Isbꞌit ix Ana
2
Istxahli ix Ana tet Komam Jahaw, yalni ix hakaꞌ tiꞌ:«Mamin, hach Wahawilan, kaw chitzala wanmahan tawinh yuto hach hawaqꞌ wipan.
Haꞌ intiꞌan chitzebꞌi yinh mak bꞌuchwa winhan; xin kaw chintzalahan yu kaxhkolwa winhan.
2 Mamin, machi hunu mak kaw kꞌulkano hakaꞌ hach tiꞌ.
Machi hunu mak chu iskolwa hakaꞌ hach, koDiosal tiꞌanh.
3 Machojabꞌ mak chisloloꞌnhe isbꞌa yinh tzet chala.
Isbꞌeybꞌal anma yalni istzotiꞌ chiꞌaniko ismay, haꞌ chiꞌaqꞌni aykꞌayoj,
yuto hachnhechꞌan Diosach, sunil hawohtaj.
Hachnhechꞌan xin chawil yinh tzet chiꞌeliko anma yinh tzet chiswatxꞌe.
4 Chiqꞌahto islitꞌ ebꞌnaj kaw ay yip,
haxa ebꞌnaj machi yip xin chiyiqꞌkanokanh yip ebꞌnaj.
5 Haꞌ mak kaw ay tzet chislo yet yalanhtokanoj, haꞌ tinanh xin chaqꞌ munlaho isbꞌa yu iswaꞌi;
wal mak chitikꞌa nhohcha xin, nohnaxa iskꞌul.
Haꞌ ix ix maxhtikꞌa yunin, wal tinanh hujwanhxa yunin ix chila; walpaxo ix tzetkꞌaxa yunin, chitajkanayoj.
6 Haꞌ Komam Jahawil chiꞌinilo kokawil, haꞌ Komam chiꞌaqꞌnipaxo kokawil.
Haꞌ Komam chonhanito yul kambꞌal, haꞌ chonhinipaxahtij.
7 Haꞌ Komam Jahawil chiꞌaqꞌni mebꞌaꞌil, haꞌ chiꞌaqꞌnipaxo qꞌalomal.
Haꞌ Komam chonhaqꞌni aykꞌayoj, haꞌ Komam chonhinipaxkanh.
8 Haꞌ Komam chiꞌinikanh anma mebꞌaꞌ ayayo xol pojoj.
Chissikꞌnikanh Komam anma ayayo xol qꞌalem,
kat istzꞌonhbꞌaniko Komam tuꞌ xol ebꞌnaj nime yahaw, yunhe yaqꞌlax ismunil kaw ay yelapnoj xol ebꞌnaj.
Haꞌ Komam watxꞌenhe xeꞌ txꞌo txꞌotxꞌ tiꞌ, istzꞌunnayo Komam huneꞌ yul sat yibꞌanhqꞌinal tiꞌ yibꞌanh xeꞌ.
9 Haꞌ Komam chiyaꞌilnhen isxalabꞌ makta yetxa Komam yehi; wal makta chiwatxꞌen istxꞌojal chitanhilo xol qꞌejholoj.
Machi hunu mak tiꞌ chitzujcha apno hunu tzet ye tuꞌ yu yip ischukil.
10 Haꞌ mak ayko ishowal yinh Komam Jahawil chixitchatoj, hata bꞌey satkanh chimaqꞌwa kꞌuh yinh.
Haꞌ Komam chiꞌilni yinh tzet chiꞌeliko sunil anma ay yul sat yibꞌanhqꞌinal tiꞌ.
Haꞌ Komam chiꞌaqꞌni yip naj rey issikꞌiloj, kat yalaxiko ismay yu Komam,» xhi ix.a
11 Lahwi tuꞌ, ismeltzo naj Elcana yatut bꞌey Ramá. Wal naj nichꞌan Samuel tuꞌ, kankano naj yaqꞌni chejaꞌ isbꞌa naj tet Komam Jahawil iskꞌatanh yaꞌ sacerdote Elí.
Istxꞌojal ebꞌnaj iskꞌahol yaꞌ sacerdote Elí
12 Haꞌ ebꞌnaj iskꞌahol yaꞌ sacerdote Elí, kaw txꞌoj isbꞌeybꞌal ebꞌnaj, machi yelapno Komam Jahawil yul sat ebꞌnaj.b 13 Hayet lanhan yaqꞌni hunu ebꞌnaj Israel isxahanbꞌal tet Komam Jahawil, kat yapni naj ischejabꞌ ebꞌnaj sacerdote tuꞌ yebꞌ huneꞌ chꞌen tenedor nimejal, oxebꞌ yeh. 14 Hayet lanhan istah noꞌ chibꞌe yul xi, maka yul isnet, kat yanayto naj chꞌen tenedor yul xi tuꞌ, hantanhetikꞌa noꞌ chiꞌahti yu chꞌen, kat yinito naj noꞌ tet ebꞌnaj sacerdote. Hak tuꞌ chiyute ebꞌnaj yinh isxahanbꞌal ebꞌnaj Israel chiꞌapni bꞌey konhobꞌ Silo.c 15 Haktikꞌapax tuꞌ yet maxhto chitzꞌalo ismantecahil noꞌ chibꞌe chiꞌaqꞌlax yinh xahanbꞌal tuꞌ, chiꞌapni naj ischejabꞌ naj sacerdote, chalni naj tet naj lanhan yaqꞌni isxahanbꞌal tuꞌ: «Aqꞌ hanikꞌo noꞌ chibꞌe wetan, yuto chinqꞌantzehan noꞌ iskꞌuxuꞌ naj, yuto mach chischabꞌ naj noꞌ tahnaxa tawet, wal xin haꞌ noꞌ yaxto choche naj,» xhi naj chejabꞌ tuꞌ.d 16 Yajaꞌ ta chitaqꞌwi naj lanhan yalten isxahanbꞌal hakaꞌ tiꞌ: «Machoj, chitotzꞌalo ismantecahil noꞌ bꞌabꞌel, tzujan tuꞌ kat hawinito hantanhetikꞌa chawoche,» ta xhi naj; kat istaqꞌwi naj ischejabꞌ naj sacerdote tuꞌ: «Machoj, machi wechmahan; ta mach chawaqꞌ noꞌ, hankawinan chinokan intzikalojan noꞌ tawet,» xhi naj. 17 Yuxin kaw nimankano istxꞌojal ebꞌnaj tzeh, iskꞌahol yaꞌ Elí tuꞌ yul sat Komam Jahawil, yuto machi yelapno xahanbꞌal chiyaqꞌ anma tet Komam yul sat ebꞌnaj.
18 Wal naj nichꞌan Samuel xin, ayko xil isqꞌap naj hakaꞌ qꞌap chako ebꞌnaj sacerdote yu ayxako naj yaqꞌni chejaꞌ isbꞌa yinh tzet chal Komam Jahawil.e 19 Hayet chibꞌeykꞌo ix Ana yebꞌ yichamil yalteꞌ isxahanbꞌal hunun habꞌil bꞌey konhobꞌ Silo, chiyinito ix hunun xil isqꞌap naj nichꞌan Samuel, haꞌ ix xin chiwatxꞌeni. 20 Chisqꞌanni yaꞌ sacerdote Elí iskꞌulal Komam Jahawil yibꞌanh naj Elcana yebꞌ ix Ana, chalni yaꞌ hakaꞌ tiꞌ: «Yaqꞌabꞌ Komam Jahawil haywanhoxa hawuninal yebꞌ ix Ana tiꞌ, haꞌ xin chꞌokkano selelo naj qꞌanbꞌil yu ix yu yokniko yu Komam,» xhi yaꞌ. Lahwi tuꞌ, kat ispaxto naj Elcana yebꞌ ix Ana yatut. 21 Hak tuꞌ yu yanayo Komam iskꞌulal yibꞌanh ix, ispitzkꞌa oxwanhxa yunin ix winaj, yebꞌ kawanh ebꞌix ix. Wal naj nichꞌan Samuel xin kaw saqꞌal ischꞌibꞌ naj sata Komam Dios.
22 Wal yaꞌ Elí, kaw ichamxa yaꞌ, yajaꞌ yohta yaꞌ tzet chiꞌutelax konhobꞌ Israel yu ebꞌnaj iskꞌahol; yohtapaxo yaꞌ tato chiway ebꞌnaj yebꞌ ebꞌix ix chitanhen istiꞌ isTabernáculo Komam bꞌay chiskutxbꞌa isbꞌa anma Israel yebꞌ Komam. 23 Yalni yaꞌ tet ebꞌnaj iskꞌahol: «¿Tzet yinh xin hak tiꞌ cheyute? Kaw sunil konhobꞌ chihalni wetan yinh istxꞌojal chewatxꞌe. 24 Mach cheyute hakaꞌ tuꞌ, kꞌahol, yuto mach kꞌulo sunil tzet chiwabꞌehan yalni iskonhobꞌ Komam tiꞌ yinh tzet cheyu. 25 Tato ay hunu mak chako ismul yinh hunu yet anmahil, haꞌ ebꞌnaj juez chiꞌilni tzet chꞌelikoj, yajaꞌ ta ay mak chako ismul yinh Komam Jahawil, ¿mak chaqꞌ isbꞌa yinh? ¡Mach maka! ¿Mataxka chu iskolni isbꞌa huneꞌ mak tuꞌ yul isqꞌabꞌ Komam?» xhi yaꞌ. Yajaꞌ xin mach yabꞌeto ebꞌnaj tzet yal ismam; wal Komam Jahawil xin xaꞌistxumna Komam tato maqꞌbꞌil istanhtzelaxilo ebꞌnaj.f
26 Wal naj nichꞌan tzeh Samuel xin, kaw saqꞌal ischꞌibꞌ naj, kaw kꞌul isbꞌeybꞌal naj sata Komam Dios yebꞌ sata anma.
27 Yet hunel tuꞌ, apni huneꞌ ischejabꞌ Komam Dios iskꞌatanh yaꞌ Elí, yalni: «Haꞌ Komam Jahawil halni hakaꞌ tiꞌ: “Hayet ay ebꞌnaj hawichmam bꞌey Egipto, ischejabꞌo naj rey Faraón, kaw inyehan wipan tet ebꞌnaj.g 28 Insikꞌlelojan insacerdotehan xol hunun majan ebꞌnaj Israel yu yalten ebꞌnaj xahanbꞌal yibꞌanh ismexhahil xahanbꞌal yebꞌ yunhe isnhusni ebꞌnaj ispom, kat yaniko ebꞌnaj xil isqꞌap yet sacerdotehal yinh insatan, waqꞌnipaxojan ismajul ebꞌyaꞌ hawichmam yinh xahanbꞌal chiyaqꞌ konhobꞌ Israel tuꞌ wetan.h 29 ¿Tzet yinh yuxinto machi yelapno xahanbꞌal yebꞌ yebꞌalqꞌabꞌe inchejan yaqꞌni inkonhobꞌan bꞌey watutan yul hasat, hakaꞌto chaxanhobꞌtanhe? ¿Tzet yinh yuxin ekꞌna xahan chawil ebꞌnaj hakꞌahol sata hinan, chawaqꞌni bꞌaqꞌichbꞌo ebꞌnaj yu xahanbꞌal yebꞌ yebꞌalqꞌabꞌe kaw kꞌul chiyaqꞌ konhobꞌ Israel wetan? 30 Hanin Yahawil Israel intiꞌan, xawalan tato hach tiꞌ yebꞌ hawuninal chexmunla sacerdotehal yul watutan, yajaꞌ wal tinanh chiwalan tato matxa chaxhok yinh huneꞌ munil tiꞌ. Wal xin haꞌ mak ay welapnojan yul sat, ay yelapno yul insatan; haxa mak mach welapnojan yul sat, machi yelapno yul insatan. 31 Lanhan yul istzꞌayikal bꞌay chintanhtzelojan hawip yebꞌ yip ebꞌnaj hakꞌahol; machi hunu ebꞌnaj hakꞌahol tiꞌ chiꞌichambꞌoloj. 32 Chiwayojan isyaꞌtajil tawibꞌanh yebꞌ hawuninal, chixin chíwaho hakꞌul hawilni iskꞌulal chiwayojan yibꞌanh hawet Israelal. Machi hunu hakꞌahol tiꞌ chiꞌichambꞌi. 33 Chiwakojan huneꞌ mak ayto hawu habꞌa yebꞌi yinh ismunil bꞌey ismexhahil xahanbꞌal, kat hawoqꞌi, niman yal hasat chiꞌaykanoj, kat yok hahowal yinh hakꞌul hawilni; wal ebꞌnaj hakꞌahol yebꞌ yuninal hakꞌahol tuꞌ, yet yechel tzehto kat iskami. 34 Chisyelo isbꞌa tato yel tzet chiwaltiꞌan, yinhnhe huneꞌ tzꞌayik chipotxꞌlaxkamo kawanh hakꞌahol, naj Ofni yebꞌ naj Finees. 35 Chinsayikojan huneꞌ insacerdotehan chiyijen tzet chiwalan kat iswatxꞌen tzet chiyoche wanmahan, kat isnahatli yebꞌ yuninal tuꞌ yinh inmuniltiꞌan. Kat xin waqꞌnihan ismunil yinh sunilbꞌal tiempo yinta naj rey chinsikꞌikojan reyal. 36 Haxa mak chitokankano xol hawuninal, chito isjahbꞌa isbꞌa sata naj sacerdote yu isqꞌanni hunu melyu, maka nichꞌano tzet chislo, kat isqꞌanni ta chꞌaqꞌlax yet ismunil sacerdotehal, yunhe yekꞌ yu,” xhi Komam,» xhi yaꞌ ischejabꞌ Komam tet yaꞌ Elí.