4 Wal yaꞌ kamom Jonatán, iskꞌahol yaꞌ Saúl, ay huneꞌ iskꞌahol yaꞌ chiyij Mefi-boset, qꞌahnato isbꞌajil yoj. Hayet howebꞌ habꞌil naj Mefi-boset tuꞌ, yapni isqꞌumal bꞌey Jezreel tato potxꞌlaxkamo yaꞌ Saúl yebꞌ yaꞌ Jonatán yinh howal, yuxin hayet yabꞌen ix chiꞌilni naj Mefi-boset huneꞌ tuꞌ, yelkanh ix yinh anhe yebꞌ naj nichꞌan Mefi-boset, yaykꞌay naj yu ix, hak tuꞌ yu isqꞌahto yoj naj iskabꞌil.

5 Isto naj Recab yebꞌ naj Baana, ebꞌnaj iskꞌahol naj Rimón ah Beerot bꞌey yatut naj Is-boset yinh chumanil, yet kaw ayko yip qꞌaꞌ, yokto ebꞌnaj yul yatut naj Is-boset yet lanhan isway naj yul iscuarto sat istxꞌat. 6 Hayet yapni ebꞌnaj bꞌey yatut naj tuꞌ, haꞌ ix chitanhen ispultahil yamaqꞌil teꞌ nha tuꞌ, lahwinhe iswatxꞌenilo ix ixim trigo, iswaykanh ix, yuxin mach yil ix yokto naj Recab yebꞌ yuxhtaj, haꞌ ton naj Baana, yul nha. 7 Hayet yokto ebꞌnaj yul nha tuꞌ, lanhan isway naj Is-boset yul iscuarto yibꞌanh istxꞌat, ismaqꞌnikamo ebꞌnaj naj, istzokꞌnilto ebꞌnaj iswiꞌ naj. Yinito ebꞌnaj iswiꞌ naj, kaw xin sunilbꞌal huneꞌ aqꞌbꞌal tuꞌ bꞌelwi ebꞌnaj yul isbꞌehal Arabá. 8 Yinito ebꞌnaj iswiꞌ naj Is-boset tet yaꞌ rey David bꞌey Hebrón, yalni ebꞌnaj tet yaꞌ hakaꞌ tiꞌ:

—Mam rey, majitijanh iswiꞌ naj Is-boset, naj iskꞌahol yaꞌ kamom Saúl, yaꞌ aniko howal tawinh, yaꞌ yoche kaxhispotxꞌoꞌ, wal tinanh xin haꞌ Komam Jahawil pajtzen tet yaꞌ Saúl yebꞌ tet iskꞌahol yinh tzet kach yute tuꞌ, xhi ebꞌnaj.

9 Istaqꞌwi yaꞌ rey David tet naj Recab yebꞌ tet yuxhta naj, haꞌ ton naj Baana, ebꞌnaj iskꞌahol naj Rimón, ay bꞌey konhobꞌ Beerot, yalni yaꞌ:

—Chiwaqꞌ bꞌinahojan isbꞌi Komam Jahawil, Komam kinkolnihan yinh sunil inbꞌiskꞌulalan. 10 Chiwalnihan ta hayet yapni huneꞌ naj yalno wetan bꞌey Siclag tato kam yaꞌ Saúl, ham yalni huneꞌ naj tuꞌ tato kaw chintzalahan wabꞌenan tato kam yaꞌ Saúl tuꞌ, machoj, wal xin inkachan naj, inchejnihan potxꞌlaxokamo naj yu tzet bꞌey naj yalaꞌ wettuꞌan. 11 Ta hak tuꞌ wutehan huneꞌ naj tuꞌ, ¿haꞌ tom hex tiꞌ, mach chinchejikojan inchejabꞌan kexispotxꞌni kamoj? ¿Hatokꞌanabꞌ hex mach chexinpotxꞌkamojan? Yuto kaw txꞌoj hex, kexbꞌey hemaqꞌaꞌ kamo huneꞌ naj machi ismul yet lanhan isway yul yatut. Yuxin wal tinanh ¿tom mach chinqꞌanayojan istohol hemul heyako tuꞌ? Yuxin chinchejtojan inchejabꞌan kexispotxꞌnokamoj, kat heyel yul sat yibꞌanhqꞌinal tiꞌ, xhi yaꞌ David.

12 Lahwi tuꞌ, ischejnito yaꞌ rey David issoldado ispotxꞌoꞌkamo ebꞌnaj kawanh tuꞌ, istzokꞌnilto ebꞌnaj isqꞌabꞌ ebꞌnaj yebꞌ yoj ebꞌnaj, istꞌunhbꞌalaxkanh isnimanil ebꞌnaj tuꞌ bꞌey huneꞌ kꞌuh ay bꞌey Hebrón; tzujan tuꞌ yinito ebꞌnaj ischejabꞌ yaꞌ David iswiꞌ naj Is-boset, ismujni ebꞌnaj bꞌey Hebrón bꞌay mujan naj Abner.