Yoche yiqꞌato yaꞌ David isKaxhahil istrato Komam Bꞌey Jerusalén
6
Lahwi tuꞌ iskutxbꞌanpaxiko yaꞌ rey David ebꞌnaj Israel, kaw kꞌul yinh howal, iskutxbꞌako yaꞌ 30 (lahonhebꞌ iskawinaj) mil ebꞌnaj soldado tuꞌ. 2 Isto yaꞌ rey David yebꞌ ebꞌnaj soldado bꞌey Baala ayko yul ismajul Judá, ishekꞌni yaꞌ isKaxhahil istrato Komam Dios, bꞌay chiꞌaqꞌlax bꞌinaho isbꞌi Komam Yahawil yinh Sunil, Komam Jahawil eyayo xolbꞌal kawanh querubín linhaniko istiꞌ Kaxha tuꞌ. 3 Haꞌ xin bꞌey yatut naj Abinadab ay bꞌey huneꞌ wonhan, haꞌ tuꞌ ayikto kaxha tuꞌ, yinilti ebꞌnaj teꞌ bꞌey tuꞌ, yanahto ebꞌnaj teꞌ yul huneꞌ carruaje kaw akꞌto. Haꞌ xin naj Uza yebꞌ naj Ahío, ebꞌnaj iskꞌahol naj Abinadab ijbꞌan noꞌ wakax nhikꞌnhe carruaje tuꞌ. 4 Hayet ishekꞌni ebꞌnaj isKaxhahil istrato Komam bꞌey yatut naj Abinadab, bꞌey wonhan tuꞌ, haꞌ naj Ahío bꞌabꞌi sata teꞌ Kaxha tuꞌ. 5 Wal yaꞌ rey David yebꞌ sunil ebꞌnaj Israel tzujan yinta tuꞌ chibꞌitni ebꞌnaj yinh sunil yanma, chitꞌujla yah ebꞌnaj sata Komam Jahawil, chixin yaniko ebꞌnaj teꞌ arpa, teꞌ salterio, chꞌen pandereta, teꞌ suꞌ yebꞌ cimbalo. 6 Haxa yet yapni ebꞌnaj bꞌay chiwatxꞌelaxilo istrigo naj Nacón istxaqꞌmo noꞌ wakax nhikꞌnhe carruaje bꞌay ayahto teꞌ Kaxha tuꞌ, istit sutna teꞌ, istzabꞌni naj Uza teꞌ yunhe machi aykꞌay teꞌ. 7 Istit ishowal Komam Dios yinh naj Uza, yuto istzabꞌ naj teꞌ Kaxha, yaykꞌay naj iskꞌatanh teꞌ, iskamilo naj.8 Kaw xin ok bꞌiskꞌulal yinh yaꞌ rey David, yu kam naj Uza yu Komam Jahawil, yaniko yaꞌ David Pérez-uza, isbꞌi bꞌay kam naj Uza tuꞌ, hakto tuꞌ xin isbꞌi tinanh. 9 Haꞌ yinh huneꞌ tzꞌayik tuꞌ kaw xiw yaꞌ rey David tet Komam Jahawil, yuxin yal yaꞌ hakaꞌ tiꞌ: «Ta hak tuꞌ, ¿tzet kinchihan chiwinitojan Kaxha yet istrato Komam Jahawil tiꞌ yul watutan?» xhi yaꞌ. 10 Hak tuꞌ xin matxa yito yaꞌ David teꞌ Kaxha tuꞌ iskꞌatanh yul konhobꞌ chiyij iskonhobꞌ yaꞌ David; wal xin ischej yaꞌ ilaxoto teꞌ bꞌey yatut naj Obed-edom, naj geteo. 11 Iskankano isKaxhahil istrato Komam oxebꞌ ixahaw bꞌey yatut naj Obed-edom, naj geteo, yanayo Komam Jahawil isyaxil yibꞌanh naj Obed-edom yebꞌ yibꞌanh sunil mak ay yul yatut naj.
Yito yaꞌ David Kaxha bꞌey Jerusalén
12 Apni hal-laxo tet yaꞌ rey David hakaꞌ tiꞌ: «Yayo Komam Jahawil isyaxil yibꞌanh naj Obed-edom yebꞌ yibꞌanh makta ay yul yatut naj yebꞌ yibꞌanh sunil tzet ay naj yu huneꞌ Kaxha tuꞌ,» xhi. Hayet yabꞌen yaꞌ rey David tzotiꞌ tuꞌ, isto yaꞌ yinoti teꞌ Kaxha tuꞌ bꞌey yatut naj Obed-edom, yinito yaꞌ teꞌ yinh tzalahilal bꞌey konhobꞌ chiyij Iskonhobꞌ yaꞌ David. 13 Haxa yet xabꞌelwito ebꞌnaj iqꞌnhe teꞌ tuꞌ wajebꞌ xalabꞌ, yaqꞌni yaꞌ rey David huneꞌ noꞌ wakax, yebꞌ huneꞌ noꞌ winaj meꞌ kaw bꞌaqꞌich xahanbꞌalil tet Komam.
14 Ayko xil isqꞌap ebꞌnaj sacerdote qꞌap efod nabꞌa lino yinh yaꞌ rey David, chixin ah tꞌujla yaꞌ yinh sunil yanma sata Komam Jahawil. 15 Hak tuꞌ yu yinito yaꞌ rey David yebꞌ sunil ebꞌnaj Israel isKaxhahil istrato Komam tuꞌ yinh tzalahilal.
16 Haxa yet yapni isKaxhahil Komam bꞌey konhobꞌ chiyij iskonhobꞌ yaꞌ David, yilnilti ix Mical, iskutzꞌin yaꞌ kamom Saúl yul ventanah tato chiꞌah tꞌujla yaꞌ David sata Komam Dios, isyahnikanh ix yaꞌ.
17 Lahwi tuꞌ yalaxikto Kaxha yet istrato Komam yiktabꞌal huneꞌ qꞌap mantiado yaqꞌ watxꞌe yaꞌ rey David, isnhusni yaꞌ xahanbꞌal tet Komam Jahawil, yaltenpaxo yaꞌ xahanbꞌal yet aqꞌankꞌulal. 18 Hayet lahwi yalten yaꞌ xahanbꞌal tet Komam Dios, isqꞌanni yaꞌ iskꞌulal Komam yibꞌanh konhobꞌ tuꞌ yinh isbꞌi Komam Jahawil, Komam kaw aykano yip. 19 Sunil ebꞌnaj Israel iskutxbꞌa isbꞌa bꞌey tuꞌ, ebꞌnaj winaj yebꞌ ebꞌix ix, aqꞌlax hunun ispan, yebꞌ ischibꞌe, yebꞌ teꞌ tajin uva; lahwi tuꞌ ismeltzo anma yatut.
20 Wal yaꞌ rey David, meltzo yaꞌ yatut yu isqꞌanni yaꞌ iskꞌulal Komam yibꞌanh makta ay yul yatut, yelti ix Mical, yixal yaꞌ ischahnoj, yalni ix tet yaꞌ hakaꞌ tiꞌ:
—Wal tinanh kaw maꞌel hapixan hach isreyal Israel, hayeni hanimanil tet ebꞌix ischejabꞌ ebꞌnaj chimunla tawintaj, txꞌixobꞌal maxawute habꞌa hakaꞌ hunu komon anma, xhi ix tet yaꞌ.
21 Istaqꞌwi yaꞌ tet ix:
—Yeli kinahtꞌujlahan, yajaꞌ sata Komam Jahawil, Komam kinsaynikojan reyalo selelo hamam yebꞌ selelo hanoh, kinyakojan yahawo yinh jet konhobꞌ Israel, iskonhobꞌ Komam Jahawil, yuxin kinahtꞌujlahan sata Komam. 22 Ekꞌbꞌalto xin chito wiyo hinbꞌahan, chiꞌel inpixanan hakaꞌ hawalni tiꞌ, yajaꞌ wal yul sat ebꞌix ix chawal tiꞌ, kaw ay welapnojan, xhi yaꞌ.
23 Wal ix Mical, iskutzꞌin yaꞌ kamom Saúl, hatax yet yalni ix ta txꞌixobꞌal yu yaꞌ David, islinhi yuninwi ix.