Yito yaꞌ David Kaxha yet istrato Komam Dios bꞌey Jerusalén
15
Ischejni yaꞌ David yalaxokanh yatut bꞌey konhobꞌ chiyij isKonhobꞌ yaꞌ David, ischejni yaꞌ iswatxꞌelaxkanh qꞌap mantiado bꞌay chiꞌeh isKaxha Komam Dios. 2 Yalni yaꞌ David: «Haꞌ isKaxhahil istrato Komam, hanhe ebꞌnaj levita chiyu yinikꞌoj, yuxin mach chu yinikꞌo ebꞌnaj mach levitahoj, haꞌ Komam saynheko ebꞌnaj yijnikꞌo isKaxha Komam Jahawil tuꞌ, haꞌ xin ebꞌnaj chimunla yinh sunilbꞌal ej tiempo yinh ismunil Komam,» xhi yaꞌ.3 Iskutxbꞌaniko yaꞌ David sunil anma Israel bꞌey Jerusalén yu yinito isKaxhahil istrato Komam Jahawil yul qꞌap mantiado watxꞌebꞌilxakanh. 4 Iskutxbꞌaniko yaꞌ David sunil ebꞌnaj titna yinh yaꞌ Aarón yebꞌ ebꞌnaj levita. 5 Haꞌ xol ebꞌnaj titna yinh naj Coat 120 ebꞌnaj iskutxbꞌako isbꞌa; haꞌ xin naj Uriel, yahaw yinh ebꞌnaj yikꞌal tuꞌ. 6 Haꞌ xol ebꞌnaj titna yinh naj Merari, 220 ebꞌnaj iskutxbꞌako isbꞌa, haꞌ naj Asaías ok yahawilo yinh ebꞌnaj yikꞌal tuꞌ. 7 Haꞌ xol ebꞌnaj titna yinh naj Gersón, 130 ebꞌnaj iskutxbꞌako isbꞌa, haꞌ xin naj Joel ok yahaw yinh ebꞌnaj yikꞌal tuꞌ. 8 Haxa xol ebꞌnaj titna yinh naj Elizafán, 200 ebꞌnaj iskutxbꞌako isbꞌa, haꞌ xin naj Semaías, haꞌ naj ok yahawilo xol ebꞌnaj yikꞌal tuꞌ. 9 Haꞌ xol ebꞌnaj titna yinh naj Hebrón, 80 (kanhwinaj) ebꞌnaj iskutxbꞌako isbꞌa, haꞌ xin naj Eliel ok yahawilo yinh ebꞌnaj yuxhta tuꞌ. 10 Haꞌ ebꞌnaj titna yinh naj Uziel 112 ebꞌnaj iskutxbꞌako isbꞌa, haꞌ xin naj Aminadab ok yahawilo xol ebꞌnaj yikꞌal tuꞌ.
11 Lahwi tuꞌ yawten yaꞌ David yaꞌ sacerdote Sadoc yebꞌ yaꞌ Abiatar, yawtenpaxo yaꞌ ebꞌnaj levita, haꞌ ton naj Uriel, naj Asaías, naj Joel, naj Semaías, naj Eliel yebꞌ naj Aminadab; 12 yalni yaꞌ tet ebꞌnaj: «Hex tiꞌ yahaw heyeko xol sunil heyikꞌal, haꞌ ton hex levita hex tiꞌ, watxꞌewe hebꞌa yebꞌ sunil heyikꞌal, yuto hex cheyiti isKaxhahil Komam Jahawil, isDiosal Israel bꞌey yatut watxꞌebꞌilxakanh wuhan. 13 Hayet bꞌabꞌelal yati Komam Jahawil, koDiosal isyaꞌtajil koxol, yuto maxhtaj hex heyikꞌo isKaxhahil Komam, mach koyije hakaꞌ yalni chejbꞌanile yaqꞌkanoj,» xhi yaꞌ.
14 Hak tuꞌ yu iswatxꞌen isbꞌa ebꞌyaꞌ sacerdote yebꞌ ebꞌnaj levita tuꞌ yu yijniti ebꞌnaj isKaxhahil istrato Komam Jahawil, isDiosal Israel. 15 Yaniko ebꞌnaj levita te teꞌ chibꞌatxnikanh isKaxha Komam Dios, yaniko iswixikꞌ ebꞌnaj yalanh hakaꞌtikꞌa yu yalni Komam Dios yinh chejbꞌanile, tet yaꞌ Moisés.
16 Yalnipaxo yaꞌ David tet ebꞌnaj yahawil yeko xol ebꞌnaj levita tuꞌ tato chissikꞌilo ebꞌnaj xol yikꞌal tuꞌ mak chibꞌitni yinh tzalahilal, kat yaniko munlabꞌal chꞌokniko yinh bꞌit, teꞌ salterio, teꞌ arpa, yebꞌ cimbalo. 17 Issikꞌnilo ebꞌnaj levita tuꞌ naj Hemán, iskꞌahol naj Joel yebꞌ ebꞌnaj ayto yu isbꞌa yebꞌ naj Hemán tuꞌ. Issikꞌnipaxilo ebꞌnaj yaꞌ Asaf, iskꞌahol naj Berequías yebꞌ ebꞌnaj iskꞌahol naj Merari yebꞌ yuxhtaj, yebꞌ naj Etán, iskꞌahol naj Cusaías; 18 yebꞌ ebꞌnaj yikꞌal ebꞌnaj tuꞌ yinh iskabꞌ majan, haꞌ ton naj Zacarías, naj Jaaziel, naj Semiramot, naj Jehiel, naj Uni, naj Eliab, naj Benaía, naj Maasías, naj Matatías, naj Elifelehu, naj Micnías, naj Obed-edom yebꞌ naj Jehiel. Naj Obed-edom yebꞌ naj Jehiel haꞌ ebꞌnaj chitanhen ispultahil Yatut Komam.
19 Naj Hemán, yaꞌ Asaf yebꞌ naj Etán ebꞌnaj bꞌitnom chiqꞌantzen chꞌen cimbalo, watxꞌebꞌilayo yinh chꞌen bronce. 20 Haxa naj Zacarías, naj Aziel, naj Semiramot, naj Jehiel, naj Uni, naj Eliab, naj Maasías yebꞌ naj Benaía chibꞌitni ebꞌnaj yebꞌ salterio yebꞌ Alamot chꞌijbꞌan ebꞌnaj.a 21 Haxa naj Matatías, naj Elifelehu, naj Micnías, naj Obed-edom, naj Jeiel yebꞌ naj Azazías, haꞌ ebꞌnaj chiꞌijbꞌali yinh bꞌit, chaniko ebꞌnaj teꞌ arpa. 22 Haxa naj Quenanías iswiꞌehal xol ebꞌnaj levita yinh bꞌit, haꞌ naj alaxiko yijbꞌali yinh bꞌit, yuto kaw ay yitzꞌatil iswiꞌ naj yinh bꞌit. 23 Haxa naj Berequías yebꞌ naj Elcana, haꞌ ebꞌnaj chitanhen ispultahil yatut bꞌay ay isKaxhahil istrato Komam. 24 Haxa naj Sebanías, naj Josafat, naj Natanael, naj Amasai, naj Zacarías, naj Benaía, yebꞌ yaꞌ sacerdote Eliezer, haꞌ ebꞌnaj chꞌaniko trompeta sata isKaxha Komam Dios. Haxa naj Obed-edom yebꞌ naj Jehías, haꞌ ebꞌnaj chitanhen ispultahil yatut isKaxhahil Komam.
25 Isto yaꞌ David yebꞌ ebꞌnaj ichamta winaj Israel, yebꞌ ebꞌnaj capitán yinh ebꞌnaj soldado, yinhxa ismilal ebꞌnaj bꞌey inoti Kaxha yet istrato Komam yinh tzalahilal bꞌey yatut naj Obed-edom. 26 Yok Komam Dios yetbꞌiho ebꞌnaj levita iqꞌnhe isKaxha Komam tuꞌ, ispotxꞌni ebꞌnaj hujkꞌonh noꞌ winaj wakax yok hujkꞌonh noꞌ winaj meꞌ xahanbꞌalil tet Komam Jahawil. 27 Wal yaꞌ David ayko qꞌap lino kaw kꞌul xilo isqꞌap yaꞌ yebꞌ ebꞌnaj levita iqꞌnhe Kaxha yet istrato Komam, yebꞌ ebꞌnaj bꞌitnom. Haꞌ xin naj Quenanías chiꞌijbꞌali xol ebꞌnaj bꞌitnom tuꞌ; yinh yaꞌ David tuꞌ, aypaxiko huneꞌ xilqꞌape lino hakaꞌ chaleko, efod isbꞌi. 28 Sunil ebꞌnaj Israel tuꞌ chitzalahi yet yilaxti isKaxhahil istrato Komam Jahawil, chꞌel yaw bocina, trompeta, cimbalo, salterio yebꞌ arpa. 29 Yajaꞌ haxa yet lanhan yapni isKaxhahil istrato Komam Jahawil bꞌey iskonhobꞌ yaꞌ David, istꞌanhxilti ix Mical, iskutzꞌin yaꞌ Saúl yul isventanahil yatut, hayet istꞌanhxilto ix tuꞌ chiꞌah tꞌujla yaꞌ rey David, chikanhalwi yaꞌ yu tzalahilal, wal ix Mical tuꞌ kaw isyah ix yaꞌ David yu huneꞌ tuꞌ.