Hal-laxikꞌoj ta haꞌ yaꞌ David chꞌok reyal yinh txꞌotxꞌ Israel
5
Lahwi tuꞌ isto sunil hunun majan ebꞌnaj Israel bꞌey Hebrón tzotelo tet yaꞌ David, yalni ebꞌnaj: «Ilkꞌanabꞌi, habꞌajil jehanh, hachibꞌehal jehanh. 2 Yinh kaw yeli haꞌ yaꞌ Saúl ok koreyalojanh, yajaꞌ xin hach hawijbꞌakꞌo ebꞌnaj issoldado yaꞌ yinh howal. Yebꞌpaxo huneꞌxa, haꞌ Komam Jahawil halnikano tawet ta hach chawijbꞌa konhobꞌ Israel, kat hawok isreyaloj,» xhi ebꞌnaj.3 Hul sunil ebꞌnaj ichamtaxa xol ebꞌnaj Israel tzotelo tet yaꞌ David bꞌey Hebrón, iswatxꞌenkanoyo yaꞌ istzotiꞌ yebꞌ ebꞌnaj sata Komam Jahawil. Yalaxayo aceite yibꞌanh iswiꞌ yaꞌ David yet yok yaꞌ reyal. 4 30 (Lahonhebꞌ iskawinaj) habꞌil yaꞌ David yet yok yaꞌ reyal yinh konhobꞌ Israel, wal xin 40 (kawinaj) habꞌil ok yaꞌ reyal. 5 Hujebꞌ habꞌil yok wajebꞌ ixahaw ok yaꞌ isreyalo txꞌotxꞌ Judá, yok 33 (oxlahonhebꞌ iskawinaj) habꞌil ok yaꞌ isreyalo sunil txꞌotxꞌ Israel yebꞌ txꞌotxꞌ Judá bꞌey Jerusalén.
Qꞌoji yaꞌ rey David yinh konhobꞌ Sión
6 Lahwi tuꞌ isto yaꞌ rey David yebꞌ issoldado yanoko howal yinh konhobꞌ Jerusalén, iskonhobꞌ ebꞌnaj jebuseo,a yuto haꞌ ebꞌnaj jebuseo tuꞌ majnheyo txꞌotxꞌ Jerusalén. Yajaꞌ yalto ebꞌnaj jebuseo tet yaꞌ rey David hakaꞌ tiꞌ: «Hach tiꞌ mach chu hawokti yul kokonhobꞌ tiꞌanh, yuto hanhechꞌan ebꞌnaj mach chu yilni yebꞌ ebꞌnaj chikotxxi mach chaxhchaniktij,» xhi ebꞌnaj. (Yal ebꞌnaj hakaꞌ tuꞌ yuto istxum ebꞌnaj tato mach chiqꞌoji yaꞌ rey David yinh iskonhobꞌ ebꞌnaj tuꞌ.) 7 Yajaꞌ qꞌoji yaꞌ rey David yinh konhobꞌ Sión tuꞌ, yuxin chihal-lax yinh konhobꞌ tuꞌ tinanh ta iskonhobꞌ yaꞌ rey David. 8 Hayet maxhto chito ebꞌnaj yaqꞌaꞌ howal yinh konhobꞌ Jebús tuꞌ, yalni yaꞌ rey David tet ebꞌnaj issoldado hakaꞌ tiꞌ: «Sunil mak chito yaqꞌaꞌ howal yinh ebꞌnaj jebuseo, chiꞌahto yul isbꞌeh ha haꞌ chꞌahapno yul konhobꞌ, kat yok ismaqꞌnokamo sunil ebꞌnaj mach chu yilni yebꞌ xin ebꞌnaj chikotxxi; ebꞌnaj tuꞌ chinyahnihan,» xhi yaꞌ David. Yuxin chihal-lax hakaꞌ tiꞌ: «Ebꞌnaj mach chu yilni yebꞌ ebꞌnaj chikotxxi, mach chu yokto ebꞌnaj yul Yatut Komam,» xhi. 9 Lahwi tuꞌ yehayo yaꞌ David yul konhobꞌ, yaniko yaꞌ isbꞌi konhobꞌ Iskonhobꞌ yaꞌ David. Iswatxꞌenkanh yaꞌ kꞌubꞌ yinh ishoyanil konhobꞌ, ichitati bꞌey Milo, yokkanapno yul konhobꞌ.b 10 Kaw xin yiqꞌ yip ismay yaꞌ rey David tuꞌ, yuto Komam Dios Yahawil yinh sunil, ayko yetbꞌiho yaꞌ.
Yati naj rey Hiram ischejabꞌ tet yaꞌ David
11 Naj Hiram isreyal Tiro, ischejti naj ismunlawom munla yinta yaꞌ rey David, yanipaxti naj teꞌ cedro, yebꞌ ebꞌnaj hutxꞌum teꞌ, yebꞌ ebꞌnaj chitzehni chꞌen chꞌen chiꞌokniko yinh kꞌubꞌ; ebꞌnaj tuꞌ xin watxꞌenkanh yatut yaꞌ David. 12 Hak tuꞌ yu istxumnilo yaꞌ David ta haꞌ kaw Komam Jahawil aniko yaꞌ isreyalo konhobꞌ Israel, yiqꞌni yip ismunil yaꞌ yinh reyal tuꞌ, yuto ochebꞌil konhobꞌ Israel yu Komam Dios.
Yuninal yaꞌ David pitzkꞌa bꞌey Jerusalén
13 Haxa yet ayxa yaꞌ rey David bꞌey Jerusalén, yet lahwi yehayo yaꞌ bꞌey Hebrón, yiqꞌni yaꞌ hunteqꞌanxa ebꞌix yixalo, ispitzkꞌa hunteqꞌanxa iskꞌahol yebꞌ hunteqꞌanxa iskutzꞌin yaꞌ. 14 Hak tiꞌ isbꞌi yuninal yaꞌ Pitzkꞌa bꞌey Jerusalén: Naj Samúa, naj Sobab, naj Natán, yaꞌ Salomón, 15 naj Ibhar, naj Elisúa, naj Nefeg, naj Jafía, 16 naj Elisama, naj Eliada yebꞌ naj Elifelet.
Qꞌoji yaꞌ David yinh ebꞌnaj filisteo
17 Hayet yabꞌenilo ebꞌnaj filisteo tato alaxiko yaꞌ David isreyalo Israel, iskutxbꞌan isbꞌa ebꞌnaj, isto ebꞌnaj issayno yaꞌ rey David, yajaꞌ hayet yabꞌenilo yaꞌ huneꞌ tuꞌ, isto yaꞌ iskolno isbꞌa bꞌay chebꞌa isbꞌa ebꞌnaj yet chiꞌok howal. 18 Yapni ebꞌnaj filisteo tuꞌ yanoko howal yinh yaꞌ rey David, iswatxꞌen ebꞌnaj iscampamento bꞌey akꞌal Refaim. 19 Isqꞌambꞌen yaꞌ rey David tet Komam Jahawil hakaꞌ tiꞌ:
—Mamin, ¿chimkintohan waqꞌaꞌan howal yinh ebꞌnaj filisteo tuꞌ? ¿Chimhawako ebꞌnaj yul inqꞌabꞌan? xhi yaꞌ. Istaqꞌwi Komam tet yaꞌ:
—Asiꞌ, kat hawaniko howal yinh ebꞌnaj filisteo tuꞌ yuto chiwakojan ebꞌnaj yul haqꞌabꞌ, xhi Komam.
20 Isto yaꞌ David yanoko howal yinh ebꞌnaj filisteo tuꞌ, isqꞌoji yaꞌ yinh ebꞌnaj bꞌey Baal-perazim, yalni yaꞌ hakaꞌ tiꞌ: «Maspohlikto Komam Jahawil huneꞌ bꞌeh xol ebꞌnaj ayko ishowal winhan, hakaꞌ chu ispolnito haꞌ elomaꞌ isbꞌeh,» xhi yaꞌ. Yuxin Baal-perazim yuteko yaꞌ isbꞌi txꞌotxꞌ bꞌay yu huneꞌ tuꞌ. 21 Isbꞌejnikano ebꞌnaj filisteo istioxh bꞌey tuꞌ, isnhusnito yaꞌ rey David yebꞌ issoldado hunteqꞌan tioxh tuꞌ.
22 Lahwi tuꞌ ismeltzo ebꞌnaj filisteo, iskutxbꞌaniko isbꞌa ebꞌnaj yu yaniko ebꞌnaj howal yinh ebꞌnaj Israel, iswatxꞌenkanh ebꞌnaj iscampamento bꞌey akꞌal Refaim. 23 Isqꞌambꞌen yaꞌ rey David tet Komam Jahawil tato chito yaꞌ yaqꞌaꞌko howal, istaqꞌwi Komam tet yaꞌ:
—Ako howal yinh ebꞌnaj, yajaꞌ mach chachok sata ebꞌnaj, wal xin chehoyayo ebꞌnaj satakꞌti teꞌ balsamera. 24 Haxa yet chawabꞌen isbꞌili istinhni yay oje yibꞌanh iswiꞌ teꞌ balsamera,c kat heyelti yinh ebꞌnaj filisteo, yuto chinbꞌabꞌihan tesataj, kat inpotxꞌnikamojan ebꞌnaj yul iscampamento tuꞌ, xhi Komam.
25 Isyijen yaꞌ rey David hakaꞌ yu yalni Komam Jahawil tet yaꞌ. Ismaqꞌnikamo yaꞌ ebꞌnaj filisteo bꞌey Geba masanta bꞌey Gezer.