞌay iskꞌul ebꞌnaj yinh anma matzet ayko yipo iskꞌul,
anma chewchotanhe chiyute isbꞌa,
yebꞌ anma chaqꞌle isyaꞌtajil.
Wal xin yaqꞌ ebꞌnaj ekꞌoyaꞌ yanma masanta chispotxꞌ ebꞌnaj.
17 Ebꞌnaj tuꞌ ekꞌna yoche ebꞌnaj istzꞌaktiꞌnhelaxi
yuxin tzꞌaktiꞌnhelaxojabꞌ ebꞌnaj yu anma.
Mach yoche ebꞌnaj ta chꞌay iskꞌulal Komam Dios yibꞌanh ebꞌnaj,
yuxin machojabꞌ bꞌaqꞌinh chiqꞌanlax iskꞌulal Komam Dios yibꞌanh ebꞌnaj.
18 Ayojabꞌ tzꞌaktiꞌ yibꞌanh ebꞌnaj, hakaꞌ xil isqꞌap ebꞌnaj chukoj.
Okojabꞌ tzꞌaktiꞌ tuꞌ yul iskꞌul ebꞌnaj yebꞌ yul isbꞌajil ebꞌnaj,
hakaꞌ haꞌ haꞌ maka aceite.
19 Hakaꞌojabꞌ xil isqꞌap yebꞌ issincho ebꞌnaj chuko tzꞌaktiꞌ tuꞌ,
kat yekꞌyaꞌ ebꞌnaj yu
20 Hakojabꞌ tuꞌ chu ispajtzen Komam Dios tet ebꞌnaj chiꞌaniko howal winhan,
yebꞌ ebꞌnaj txꞌoj istzotel winhan.
21 Yajaꞌ wal hach tiꞌ Mamin, hach Wahawilan,
kaw xahan ay habꞌi hawu,
kꞌulojabꞌ chinhawilan. Kolinan yu iskꞌulchꞌanil hakꞌul winhan.
22 Kaw mebꞌaꞌ hinan, yebꞌ kaw ayayo isyaꞌtajil wibꞌanhan.
Kaw yaꞌxa wanmahan yu sunil tuꞌ.
23 Lanhan intanhilojan hakaꞌ iskꞌaykanh yechel hunu tzet ye tuꞌ.
¡Lanhan kinyijnitojan jaqꞌeqꞌ hakaꞌ yijlaxto noꞌ qꞌul xol jaqꞌeqꞌ!b
24 Matxa yip wojan yu matxatikꞌa chinwaꞌan,
lanhan inbꞌajbꞌikanayojan yu matxatikꞌa chinnhochahan.
25 Chinbꞌalaxan kat intzeyelaxan yu anma.
¡Hayet chinyilnihan anma chisbꞌilen iswiꞌ kat istzebꞌi winhan!c
26 ¡Mam Wahawil, hach inDiosalan, kolwahanh winhan!
¡Kolinan yu iskꞌulal hakꞌul!
27 Kat yohtanhenilo anma Mamin,
ta hach kinhakolan yu yip haqꞌabꞌ.
28 Machi wokan ta chinistzꞌaktiꞌnhehan anma,
kachannhe chawayo iskꞌulal wibꞌanhan.
Okojabꞌkano ebꞌnaj yinh txꞌixwilal,
wal hanin hachejabꞌ intiꞌan, ayojabꞌ tzalahilal yinh wanmahan.
29 Ebꞌnaj chichiwako iskꞌul winhtuꞌan,
txꞌixwojabꞌkanh ebꞌnaj.
¡Okojabꞌkano txꞌixwilal yinh ebꞌnaj hakaꞌ hunu xilqꞌape!
30 Hanintiꞌan kaw chiwaqꞌkanojan yuchꞌandios tet Komam yinh sunil wanmahan,
kat inbꞌitnhenan Komam xol txꞌiꞌal anma.
31 Yuto haꞌ Komam ayko yipo iskꞌul anma matzet ayko yipo iskꞌul,
haꞌ Komam chikolnilo yet chikawxelaxiko mule yibꞌanh.