BꞌABꞌEL HUM SAMUEL
1. YET NICHꞌAN UNIN YAꞌ SAMUEL, YEBꞌ YET PROFETA YAꞌ, YEBꞌ YET JUEZPAXO YAꞌ YINH ANMA ISRAEL
(1:1–7:17)
Yet ispitzkꞌa nichꞌan Samuel
1
Ay huneꞌ konhobꞌ Ramataim bꞌey chewal txꞌotxꞌ yul ismajul ebꞌnaj Efraín. Haꞌ tuꞌ ay huneꞌ naj chiyij Elcana, sufita naj, iskꞌahol naj Jeroham, haxa naj Jeroham iskꞌahol naj Eliú, haxa naj Eliú iskꞌahol naj Tohu, haxa naj Tohu iskꞌahol naj Zuf, naj ah Efrata. 2 Naj Elcana tuꞌ kawanh yixal naj, huneꞌ ix chiyij Ana, hunxa ix xin chiyij Penina. Ix Penina, ay yunin ix, walpaxo ix Ana machi yunin ix. 3 Hunun habꞌil xin isbꞌeyahto naj Elcana bꞌey konhobꞌ Silo yu yaqꞌni isxahanbꞌal yebꞌ yu yaniko ismay Komam Dios Jahawil, kaw aykano yip. Haꞌ bꞌey tuꞌ ay kawanh iskꞌahol yaꞌ sacerdote Elí, haꞌ ton naj Ofni yebꞌ naj Finees, ebꞌnaj kawanh tuꞌ, sacerdotepaxo ebꞌnaj yinta ismam.4 Hayet chibꞌeykꞌo naj Elcana yalte isxahanbꞌal tuꞌ, chiyaqꞌni naj ismajul ix Penina yebꞌ ismajul hunun yuninal ix yinh noꞌ xahanbꞌal chiyalte tuꞌ. 5 Walpaxo ix Ana xin, haꞌ noꞌ ekꞌna kaw kꞌul chiyaqꞌ naj tet ix, yuto ekꞌna xahan ay ix yu naj, waxanhka xin machi yunin ix Ana tuꞌ yaqꞌ Komam Jahawil.a 6 Yu huneꞌ tuꞌ yuxin chibꞌuchwa ix Penina yinh ix, yuxin kaw ok ishowal ix Ana yinh iskꞌul, yokpaxo bꞌiskꞌulal yinh ix, yuto machi yunin ix yaqꞌ Komam Jahawil.
7 Hayet chibꞌeyahto naj Elcana yebꞌ ebꞌix yixal bꞌey Yatut Komam Jahawil yinh hunun habꞌil, kat isbꞌuchwa ix Penina yinh ix Ana tuꞌ, yuxin ok ix Ana tuꞌ oqꞌoj, machi xin chisje ix waꞌoj. 8 Yuxin yal naj Elcana tet ix Ana hakaꞌ tiꞌ: «¿Tzet yinh chaxhoqꞌi? ¿Tzet yinh xin bꞌiskꞌulal hawehi? ¿Tzet yinh xin mach chaxhwaꞌi? ¿Tom mach ekꞌna hawu winhan sata 10 (lahonhwanh) hawunin?» xhi naj tet ix.
9 Hayet lahwi iswaꞌ ix Ana bꞌey konhobꞌ Silo tuꞌ, yahwano ix, isto ix Yatut Komam. Tzꞌonhanayo xin yaꞌ sacerdote Elí yul huneꞌ xhila, iskawilal ispilalil istiꞌ Yatut Komam Jahawil. 10 Kaw aykaniko bꞌiskꞌulal yinh yanma ix, chiꞌoqꞌ sikꞌlebꞌil; yok ix txahlo tet Komam Jahawil. 11 Istxahli ix, yalten ix tet Komam hakaꞌ tiꞌ: «Mam Jahawil, kaw aykano yip, ta chinhanatijan hanin hachejabꞌ intiꞌan, chawilni inbꞌiskꞌulaltiꞌan, chawaqꞌni hunu inwinaj wuninan, chiwaqꞌan tawet yinh hamunil. Mach hunelo chꞌekꞌ navaja xol xil iswiꞌ naj, yuto hawet chuko naj,» xhi ix Ana.
12 Kaw xin hunep txahli ix tet Komam Jahawil, wal yaꞌ sacerdote Elí ok tꞌanhno yinh istiꞌ ix, 13 yuto hayet istxahli ix Ana tuꞌ, tonhe chimexhmon istiꞌ ix, machi jabꞌe tzet chal ix. Tonhe chitzotel yanma ix yinh istxah tet Komam, yuxin haꞌ yalni yaꞌ Elí ta ukꞌum ix Ana. 14 Yuxin yal yaꞌ tet ix hakaꞌ tiꞌ:
—¿Hanikꞌmi chabꞌej hawukꞌni teꞌ? Wal xin matxa chawukꞌ teꞌ vino, xhi yaꞌ.
15 Istaqꞌwi ix Ana:
—Mamin, mach ukꞌumonan, machi vino chiwukꞌan, machi howla ukꞌe chiwukꞌan, wal xin kaw bꞌiskꞌulal wehan, chiwalnatijan sunil inbꞌiskꞌulalan tet Komam Jahawil. 16 Mach chatxumiko istxꞌojal winhan hanin hachejabꞌ intiꞌan, wal xin yu inbꞌiskꞌulalan yebꞌ yu txꞌixwilal chiwaqꞌlehan, yuxin kaw hunep manokan txahlo tet Komam, xhi ix.
17 Istaqꞌwi yaꞌ:
—Kꞌultikꞌa, paxanhto yinh aqꞌankꞌulal, haꞌojabꞌ Komam Dios, koDiosal hanhonh Israelonh tiꞌ chipajtzen hatxah tiꞌ, xhi yaꞌ Elí.
18 Istaqꞌwi ix Ana:
—Mamin, tzꞌayojabꞌ hakꞌul winhan, hanin hachejabꞌ intiꞌan, xhi ix.
Ismeltzo ix bꞌay aya. Lahwi tuꞌ yok ix waꞌoj. Matxa xin isbꞌiskꞌulal ix.
19 Haxa yinh hunxa tzꞌayik kaw sahabꞌ ahwanoj, yaniko ix Ana yebꞌ yichamil tuꞌ ismay Komam Jahawil. Lahwi tuꞌ ispaxto ix iskonhobꞌ bꞌey Ramá. Yet isway naj yebꞌ ix Ana, nabꞌil yu Komam Jahawil tzet isqꞌan ix tuꞌ yinh istxah. 20 Ispitzkꞌati yunin ix. Haxa yet istzꞌajna istzꞌayikal iswatxꞌi iskꞌul ix, yaniko ix isbꞌi naj nichꞌan tuꞌ, Samuel yij isbꞌi naj, yuto qꞌanbꞌil naj tet Komam Jahawil yu ix.
21 Haxa yet yayilo istzꞌayikal bꞌay chiꞌaqꞌlax xahanbꞌal tet Komam yinh hunun habꞌil, yahto naj Elcana yebꞌ huneꞌxa yixal yebꞌ yuninal bꞌey konhobꞌ Silo, yu isyijen naj tzet haltebꞌil yu tet Komam Jahawil yebꞌ yu isnhusni naj isxahanbꞌal tet Komam. 22 Yajaꞌ wal ix Ana mach to ix, yuxin yal ix tet naj hakaꞌ tiꞌ:
—Wal hanintiꞌan, mach chintohan, wal xin hato yet chiwinilojan naj wunintiꞌan yinh im, katto intohan, chinyenihan naj tet Komam Jahawil, kat iskankano naj bꞌey tuꞌ yinh hunelnhe, xhi ix.
23 Istaqꞌwi naj Elcana, yichamil ix:
—Yubꞌojabꞌ tzet chawoche. Kananhnakanoj, mach chaxhtonahi hatojabꞌ yet chiꞌel naj yinh im, katto hato yebꞌ naj, kat yijnikano isbꞌa tzet haltebꞌil hawu tet Komam Jahawil, xhi naj.
Hak tuꞌ yu iskankano ix, yok ix yilno nichꞌan yunin tuꞌ masanto yet yel naj yinh im. 24 Haxa yet yapni istzꞌayikal yinilo ix yinh im tuꞌ, yinito ix naj yintaj yul Yatut Komam bꞌey konhobꞌ Silo. Kaw xin nichꞌanto naj yet yinito ix naj; yinipaxto ix oxkꞌonh noꞌ tzehla wakaxb yebꞌ ekꞌbꞌal huneꞌ arroba ixim harina, yebꞌ huneꞌ noꞌ tzꞌum bꞌay ayayto vino. 25 Yaqꞌlax huneꞌ noꞌ wakax yinh xahanbꞌalil, yaniko ix Ana nichꞌan yunin tuꞌ yul isqꞌabꞌ yaꞌ sacerdote Elí. 26 Yalni ix Ana tet yaꞌ:
—Kaw yel Mamin, kaw hanintiꞌan huneꞌ ix hulikꞌo txahlo hakawilal yul Yatut Komam tiꞌ. 27 Inqꞌannihan nichꞌan wuninan tet Komam Jahawil yinh intxahan, haꞌ xin nichꞌan unin tiꞌ yaqꞌ Komam wetan, 28 yuxin chiwaqꞌkanojan nichꞌan wunintiꞌan tet Komam Jahawil, sunilbꞌal tiempo ay iskawil naj yul sat yibꞌanhqꞌinal chimunlaho naj yinh ismunil Komam, xhi ix.
Yay jahno ix, yu yinayo isbꞌa sata Komam Jahawil.