Jaqꞌaꞌweko ismay Komam Dios yu iskꞌulchꞌanil iskꞌul
Salmo tiꞌ tzꞌibꞌnhebꞌilkano yu yaꞌ rey David
103
Kaw chiwaqꞌ tzalaho wanmahan yinh Komam Dioskat wanikojan ismay isbꞌi Komam ay yelapnoj yinh sunil inkꞌulan yebꞌ wanmatiꞌan.
2 Chinbꞌitnihan tet Komam Dios yinh sunil wanmahan.
Sunil iskꞌulal chaqꞌ Komam wetan mach chinnahulnhetojan.
3 Haꞌ Komam chiꞌaqꞌni nimankꞌulal yinh sunil inmulan,
kat kinyaqꞌni kawxojan yet yaꞌay hinan.
4 Haꞌ Komam Dios chinkolnihan yul isqꞌabꞌ naj kamikal.
Chanayo iskꞌulal iskꞌul yebꞌ isyaxilal wibꞌanhan.
5 Haꞌ chiꞌaqꞌni noho inkꞌulan yu sunil iskꞌulal chaqꞌ wetan,
kat kinyaqꞌni tzehbꞌolojan hakaꞌ noꞌ tꞌiw.a
6 Haꞌ Komam Dios Jahawil chiꞌilni yinh tzet chiꞌeliko anma yinh kaw istoholal,
chiyilni Komam anma chiꞌetalax yu ebꞌnaj txꞌoj.
7 Isyelo Komam Dios isbꞌeybꞌal yebꞌ kꞌaybꞌalkꞌule tet yaꞌ Moisés yebꞌ tet anma Israel.
8 Kaw kꞌulkano iskꞌul Komam yebꞌ xin chitzꞌay iskꞌul jinh.
Mach peto chitit ishowal, wal xin kaw nimankano iskꞌul.
9 Mach sunilbꞌalo tiempo chiyayo isyaꞌtajil jibꞌanh yu konhiskachni.
Machi lemanti ishowal jinh yinh sunilbꞌal tiempo.
10 Mach chayo Komam isyaꞌtajil jibꞌanh hakaꞌ kaw komul,
mach chaqꞌ Komam ispaj selel jet hakaꞌ kaw kotxꞌojal.
11 Yinh kaw yeli nimankano iskꞌulchꞌanil iskꞌul yinh makta chixiw tet Komam.
Kaw nimankano iskꞌulchꞌanil iskꞌul tuꞌ hakaꞌ isnahatil yekanh satkanh yibꞌanh txꞌo txꞌotxꞌ tiꞌ.
12 Nahat yakanto Komam komul, hakaꞌ isnahatil yelo bꞌay chiꞌahilo tzꞌayik yinh bꞌay chito tzꞌayik.
13 Ayko Komam yetbꞌiho anma chiyiyo isbꞌa tet. Kaw kꞌul iskꞌul Komam jinh,
lahan hakaꞌ iskꞌulal iskꞌul naj mame yinh iskꞌahol.
14 Yohta Komam tzet yu konhiswatxꞌeni.
Kaw yohta sikꞌlebꞌil tato pojojonh.
15 Wal kokawil yul sat yibꞌanhqꞌinal tiꞌ, mach chinahatli,
lahan hakaꞌ isxumakil teꞌ telaj.
16 Haxa yet chiꞌekꞌ nime jaqꞌeqꞌ kat yay hona isxumakil tuꞌ,
matxa mak xin chiꞌohtanheni bꞌaytuꞌwal ekꞌlenahi.
17 Yajaꞌ wal iskꞌulchꞌanil iskꞌul Komam aynhetikꞌa yinh sunilbꞌal tiempo yinh anma chiyiyo isbꞌa tet.
Wal istoholal chiswatxꞌe Komam aynhetikꞌa tet yuninal anma chiyijen tet Komam.
18 Kaw kꞌul iskꞌul Komam yinh anma chiyijen istrato
yebꞌ mak mach chinahulnheto isyijen ischejbꞌanil Komam.
19 Haꞌ yul satkanh iswatxꞌe Komam istzꞌonhobꞌal.
Yahawil xin yeko yinh sunil.b
20 Hex yángel Komam heye tiꞌ, haweko ismay Komam,
kaw ay heyip aqꞌbꞌil yu Komam, cheyijen tzet chala.
Kaw helan hex hewatxꞌen tzet choche Komam.
21 Sunil hex ay hex yul satkanh, hex ischejabꞌ Komam, aweko ismay Komam,
hex chewatxꞌe yebꞌ cheyije tzet chal iskꞌul.
22 ¡Sunil tzet watxꞌebꞌil yu Komam yebꞌ sunil ayko yalanh yip yaqꞌabꞌpaxiko ismay Komam!
¡Hanintiꞌan chiwakojan ismay Komam yinh sunil wanmahan!