Yal yaꞌ rey ta chiꞌekꞌ yinh istoholal sata Komam Dios
Salmo tiꞌ tzꞌibꞌnhebꞌilkano yu yaꞌ rey David
101
Mamin, chiwalan kꞌul-la tzotiꞌ yinh iskꞌulchꞌanil hakꞌul yebꞌ yinh istoholal chawatxꞌe.Kaw chiwochehan chinbꞌitnihan tawet.
2 Chiwohtanhelojan isbꞌehal istoholal yet chachhul wetbꞌihojan.
Chinekꞌan yinh istoholal wanmahan yul watutan.
3 Machi bꞌaqꞌinhal chiwako wanmahan yinh tzetaj ye tuꞌ mach kꞌuloj.
Mach chiwochehan makta chispohilo isbꞌa yinh iskꞌulal,
mach chinchahan tzꞌonho ebꞌnaj inkꞌatanhan.
4 Mach chiwochehan chiꞌekꞌ istxꞌojal yinh innabꞌalan,
machi hunu istxꞌojal chiwochehan inwatxꞌehan.
5 Haꞌ mak chitzotel yinh ewantajil yinh yet anmahil chinkachwahan yinh.
Haꞌ mak kaw chiyikanh isbꞌa,
yebꞌ kaw chako yanma yinh loloꞌal mach chiwochehan wilaꞌan.
6 Chiwako insatan yinh mak yijem ay sat txꞌo txꞌotxꞌ tiꞌ,
yunhe ye inkꞌatanhan, yebꞌ mak kꞌul isbꞌeybꞌal chiꞌok inchejabꞌojan.
7 Haꞌ ebꞌnaj elqꞌom machi ebꞌnaj chimunla yul inpalaciohan,
machi hunu ebꞌnaj leqꞌtiꞌ chiꞌok insatajan.
8 Haꞌ anma chiwatxꞌen istxꞌojal yul txꞌotxꞌ konhobꞌ tiꞌ,
hunun tzꞌayik intanhtzenilojan.
Haꞌ mak chiwatxꞌen istxꞌojal tuꞌ chiwaqꞌ lahwolojan yul iskonhobꞌ Komam Dios tiꞌ.