Anma Israel kaw ismanhkꞌo yinh tzet yal Komam Dios
106
¡Jaqꞌaꞌweko ismay Komam Dios!¡Jaqꞌaꞌwe yuchꞌandiosal tet Komam, yuto kaw kꞌulkanoj,
chitzꞌay iskꞌul jinh yinh sunilbꞌal ej tiempo!a
2 ¿Mak hunu anma tiꞌ chu yalni yinh ej kꞌaybꞌalkꞌule xaꞌiswatxꞌe Komam?
¿Mak hunu chu yaniko ismay Komam hakaꞌ kaw yehi?
3 Kaw saqꞌal yet anma chiwatxꞌen istoholal,
hanhetikꞌa iskꞌulal chiswatxꞌe yinh sunilbꞌal ej tiempo.
4 Mam Wahawil, hayet chawatxꞌen iskꞌulal yinh hakonhobꞌ tiꞌ napaxintijan yintaj.
Hayojabꞌiko hinan yinh hanabꞌal yet chachhul hakoloꞌ hakonhobꞌ tiꞌ.
5 Yunhe wilnihan issaqꞌalil yinh anma sikꞌbꞌililo hawu,
kat waqꞌni tzalaho inkꞌulan yebꞌi,
yebꞌ yok inmayan yinta hakonhobꞌ tiꞌ.
6 Hanhonhtiꞌanh jako komulanh hakaꞌ yu yaniko ebꞌnaj komam ichamanh ismul.
Hanhonhtiꞌanh jako komulanh kowatxꞌenanh istxꞌojal.
7 Hayet ay ebꞌnaj jichmamanh bꞌey txꞌotxꞌ Egipto
mach yako ebꞌnaj yinh iskꞌul nimeta kꞌaybꞌalkꞌule hawatxꞌe.
Isnahulnheto ebꞌnaj iskꞌulchꞌanil hakꞌul.
Hayet ay ebꞌnaj bꞌey haꞌ Kajinh Mar yaniko ebꞌnaj ishowal tawinh.b
8 Yajaꞌ xin iskol Komam ebꞌnaj,
isyenilo Komam yip tet ebꞌnaj yuto kaw xahan ay isbꞌi Komam yu.
9 Kachwa Komam yinh haꞌ Kajinh Mar, istajkanh haꞌ,
yekꞌto ebꞌnaj yich haꞌ; kaw xin tajin elkaniko bꞌay ekꞌto ebꞌnaj,
hakaꞌ istajinal txꞌotxꞌ desierto.
10 Hak tuꞌ yu iskolnilo Komam ebꞌnaj
yul isqꞌabꞌ ebꞌnaj ayko ishowal yinh yebꞌ tet yip ebꞌnaj.
11 Hayet yekꞌto ebꞌnaj ayko ishowal yinh ebꞌnaj Israel tuꞌ xol haꞌ,
ishunbꞌaniko isbꞌa haꞌ, ismujikanto ebꞌnaj yalanh haꞌ.
Tanhkanilo ebꞌnaj sunil, machi hunu ebꞌnaj kolchahi.
12 Hayet yilni ebꞌnaj jichmam huneꞌ tuꞌ,
yanayto ebꞌnaj yul yanma yinh tzet haltebꞌilkano yu Komam Dios,
isbꞌitnhen ebꞌnaj Komam.
13 Yajaꞌ xin kaw yinh anhe isnahulnheto ebꞌnaj tzetaj iswatxꞌe Komam tuꞌ.
Machi xin yechma ebꞌnaj yaqꞌni Komam ohtanhelo tzetaj chiꞌekꞌ yinh isnabꞌal tet ebꞌnaj.
14 Hayet ay ebꞌnaj bꞌey txꞌotxꞌ desierto bꞌay kaw tzꞌinan
yaniko ebꞌnaj Komam yinh ilwebꞌal.
Ischilbꞌan ebꞌnaj isqꞌanni tzet choche iskꞌul tet Komam.
15 Yaqꞌni Komam tzet isqꞌan ebꞌnaj tuꞌ,
yajaꞌ lanhantotikꞌa xin, yaniti Komam huneꞌ yabꞌil aqꞌnikamo ebꞌnaj.
16 Hayet ay ebꞌnaj sat txꞌotxꞌ desierto tuꞌ,
ischiwako iskꞌul ebꞌnaj yinh yaꞌ Moisés,
ischiwapaxo iskꞌul yinh yaꞌ Aarón, yaꞌ sikꞌbꞌililo yu Komam.
17 Yuxin to hopna txꞌo txꞌotxꞌ,
istokꞌay naj Datán yebꞌ naj Abiram
yebꞌ ebꞌnaj tzujan yinta ebꞌnaj tuꞌ yich txꞌotxꞌ.
18 Yul huneꞌ qꞌaꞌ yinh ebꞌnaj,
isnhuslaxto sunil ebꞌnaj tuꞌ yu qꞌaꞌ,
yu istxꞌojal ebꞌnaj.
19 Hakpax tuꞌ bꞌey witz Horeb iswatxꞌe ebꞌnaj huneꞌ yechel wakax yinh chꞌen oro istioxhoj,
yinayo isbꞌa ebꞌnaj tet.c
20 Huneꞌ yechel noꞌ wakax chiloni teꞌ telaj,
yako ebꞌnaj selelo isqꞌaqꞌal yip Komam Dios.
21 Isnahulnheto ebꞌnaj Komam Dios,
Komam Iskolomal ebꞌnaj,
Komam yeni nimeta kꞌaybꞌalkꞌule bꞌey txꞌotxꞌ Egipto.
22 Komam yeni nimeta kꞌaybꞌalkꞌule sat txꞌotxꞌ Cam.
Iswatxꞌenpaxo tzetaj chikꞌay kokꞌul jabꞌen bꞌey haꞌ Kajinh Mar.
23 Yal Komam istanhtzeꞌkanilo ebꞌnaj,
yajaꞌ xin tzotel yaꞌ Moisés,d
yaꞌ sikꞌbꞌililo yu Komam, yunhe mach chitanhtzelaxilo ebꞌnaj yu Komam.
Hak tuꞌ yu yekꞌayo ishowal Komam yinh ebꞌnaj.
24 Haxa yet tzujanilxa isyah ebꞌnaj huneꞌ txꞌotxꞌ kaw saqꞌalkanoj.
Mach xin yayto ebꞌnaj yul yanma yinh tzet yalkano Komam.
25 Txꞌoj istzotel ebꞌnaj yinh Komam
yet ay ebꞌnaj yul yatut watxꞌebꞌil yinh qꞌap mantiado.
Machi xin isyije ebꞌnaj ischejbꞌanil Komam.
26 Yuxin yikanh Komam isqꞌabꞌ,
yaqꞌni bꞌinaho isbꞌi yinh tato chitanhkanilo ebꞌnaj sat txꞌotxꞌ desierto tuꞌ.
27 Yalnipaxoj ta haꞌ anma chipohcha yinh yuninal ebꞌnaj
chipujnato xolaj konhobꞌ mach ohtanheho Komam Dios,
kat iskampaxo bꞌey tuꞌ.e
28 Yaniko isbꞌa ebꞌnaj ischejabꞌo tioxh Baal-peor,
iskꞌuxni ebꞌnaj noꞌ chibꞌe chihaltelax tet hunteqꞌan kamom tioxh chihal-lax diosal.
29 Yako ebꞌnaj ishowal Komam yinh iskꞌul yet iswatxꞌen ebꞌnaj istxꞌojal,
yuxin poh huneꞌ yabꞌil xol ebꞌnaj.
30 Yajaꞌ wal naj Finees yayo naj isyaꞌtajil yibꞌanh anma watxꞌen istxꞌojal tuꞌ.
Hak tuꞌ yu yekꞌayo ismul huneꞌ yabꞌil tuꞌ.
31 Kaw xin kꞌul huneꞌ iswatxꞌe naj tuꞌ sata Komam Dios,
haꞌ huneꞌ tiꞌ xin chihal-laxikꞌo yinh sunilbꞌal ej tiempo.f
32 Haxa yet ay ebꞌnaj bꞌey ha haꞌ ay bꞌey txꞌotxꞌ Meriba
yanipaxiko ebꞌnaj ishowal Komam yinh iskꞌul.
Yu istxꞌojal ebꞌnaj yuxin txꞌoj eliko yaꞌ Moisés.
33 Yuto yaqꞌ somchahokanh ebꞌnaj iskꞌul yaꞌ Moisés tuꞌ,
yuxin haꞌ tzotiꞌ mach nabꞌilo yu yaꞌ, haꞌ yal yaꞌ.
34 Mach istanhtzelo ebꞌnaj hunteqꞌan konhobꞌ halbꞌil tet ebꞌnaj yu Komam ta yilal istanhtzeniloj.
35 Wal xin haꞌ huneꞌ yute ebꞌnaj,
ishunbꞌa isbꞌa ebꞌnaj yebꞌ anma mach ohtanhe Komam Dios,
iskuynito ebꞌnaj tzet chiswatxꞌen anma tuꞌ.
36 Yinayo isbꞌa ebꞌnaj tet istioxh anma.
Yu huneꞌ tuꞌ yuxin tit isyaꞌtajil yibꞌanh ebꞌnaj.
37 Yalten ebꞌnaj nixhte iskꞌahol yebꞌ iskutzꞌin
yinh xahanbꞌalil tet ischejabꞌ naj matzwalil.
38 Yilo ebꞌnaj ischikꞌil nixhte iskꞌahol yebꞌ iskutzꞌin mach ismul,
yalten ebꞌnaj ischikꞌil tuꞌ yinh xahanbꞌalil tet istioxh anma ay bꞌey txꞌotxꞌ Canaán
yetaxto txꞌotxꞌ yu ischikꞌil tuꞌ.g
39 Hak tuꞌ yu yetanto isbꞌa ebꞌnaj yu istxꞌojal iswatxꞌe tuꞌ.
Yok ismul ebꞌnaj yul sat Komam Dios.
40 Istit ishowal Komam yinh iskonhobꞌ,
ismanhkꞌonto Komam mak yetxa Komam ye tuꞌ.
41 Yuxin isbꞌejkano Komam Dios ebꞌnaj yul isqꞌabꞌ anma mach ohtanhe Komam.
Yalaxpaxiko ebꞌnaj yul isqꞌabꞌ ebꞌnaj ayko ishowal yinh.
42 Xanhlaxkanayo ebꞌnaj jichmam tuꞌ yu ebꞌnaj ayko ishowal yinh ebꞌnaj,
yilaxkanilo ispixan ebꞌnaj, yokkanto ebꞌnaj yalanh yip ebꞌnaj ayko ishowal yinh tuꞌ.
43 Txꞌiꞌal el iskol Komam ebꞌnaj,
yajaꞌ xin yako ebꞌnaj ishowal yinh tzet yoche Komam iswatxꞌe.
Yinhtikꞌa xin istxꞌojal iswatxꞌe ebꞌnaj tuꞌ aykꞌayi.
44 Yajaꞌ hayet yilni Komam yekꞌyaꞌ ebꞌnaj yinh isyaꞌtajil,
yebꞌ yet yabꞌen Komam isbꞌiskꞌulal ebꞌnaj,
45 isnahniti Komam istrato yaqꞌ tet ebꞌnaj,
ishelni Komam isnabꞌal yinh ebꞌnaj,
yuto kaw hantanhekano iskꞌulal iskꞌul Komam.
46 Yuxin kaw kꞌul il-lax ebꞌnaj yet tzujanilxa yu ebꞌnaj qꞌoji yinh ebꞌnaj yu Komam.
47 Mam Jahawilanh, hach koDiosalanh, kolonhanh.
Kutxbꞌahonhilojanh xolaj konhobꞌ mach kokonhobꞌojanh,
yunhe kobꞌitnhenanh habꞌi kaw aykano yelapnoj,
yebꞌ yunhe kach kobꞌitnhenanh yinh kaw tzalahilal.
48 ¡Jalaꞌwe kꞌul-la tzotiꞌ yinh Komam Dios,
koDiosal hanhonh Israelonh tiꞌ, yinh sunilbꞌal ej tiempo! Yalabꞌ sunil anma Israel hakaꞌ tiꞌ:
Hakojabꞌ tuꞌ. ¡Jaqꞌaꞌweko ismay Komam Dios!