Chistanhe Komam sunil tzet watxꞌebꞌil yu
104
¡Yinh sunil wanmahan chiwakojan hamay Mam Wahawil!Mamin, hach inDiosalan, kaw niman hawelapnoj.
Hach tiꞌ kaw aykano isqꞌaqꞌal hawip yebꞌ kaw chitzejtzoni,
hakaꞌ xil haqꞌap yekoj.
2 Hoyaniko issajilqꞌinal tawinh.
Hach hawatxꞌe satkanh,
halebꞌanto hakaꞌ chu islehbꞌalaxto hunu qꞌap mantiado.a
3 Hach watxꞌenhe hawatut yibꞌanh ej ha haꞌ.
Chachekꞌ yibꞌanh ej moyan xol jaqꞌeqꞌ,
hakaꞌta hacarruaje ye moyan tuꞌ.b
4 Haꞌ jaqꞌeqꞌ yebꞌ xaj qꞌa qꞌaꞌ chisyije tzet chawala,
hakaꞌta hachejabꞌ yekoj.
5 Hach hatzꞌunayo txꞌo txꞌotxꞌ yibꞌanh isxeꞌal,
yunhe mach chibꞌili txꞌotxꞌ.c
6 Hayet yichebꞌanil, haꞌ niman mar majchenhenayo txꞌo txꞌotxꞌ tiꞌ,
hakaꞌta xil isqꞌap txꞌotxꞌ yehiko haꞌ.
Nohnayo ha haꞌ yibꞌanh ej witz.
7 Yajaꞌ hayet hatzotel tet haꞌ, isyijen haꞌ tzet hawala,
yel haꞌ yinh anhe yet yabꞌen haꞌ yul hanuqꞌ,
hakaꞌ isbꞌili kꞌuh.
8 Hayet yel haꞌ isto haꞌ yibꞌanh ej witz yebꞌ yibꞌanh ej akꞌal,
yapni haꞌ bꞌay ayxatikꞌa yehobꞌal haꞌ hawu.
9 Hawayo yechel bꞌay kachan yekꞌ haꞌ,
mach xin chipalkꞌon haꞌ yibꞌanh bꞌay yebꞌilkano hawu tuꞌ,
yunhe matxa chismajilo haꞌ sunil sat txꞌo txꞌotxꞌ tiꞌ.d
10 Hach chawati ha haꞌ chiꞌahilo yul isnuqꞌ ha haꞌ,
yebꞌ haꞌ nime haꞌ chiꞌekꞌ xolaj qꞌebꞌtaj.
11 Ha haꞌ tuꞌ chukꞌ noꞌ xoltelajil noqꞌ.
Ha haꞌ chiꞌinilo istajintiꞌal noꞌ xoltelajil burro.
12 Chiswatxꞌe noꞌ chꞌik yatut xolaj isqꞌabꞌ teꞌ qꞌebꞌtaj ayayo istiꞌla haꞌ.
¡Haꞌ tuꞌ chibꞌitni noꞌ xolaj isqꞌabꞌ teꞌ!
13 Ayach yul hawatut bꞌey satkanh,
chahayen ej witz yet chawaniti haꞌ nime nhabꞌ,
chawaqꞌni yaxbꞌolo sat txꞌo txꞌotxꞌ.
14 Chawaqꞌ chꞌibꞌo teꞌ telaj islobꞌoꞌ no noqꞌ,
kat hawaqꞌni chꞌibꞌo tzꞌunubꞌ,
hak tuꞌ chu yaqꞌni txꞌo txꞌotxꞌ tzet chikolohanh.
15 Chawaqꞌ tzet chikolohanh yunhe ay jipanh,
chaqꞌni teꞌ vino tzalaho kokꞌulanh.
Chawaqꞌni aceite kaw xuqꞌ sam,
yunhe janikojanh yinh kosatanh,
kaw xin chisulsun chiꞌeliko kosatanh yu.
16 Chawati haꞌ nhabꞌ yibꞌanh sunil teꞌ qꞌebꞌtaj
yebꞌ yibꞌanh ej te teꞌ cedro hatzꞌun sat txꞌotxꞌ Líbano.
17 Chiswatxꞌe noꞌ nixhte chꞌik yatut xolaj isqꞌabꞌ teꞌ,
kat iswatxꞌen noꞌ cigüeña yatut xol isqꞌabꞌ teꞌ tah.
18 Hawakano nime witz yunhe yekꞌ noꞌ xoltelajil chiw bꞌey tuꞌ.
Hawakano chꞌen nhachꞌen yunhe yebꞌan isbꞌa noꞌ xhik.
19 Hawatxꞌen ixahaw yunhe isbꞌislax tzꞌayik,
wal tzꞌayik yohta tzet orahil chitohi.
20 Chawati qꞌejholo yet aqꞌbꞌalil,
kat yekꞌ noꞌ xoltelajil noqꞌ.
21 Kaw chiꞌel yaw noꞌ bꞌalam yinh tzet chislo,
chisqꞌanni noꞌ tzet chislo tawet.
22 Yajaꞌ haxa yet chiꞌahilo tzꞌayik
kat isto noꞌ iskotbꞌanoyo isbꞌa yul isnhachꞌen.
23 Hayet chisajbꞌiloj kat isto naj munlawom xol ismunil,
haxa yinh qꞌejbꞌiyal xin chimeltzo naj yatut.
24 ¡Mamin, hantanhe tzet hawatxꞌekanoj,
sunil tiꞌ hawatxꞌekano yu hahelanil!
¡Nohna sat txꞌo txꞌotxꞌ tiꞌ yu tzet hawatxꞌe!
25 Hach hawatxꞌe haꞌ niman mar,
kaw nahat yehayto yich yebꞌ kaw nimajalkanoj sat.
Machi isbꞌisil hanta no noqꞌ ay xol haꞌ,
ay noꞌ nimej, ay noꞌ nixhtej.
26 Chiꞌekꞌ teꞌ barco yibꞌanh haꞌ.
Xol haꞌ xin ay noꞌ niman Leviatán hawatxꞌe,
yunhe yekꞌ noꞌ xol haꞌ.e
27 Sunil hunteqꞌan no noqꞌ tiꞌ,
tawinh tꞌanhan noꞌ yechman tzet chislo.
28 Hach chawaqꞌ tzet chislo noꞌ kat yinikanh noꞌ,
chawati haqꞌabꞌ tet noꞌ kat hawaqꞌni noho iskꞌul noꞌ.
29 Tato matxa chikam hakꞌul yinh noꞌ chixiwkanh noꞌ.
Ta chawilo isqꞌinal noꞌ chikam noꞌ,
kat ismeltzoko pojojal.
30 Hayet chawaniti hawespíritu kat yaqꞌni iskawil noꞌ,
kat iswatxꞌipaxilo jilni sat txꞌo txꞌotxꞌ tiꞌ.f
31 Aynhetikꞌa isqꞌaqꞌal yip Komam yinh sunilbꞌal ej tiempo.
Kaw chitzala iskꞌul Komam yinh tzet iswatxꞌekanoj.
32 Hayet chilni Komam txꞌo txꞌotxꞌ tiꞌ,
kat isluylunkanh txꞌotxꞌ.
Hayet chanayo Komam isqꞌabꞌ yibꞌanh ej witz kat yah isnhubꞌal.
33 Yulbꞌal ayinan yebꞌ ay inkawilan yul sat yibꞌanhqꞌinal tiꞌ,
chinbꞌitnihan tet Komam, inDiosalan.g
34 Kaw saqꞌalmi ta chitzala Komam yinh tzetaj chiꞌekꞌ yinh innabꞌalan,
yuto yinhnhe Komam chiꞌilcha intzalahilalan.
35 ¡Haꞌ anma mulum tanhojabꞌilo yul sat yibꞌanhqꞌinal tiꞌ.
Hakpax tuꞌ anma chiwatxꞌen istxꞌojal kꞌayojabꞌpaxokanh!
¡Kaw yinh sunil wanmahan chiwakojan ismay Komam!
¡Jalaꞌwe kꞌul-la tzotiꞌ yinh Komam!