Awtelax naj Samuel yu Komam Jahawil
3
Wal naj tzeh Samuel chimunlakto naj yul Yatut Komam Jahawil, yalanh ischejbꞌanil yaꞌ Elí. Yinh hunteqꞌan tzꞌayik tuꞌ mach komono chitzotel Komam Jahawil tet anma, mach komonopaxo chisye Komam hunu tzet ye tuꞌ yinh sajsatil. 2 Wal yaꞌ Elí lanhan yichi istanh ismujlubꞌal yaꞌ yu ichamil, matxa kaw chu yilni yaꞌ; ay xin huneꞌ aqꞌbꞌal tiꞌ, lanhan isway yaꞌ yul iscuarto. 3 Wal naj Samuel, lanhan iswaypaxo naj yul isTabernáculo Komam bꞌay ay isKaxhahil istrato Komam Jahawil. Wal xin aynhetikꞌako qꞌaꞌ yinh chꞌen candelero ayikto bꞌey tuꞌ;a 4 yawten Komam naj Samuel:—Samuel, xhi Komam. Istaqꞌwi naj:
—Mamin, ayinan lah, ¿tzet chawala? xhi naj. Istaqꞌwi yaꞌ Elí:
—Machi hach chaxhwawtehan, as wayanh, xhi yaꞌ. Isto naj Samuel ishilbꞌano isbꞌa. 6 Yajaꞌ yawtenpaxo Komam naj hunelxa:
—Samuel, xhi Komam.
Yahwano naj, isto naj iskꞌatanh yaꞌ Elí, yalni naj:
—Ayinan lah, ¿tzet chawala? xhi naj.
Istaqꞌwi yaꞌ Elí:
—Hach kꞌahol, machi hach chaxhwawtehan, as wayanh, xhi yaꞌ.
7 Wal naj Samuel, maxhto ohtabꞌilo Komam Jahawil yu naj, yuto maxhto hunelo tiꞌ chitzotel Komam tet naj. 8 Yawtenpaxo Komam naj yinh yoxel, yahwano naj, isto naj iskꞌatanh yaꞌ Elí, yalni naj:
—Mamin, ayinan lah, ¿tzet chawala? xhi naj.
Istxumnilo yaꞌ Elí tato haꞌ Komam Jahawil chiꞌawten naj nichꞌan tzeh Samuel tuꞌ. 9 Yalni yaꞌ hakaꞌ tiꞌ:
—As hilbꞌa habꞌa, tato chaxhyawte Komam Jahawil, hak tiꞌ chawute hataqꞌwi: “Mamin, tzotelanh yuto hanin hachejabꞌ intiꞌan chiwabꞌehan tzet chawala,” kachi, xhi yaꞌ tet naj.
Isto naj Samuel ishilbꞌano isbꞌa. 10 Lahwi tuꞌ yapni Komam Jahawil, yok linhnoj, yawten Komam naj Samuel hakaꞌtikꞌa yet yalanhto, yalni Komam:
—Samuel, Samuel, xhi.
Istaqꞌwi naj Samuel:
—Tzotelanh Mamin, yuto hanin hachejabꞌ intiꞌan, chiwabꞌehan tzet chawala, xhi naj.
11 Yalni Komam tet naj Samuel:
—Ay huneꞌ tzet chinwatxꞌehan bꞌey konhobꞌ Israel tiꞌ, haꞌ mak chiꞌabꞌeni, kaw chitak iskꞌul yabꞌeni. 12 Haꞌ yinh huneꞌ tzꞌayik tuꞌ, chiyij isbꞌa sunil tzet xawalan yinh yaꞌ Elí yebꞌ yinh yuninal, sunil tzet walan yinh yichebꞌanil masanta yinh islahobꞌal chiyij isbꞌa yinh yaꞌ.b 13 Xawalan tato chiwayojan isyaꞌtajil yinh sunilbꞌal tiempo yibꞌanh yuninal yaꞌ, yu istxꞌojal ebꞌnaj iskꞌahol yaꞌ, yohta xin yaꞌ istxꞌojal ebꞌnaj, yajaꞌ xin mach chikachwa yaꞌ yinh ebꞌnaj. 14 Yuxin xawaqꞌ bꞌinaho inbꞌihan yinh yet walnihan yinh yuninal yaꞌ Elí tato machi xahanbꞌal maka hunuxa yebꞌalqꞌabꞌe chiꞌaqꞌni tanho ismul ebꞌnaj tuꞌ, xhi Komam tet naj Samuel.
15 Lahwi tuꞌ, yay hilno naj Samuel masanto yet issajbꞌiloj. Haxa yet issajbꞌilo xin, ishajni naj ispultahil isTabernáculo Komam. Kaw xin chixiw naj yalni tet yaꞌ Elí yinh tzet yal Komam tet naj Samuel tuꞌ. 16 Yajaꞌ awtelax naj Samuel yu yaꞌ Elí, yalni yaꞌ tet naj:
—Samuel, hach inkꞌaholan, xhi yaꞌ.
Istaqꞌwi naj Samuel:
—Ayinan lah mamin, xhi naj.
17 Isqꞌambꞌen yaꞌ Elí tet naj:
—¿Tzet mayal Komam tawet? Machojabꞌ tzet mayal Komam tawet tuꞌ chawebꞌa wetan, yuto ta ay chawebꞌa, haꞌ Komam chiꞌanayo isyaꞌtajil tawibꞌanh, xhi yaꞌ.
18 Hak tuꞌ yu yalnilo naj Samuel sunil tzet yal Komam tet yaꞌ Elí, machi hunu tzet yebꞌayo naj. Hayet yabꞌen yaꞌ Elí tzet yal naj Samuel tuꞌ, yalni yaꞌ:
—Haꞌ kaw Komam Jahawil mahalni, yuxin yubꞌojabꞌ hakaꞌ chal iskꞌul Komam, xhi yaꞌ Elí.
19 Ischꞌibꞌkanh naj Samuel tuꞌ, kaw xin ayko Komam Jahawil yetbꞌiho naj; yuxin sunil tzet chiyal naj chiyij isbꞌa. 20 Yohtanhelo sunil anma Israel ay bꞌey Dan masanta bꞌey Beerseba tato kaw yijem naj Samuel tet Komam Jahawil, yebꞌ ta ischejabꞌ Komam ye naj. 21 Txꞌiꞌal el isye isbꞌa Komam Jahawil tet naj Samuel bꞌey konhobꞌ Silo, yuto haꞌ bꞌey tuꞌ tzotel Komam tet naj.