16
Yalaxikto Kaxha yet istrato Komam Dios yul Tabernáculo iswatxꞌ yaꞌ rey David, isnhusni ebꞌnaj xahanbꞌal yebꞌpaxo xahanbꞌal yet aqꞌankꞌulal tet Komam. 2 Hayet lahwi yaltenkano yaꞌ David isxahanbꞌal yebꞌ xahanbꞌal yet aqꞌankꞌulal, isqꞌannikanayo yaꞌ isyaxil yibꞌanh konhobꞌ Israel yinh isbꞌi Komam Jahawil. 3 Ischejni yaꞌ David yaqꞌlax hunun ixim nime pan yebꞌ noꞌ chibꞌe yebꞌ teꞌ tajin uva tet ebꞌnaj winaj yebꞌ ebꞌix ix kutxanikoj.4 Yanikaniko yaꞌ rey David ebꞌnaj levita yinh ismunil sata isKaxha Komam Jahawil yu isnahniti ebꞌnaj, chisqꞌanni ebꞌnaj nimankꞌulal yinh ismul Israel, yebꞌ yu isbꞌitni ebꞌnaj tet Komam Jahawil, isDiosal Israel. 5 Naj yahaw yinh bꞌit haꞌ ton yaꞌ Asaf, naj iskabꞌ, haꞌ ton naj Zacarías, tzujan tuꞌ naj Jeiel, naj Semiramot, naj Jehiel, naj Matatías, naj Eliab, naj Benaía, naj Obed-edom, naj Jehiel; haꞌ ebꞌnaj tuꞌ ay issalterio yebꞌ yarpa, haꞌ xin yaꞌ Asaf chiqꞌantzen chꞌen cimbalo. 6 Hakpax tuꞌ ebꞌyaꞌ sacerdote, yaꞌ Benaía yebꞌ yaꞌ Jahaziel, chilannhetikꞌa yoqꞌtzen ebꞌyaꞌ istrompeta sata Kaxha yet istrato Komam Dios.
Bꞌit yu yaqꞌni yaꞌ rey David yuchꞌandiosal tet Komam Dios
7 Haꞌ yinh huneꞌ tzꞌayik tuꞌ xin bꞌabꞌelixto issayniko yaꞌ David, yaꞌ Asaf yebꞌ ebꞌnaj yetbꞌi yinh yijbꞌali yinh bꞌit tet Komam Jahawil, yaniko huneꞌ salmo tiꞌ:
8 «¡Aqꞌwe yuchꞌandiosal tet Komam Jahawil, kat hepujbꞌanikꞌo isbꞌi Komam xolaj anma!
¡Halwekꞌo tet anma ay yul hunun konhobꞌ yinh tzetaj iswatxꞌe Komam!
9 ¡Bꞌitnhewe bꞌit tet Komam yu heyaniko ismay,
kat heyalnikꞌo sunil kꞌaybꞌalkꞌule xaꞌiswatxꞌe Komam!
10 ¡Aqꞌwe tzalaho hekꞌul yinh Komam, yuto kaw aykano yelapno isbꞌi!
¡Aqꞌwepaxo tzalaho hekꞌul hex chesayilo Komam!
11 ¡Saywelo Komam yebꞌ yip! ¡Saywelo Komam,
kat heyinayo hebꞌa sata Komam yinh sunilbꞌal tiempo!
12 Naweti tzetaj kaw aykano yelapno iswatxꞌe, yebꞌ tzetaj chikꞌay kokꞌul jilni.
Nawepaxti tzꞌaktiꞌ halbꞌilkano yu Komam.
13 Hex tiꞌ yuninal yaꞌ Israel, yaꞌ ischejabꞌ Komam,
iskꞌahol yaꞌ Jacob, sikꞌbꞌil hexiko yu Komam.
14 Haꞌ Komam Jahawil, haꞌ koDiosal.
Yahaw Komam yinh sunil yul sat yibꞌanhqꞌinal.
15 Waxanhka txꞌiꞌal tiempo chꞌekꞌtoj,
mach chisnahulnheto Komam tzetaj yaltekano yet istꞌinhbꞌankano istrato.
16 Huneꞌ trato istꞌinhbꞌakano Komam yinh isyelal tet yaꞌ Abraham,
yebꞌ tzet yalkano yet yaqꞌni bꞌinaho isbꞌi tet yaꞌ Isaac.
17 Yaqꞌ Komam istrato tet yaꞌ Jacob yet yokkano chejbꞌanilehal, yutenkaniko isbꞌa yinh kaw yeli.
Iswatxꞌenkano Komam istrato yinh sunilbꞌal tiempo jet hanhonh Israelonh tiꞌ.
18 Yet yalni Komam: “Chiwaqꞌan txꞌotxꞌ Canaán tawet,
haꞌ txꞌotxꞌ chiwaqꞌan hamajuloj,” xhi Komam.a
19 Kaw xin haywanhnhechꞌan ebꞌnaj yebꞌ xin hakaꞌto mach yeto ebꞌnaj txꞌotxꞌ.
20 Yuto el ebꞌnaj sat txꞌotxꞌ Canaán tuꞌ,
isto ebꞌnaj ehoyo yul hunteqꞌanxa nan konhobꞌal yebꞌ yulaj txꞌotxꞌ nime konhobꞌ.
21 Kaw xin ilbꞌil ebꞌnaj yu Komam mach ischah Komam etalaxo ebꞌnaj,
yuxin yayo Komam isyaꞌtajil yibꞌanh ebꞌnaj yahaw konhobꞌ, yalni Komam hakaꞌ tiꞌ:
22 “Matzet cheyute hunteqꞌan sikꞌbꞌililo wuhtiꞌan.
Mach cheyetapaxo ebꞌnaj inchejabꞌtiꞌan,” xhi Komam tet ebꞌnaj.
23 Bꞌitnhewe bꞌit tet Komam Jahawil hesunil ay yul sat yibꞌanhqꞌinal tiꞌ,
elojabꞌiko heyaw yinh Kolbꞌanile chaqꞌ Komam hunun tzꞌayik.
24 Bꞌitnhewe Komam tet sunil anma,
kat heyalni sunil iskꞌulal tzet iswatxꞌe Komam yebꞌ kꞌaybꞌalkꞌule tet sunil anma.
25 Halwekꞌo issaqꞌalil ismay yebꞌ kꞌaybꞌalkꞌule chiswatxꞌe Komam tet ej nixhte konhobꞌ yebꞌ tet txꞌotxꞌ nime konhobꞌ.
Yuto kaw niman yelapno Komam, yuxin yet ay isbꞌitnhelax isbꞌi.
Kaw aykano yelapno Komam sata sunil ej tioxh.
26 Hunteqꞌan ej tioxh ay yul ej konhobꞌ matzet chaliloj,
yajaꞌ wal Komam Jahawil, haꞌ watxꞌenhe tzet ay satkanh.
27 Kaw hoyaniko isqꞌaqꞌal yip Komam yinh. Chisye yip yebꞌ iskꞌulchꞌanil bꞌay aya.
28 Hex konhobꞌlaj, aweko ismay Komam, halwej ta kaw ay yelapnoj yebꞌ ta kaw ay yip.
29 Halwe kꞌul-la tzotiꞌ yinh Komam yuto yet ay yalaxiko ismay Komam hakaꞌ kaw yehi,
istzan Komam yalaxiko ismay.
Hulanhwe yebꞌ heyebꞌalqꞌabꞌ yul yamaqꞌil Yatut Komam.
Okanhwe heyiqꞌayo hebꞌa sata Komam.
30 Xiwojabꞌ tzettaj ye tuꞌ tet Komam yebꞌ sunil txꞌo txꞌotxꞌ.
Haꞌ Komam watxꞌen sunil yul sat yibꞌanhqꞌinal tiꞌ, yuxin machi bꞌili.b
31 Tzalahojabꞌ satkanh yebꞌ txꞌotxꞌ. Halwe tet nime konhobꞌ hakaꞌ tiꞌ:
“Haꞌ Komam Dios, haꞌ Jahawil,” kexchi.
32 Haxonojabꞌ haꞌ mar yebꞌ sunil tzet ay xol haꞌ.
Tzalahojabꞌ txꞌo txꞌotxꞌ yebꞌ sunil tzet chichibꞌ sat txꞌotxꞌ.
33 Tzalahojabꞌpaxo teꞌ qꞌebꞌtaj, haxonojabꞌ isqꞌabꞌ teꞌ yu tzalahilal sata Komam Jahawil,
yuto chul Komam yilaꞌ tzet chiꞌeliko sat yibꞌanhqꞌinal tiꞌ.
34 Cheyaqꞌ yuchꞌandios tet Komam Jahawil, yuto kaw kꞌul Komam.
Wal xin iskꞌulchꞌanil iskꞌul aynhetikꞌa yinh sunilbꞌal tiempo.
35 Elojabꞌiko heyaw tet Komam kat heyalni:
“Mamin, hach koDiosalanh, kolonhanh Mamin.
Kutxbꞌahonhilojanh xolaj konhobꞌ mach kokonhobꞌojanh, yu jalnilojanh habꞌi machi nino istxꞌojal jinh.
Chach kobꞌitnhenanh yu kaw aykano hawelapnoj,” quexchi.
36 ¡Jalaꞌwe kꞌul-la tzotiꞌ yinh Komam Jahawil, isDiosal Israel.
Komam maxhtikꞌa chitanhiloj!» xhi yaꞌ David.
Yalni sunil konhobꞌ: «Yubꞌojabꞌi,» xhi, yet yaniko ismay Komam Dios.
Ebꞌnaj levita, haꞌ ebꞌnaj chitanhen isKaxha Komam
37 Hak tuꞌ yu iskankano yaꞌ Asaf yebꞌ ebꞌnaj yetbꞌi yikꞌalnhe isbꞌa munlaho bꞌay ay isKaxha Komam Jahawil yu yaꞌ rey David, chilannhetikꞌa xin iswatxꞌen ebꞌnaj hatatikꞌa hunun munil yinh hunun tzꞌayik. 38 Haꞌ naj Obed-edom, iskꞌahol naj Jedutún, yebꞌ 68 (waxajebꞌ iskanhwinaj) yuxhtaj, yebꞌ naj Hosa; sunil ebꞌnaj tuꞌ ok tanheno ispultahil yatut isKaxha Komam. 39 Iskanpaxkano yaꞌ sacerdote Sadoc, yebꞌ ebꞌyaꞌ yet sacerdotehal bꞌey Tabernáculo nahat yekanh bꞌey Gabaón. 40 Yu yaqꞌni ebꞌyaꞌ xahanbꞌal hunun sakꞌayal yebꞌ hunun qꞌejbꞌiyal tet Komam Dios Jahawil, chisnhusni ebꞌyaꞌ xahanbꞌal yibꞌanh ismexhahil hakaꞌ yalni ischejbꞌanil Komam Dios tzꞌibꞌnhebꞌilkanoj, chejbꞌanile yaqꞌkano Komam tet konhobꞌ Israel. 41 Iskanpaxkano naj Hemán, yebꞌ naj Jedutún yebꞌ hunteqꞌanxa ebꞌnaj saybꞌiliko chibꞌina isbꞌi tiꞌ, yu isbꞌitni tet Komam Dios Jahawil, yuto kaw kꞌulkano iskꞌul Komam yinh sunilbꞌal ej tiempo. 42 Haꞌ ebꞌnaj tuꞌ yebꞌ naj Hemán, yebꞌ naj Jedutún iqꞌbꞌil istrompeta yebꞌ iscimbalo ebꞌnaj yebꞌ hunteqꞌanxa chꞌen chꞌen chiꞌalaxiko yinh bꞌit tet Komam Dios. Wal ebꞌnaj iskꞌahol naj Jedutún, haꞌ ebꞌnaj ok tanheno ispultahil yatut isKaxha Komam.
43 Lahwi tuꞌ ismeltzo sunil anma yatut, ismeltzopaxo yaꞌ rey David yatut yu isqꞌanni yaꞌ isyaxil Komam Dios yibꞌanh makta ay yul yatut.