Iskꞌulal iswatxꞌe Komam Dios yinh konhobꞌ Israel
105
¡Aqꞌwe yuchꞌandiosal tet Komam Dios kat hepujbꞌanikꞌo isbꞌi Komam!¡Halwekꞌo tet anma ay yul hunun konhobꞌ tzetaj iswatxꞌe Komam!
2 ¡Bꞌitnhewe salmo tet Komam yu heyaniko ismay!
Kat heyalnikꞌo sunil kꞌaybꞌalkꞌule xaꞌiswatxꞌe Komam.
3 Aqꞌwe tzalaho hekꞌul yinh Komam,
yuto kaw aykano yelapno isbꞌi.
Aqꞌwepaxo tzalaho hekꞌul hex chesayilo Komam.
4 Saywelo Komam yebꞌ yip.
Saywelo Komam yinh sunilbꞌal ej tiempo.
5 Naweti tzetaj kaw aykano yelapno iswatxꞌe
yebꞌ tzetaj chikꞌay kokꞌul jilni.
Nawepaxti chejbꞌanile yakano Komam.
6 Hex tiꞌ yinh yuninal yaꞌ Abraham,
yaꞌ ischejabꞌ Komam titnaj hex, sikꞌbꞌil hexilo yu Komam,
yuninal yaꞌ Jacob heyehi.
7 Haꞌ Komam Jahawil, haꞌ koDiosal.
Jahawil yeko Komam yinh sunil yul sat yibꞌanhqꞌinal.
8 Waxanhka txꞌiꞌal tiempo chiꞌekꞌtoj,
mach chisnahulnheto Komam tzetaj yaltekano yet istꞌinhbꞌankano istrato.
9 Huneꞌ trato yaqꞌkano tet yaꞌ Abraham
yebꞌ tzet yalkano yet yaqꞌni bꞌinaho isbꞌi tet yaꞌ Isaac.a
10 Yet yaqꞌnikano tet yaꞌ Jacob yokkano leyal,
iskankano istratoho Komam Dios yinh sunilbꞌal tiempo jet hanhonh israelonh tiꞌ.
11 Yet yalni Komam:
«Chiwaqꞌan txꞌotxꞌ Canaán tawet,
haꞌ txꞌotxꞌ chiwaqꞌan hamajuloj,» xhi Komam.b
12 Kaw xin haywanhnhechꞌan ebꞌnaj
yebꞌ xin hakaꞌta mach yeto ebꞌnaj txꞌotxꞌ.
13 Yuto el ebꞌnaj sat txꞌotxꞌ Canaán tuꞌ,
isto ebꞌnaj ehoyo yul hunteqꞌanxa nan konhobꞌal yebꞌ yulaj txꞌotxꞌ nime konhobꞌ.
14 Kaw xin ilbꞌil ebꞌnaj yu Komam mach ischah Komam etalax ebꞌnaj,
yuxin yayo Komam isyaꞌtajil yibꞌanh ebꞌnaj yahaw konhobꞌ,
yalni Komam hakaꞌ tiꞌ:
15 «Matzet cheyute hunteqꞌan sikꞌbꞌililo wuhtiꞌan.
Mach cheyetapaxo ebꞌnaj inchejabꞌtiꞌan,» xhi Komam.c
16 Yati Komam huneꞌ wahil yibꞌanh txꞌo txꞌotxꞌ tuꞌ,
matxatikꞌa xin tzet chislo anma.
17 Yajaꞌ yet maxhto chihul huneꞌ wahil tuꞌ,
ischejnito Komam yaꞌ José sata ebꞌnaj;
yaꞌ José tuꞌ txonhlaxto chejabꞌoj.d
18 Yaqꞌni lahwo chꞌen cadena yoj yaꞌ José, yalaxikto yaꞌ yul preso.
19 Masanta yinh tzꞌayikal bꞌay yij isbꞌa tzet yal yaꞌ, yet isyenilo Komam ta yel tzet yal yaꞌ tuꞌ.e
20 Lahwi tuꞌ yalni naj isreyal txꞌotxꞌ niman konhobꞌ tuꞌ ta chiꞌilaxilti yaꞌ José yul preso.f
21 Yaniko naj rey yaꞌ istanhemalo yinh sunil tzet ay yul yatutg
yebꞌ yahawil yinh sunil tzet aya.
22 Yok yaꞌ yahawilo yinh ebꞌnaj iswiꞌehal yul konhobꞌ tuꞌ,
iskuyni yaꞌ ebꞌnaj ichamta winaj ay yul konhobꞌ tuꞌ yinh helanile.
23 Lahwi tuꞌ yapni ebꞌnaj Israel,
ebꞌnaj iskꞌahol yaꞌ Jacob bꞌey Egipto,
yehayo ebꞌnaj hakaꞌ nan konhobꞌal bꞌey tuꞌ,
sat istxꞌotxꞌ naj Cam.h
24 Kaw yaqꞌ pohchahokanh Komam ebꞌnaj bꞌey tuꞌ,
kaw xin ekꞌbꞌal yip ebꞌnaj sata ebꞌnaj ah Egipto tuꞌ.
25 Yajaꞌ xin ok ishowal ebꞌnaj ah Egipto yinh ebꞌnaj Israel,
ebꞌnaj iskonhobꞌ Komam, yuto hak tuꞌ yoche Komam,
yok ebꞌnaj yetano ebꞌnaj ischejabꞌ Komam.
26 Lahwi tuꞌ issikꞌnilo Komam yaꞌ Moisés yebꞌ yaꞌ Aarón ischejabꞌoj,
ischejnito Komam ebꞌyaꞌ.i
27 Isyeni ebꞌyaꞌ yechel yip Komam Dios bꞌey Egipto,
yebꞌ nimeta kꞌaybꞌalkꞌule sat istxꞌotxꞌ naj Cam.j
28 Yati Komam huneꞌ niman qꞌejholo yet tzꞌayikal,
yajaꞌ xin maxhtikꞌa yabꞌe ebꞌnaj tuꞌ Istzotiꞌ Komam Dios.k
29 Ismeltzoko Komam sunil ha haꞌ ay yul ismajul Egipto tuꞌ chikꞌal,
iskamilo sunil noꞌ kay ay xol haꞌ.l
30 Nohilo sunil yul txꞌotxꞌ Egipto tuꞌ yu noꞌ pahtzaꞌ,
sunil bꞌay pohchakanh noꞌ,
ahto noꞌ sat istxꞌat naj isreyal Egipto tuꞌ.m
31 Tzotelnhe Komam yul noꞌ us hakaꞌ yekꞌ ijon moyan, yulpaxo noꞌ ukꞌ.
Sunil yul ismajul txꞌotxꞌ Egipto nohilo yu noꞌ.n
32 Yaniti Komam nimeta sajbꞌat yebꞌ xaj qꞌa qꞌaꞌ selelo haꞌ nhabꞌ yibꞌanh anma.
33 Yetanto chꞌen sajbꞌat yebꞌ qꞌa qꞌaꞌ tuꞌ teꞌ higuera yet teꞌ uva,
yebꞌ sunil teꞌ qꞌebꞌtaj.o
34 Tzotelnhe Komam, yul noꞌ qꞌul.
Kaw hantanhekano noꞌ, matxa chibꞌischa noꞌ.
35 Islohnito noꞌ sunil tzꞌunubꞌ ay sat txꞌotxꞌ Egipto,
istanhkanilo sunil teꞌ telaj islohnito noꞌ.p
36 Yaqꞌnikamo Komam isbꞌabꞌel iskꞌahol ebꞌnaj Egipto tuꞌ.q
37 Lahwi tuꞌ yinilo Komam iskonhobꞌ sat txꞌotxꞌ Egipto.
Kaw txꞌiꞌal chꞌen oro yebꞌ chꞌen plata ay yul isqꞌabꞌ ebꞌnaj yet yel bꞌey tuꞌ,
machi xin hunu ebꞌnaj yaꞌay xol ebꞌnaj.
38 Kaw tzalakanh anma ah Egipto yet yel ebꞌnaj Israel,
yuto kaw xaxiw anma tuꞌ tet ebꞌnaj.r
39 Haxa yet ayxako ebꞌnaj yinh isbꞌel yaniti Komam huneꞌ moyan,
yunhe yenhelnhen ebꞌnaj.
Haxa yet aqꞌbꞌalil xin yati Komam huneꞌ qꞌaꞌ yunhe ismujli yinh ebꞌnaj.s
40 Isqꞌan ebꞌnaj tzet chislo tet Komam,
yaniti Komam noꞌ ahomtzꞌikin iskꞌuxuꞌ ebꞌnaj.
Yul satkanh tit tzet chislo ebꞌnaj yu Komam,
yaqꞌni Komam noho iskꞌul ebꞌnaj.t
41 Isqꞌaxpo Komam huneꞌ chꞌen niman chꞌen yelti ha haꞌ yul iskꞌul chꞌen,
yekꞌ yojomal haꞌ sat txꞌotxꞌ desierto hakaꞌ ej haꞌ nime haꞌ.
42 Hak tuꞌ yute Komam,
yuto isnahti sunil tzet kaw ay yelapno yaltekano tet ischejabꞌ,
haꞌ ton yaꞌ Abraham.
43 Hak tuꞌ yu yinilo Komam iskonhobꞌ sikꞌbꞌililo yu,
yinh kaw tzalahilal yul konhobꞌ Egipto.
44 Yaqꞌni Komam istxꞌotxꞌ hunteqꞌan nime konhobꞌ tet ebꞌnaj.
Yaqꞌnipaxo Komam sat istzꞌunubꞌ hunteqꞌan konhobꞌ tuꞌ tet ebꞌnaj.u
45 Hak tuꞌ yute Komam yunhe isyijen ebꞌnaj chejbꞌanile yebꞌ kuybꞌanile yakano Komam.
¡Hal-laxojabꞌ kꞌul-la tzotiꞌ yinh Komam Dios!