Istxah huneꞌ mak ayayo isyaꞌtajil yibꞌanh
102
Mamin, abꞌe intxahan.Haꞌ tzet chiwaltiꞌan apnojabꞌ yinh hatxikin.
2 Machojabꞌ chawebꞌa habꞌa wetan yet ayinikojan yinh isyaꞌtajil tiꞌ.
Hajbꞌa hatxikin hawabꞌen tzet chiwalan,
kat hapajtzen yinh anhe tzet chinqꞌanan.
3 Lanhan intanhilojan hakaꞌ istanhkanh nhubꞌ.
Kaw lanhan istzꞌato inbꞌajilan chiwabꞌehan hakaꞌ istzꞌato tzaqꞌaqꞌ.
4 Wal wanmahan lanhan ispaxilo yip,
hakaꞌ istajilo teꞌ telaj yu yip qꞌa qꞌaꞌ.
Kaw mach chisje inkꞌulan waꞌoj.
5 Lanhan istajilo innimanilan yu yel wawan.
6 Hakaꞌta lahan hinan hakaꞌ noꞌ pop ay bꞌey txꞌotxꞌ desierto,
noꞌ chiꞌekꞌ xolaj nha uchkꞌanaxatoj.
7 Hayet aqꞌbꞌalil mach chinwayan,
lahan hinan hakaꞌ noꞌ chꞌik chiꞌekꞌ ischukil iswiꞌla nha.
8 Ebꞌnaj ayko ishowal winhan, kaw naunhe chiyaqꞌni ebꞌnaj tako inkꞌulan.
Chaqꞌni bꞌinaho ebꞌnaj inbꞌihan yet chiyalni ebꞌnaj tzꞌak tzotiꞌ.
9 Haꞌ tanh ayko selelo tzet chinlohan.
Haꞌ tzet chiwukꞌan chissom isbꞌa yebꞌ yal insatan.
10 Yu hahowal winhan,
lahwi kinhawinikanhan kinhaqꞌojnayojan.
11 Hakaꞌ yenhel hunu tzet ye tuꞌ, yinh anhe chikꞌayayoj,
hakintuꞌan yul sat yibꞌanhqꞌinal tiꞌ.
Nixhtejal intajkanilojan hakaꞌ istajilo teꞌ telaj.
12 Yajaꞌ wal hach tiꞌ Mamin,
ayachnhetikꞌa yinh sunilbꞌal ej tiempo.
Chaxhbꞌina yinh tohbꞌalqꞌinal.
13 Mamin, ahanhwanoj, kaw tzꞌayojabꞌ hakꞌul yinh konhobꞌ Sión tiꞌ.
Maꞌapni istiempohal hawaqꞌni nimankꞌulal yinh.
14 Yuto ebꞌnaj hachejabꞌ chitzꞌay iskꞌul ebꞌnaj yinh chꞌen chꞌen ay yul konhobꞌ tiꞌ.
Kaw yaꞌ chuko yinh yanma ebꞌnaj yu bꞌiskꞌulal yu matanhtzelaxkanilo konhobꞌ tiꞌ.
15 Hak tuꞌ xin sunil ej nime konhobꞌ,
yebꞌ ebꞌnaj isreyal txꞌo txꞌotxꞌ tiꞌ chixiw tet Komam Dios yebꞌ tet isqꞌaqꞌal yip Komam,
16 yet chiswatxꞌenkanh konhobꞌ Sión yet chihuli yebꞌ chisyeni isbꞌa isqꞌaqꞌal yip.
17 Hayet tuꞌ chabꞌe Komam istxah makta machi bꞌay chikawxi iskꞌul.
Kaw chishajbꞌa istxikin yabꞌen tzet chala.
18 Tzꞌibꞌnhelaxojabꞌkano huneꞌ tiꞌ tet anma chito pitzkꞌahi,
yunhe isbꞌitnhen anma tuꞌ Komam.
19 Hata bꞌey bꞌay kaw nahat yekanh,
bꞌay ay Yatut Komam Dios bꞌey satkanh, chilayti Komam txꞌo txꞌotxꞌ.
20 Chabꞌen isyaꞌtajil chaqꞌle ebꞌnaj ayko preso,
kat iskolnilo Komam ebꞌnaj xahal-laxi ta chiꞌaqꞌlaxkamoj.
21 Yunhe yaqꞌlax bꞌinaho isbꞌi Komam bꞌey Sión,
kat isbꞌitnhelax bꞌey Jerusalén,
22 yet chiskutxbꞌaniko isbꞌa sunil nimeta konhobꞌ ay yul sat yibꞌanhqꞌinal
yunhe yinayo isbꞌa tet Komam.
23 Hakaꞌta yikta wekojan yinh inbꞌelan chiyinilo Komam wipan.
Iskꞌotzbꞌa Komam inkawilan.
24 Yuxin walan tet Komam:
«Mamin, hach inDiosalan, mach chakꞌotzbꞌa inkawilan.
Wal haqꞌinal hach tiꞌ machi bꞌaqꞌinhal chilahwi,» kinchihan.
25 Hataxtikꞌa yet yichebꞌanil hatzꞌunnikanayo isxeꞌal txꞌo txꞌotxꞌ,
hawatxꞌenpaxo satkanh yu haqꞌabꞌ.
26 Haꞌ hunteqꞌan tuꞌ chiꞌapni istzꞌayikal bꞌay chitanhiloj,
yajaꞌ wal hach tiꞌ ayachnhetikꞌa yinh sunilbꞌal ej tiempo.
Txꞌo txꞌotxꞌ yebꞌ satkanh chilahwi hakaꞌ islahwi hunu xilqꞌape.
Hach chahelaꞌ txꞌo txꞌotxꞌ tiꞌ yebꞌ satkanh,
hakaꞌ chu kohelni xil koqꞌap, hak tuꞌ chu hahelnoj.
27 Yajaꞌ wal hach tiꞌ, huneꞌnhetikꞌa haꞌ hach,
machi bꞌaqꞌinhal chilahwi haqꞌinal.
28 Ebꞌnaj yuninal hachejabꞌ chiꞌehikꞌo ebꞌnaj yinh aqꞌankꞌulal.
Haxa anma chipoh yinh ebꞌnaj chiꞌehokꞌo tasataj.