Yinh huneꞌ tiempohal tuꞌ, iskutxbꞌako isbꞌa ebꞌnaj filisteo yu yaniko ebꞌnaj howal yinh ebꞌnaj Israel, yuxin tit ebꞌnaj Israel tuꞌ ismajaꞌ issat ebꞌnaj. Iswatxꞌenkanh ebꞌnaj iscampamento bꞌey Eben-ezer, wal ebꞌnaj filisteo xin bꞌey Afec, iswatxꞌenkanh ebꞌnaj iscampamento.^a 2 Yaniko ebꞌnaj filisteo howal yinh ebꞌnaj Israel, hayet yok howal tuꞌ xin, isqꞌoji ebꞌnaj yinh ebꞌnaj Israel, ispotxꞌnikamo ebꞌnaj kanhebꞌ mil ebꞌnaj Israel. 3 Hayet ismeltzo ebꞌnaj Israel bꞌey campamento, yalni ebꞌnaj ichamta winaj Israel: «¿Tzet yinh xin makonhyako Komam Dios yul isqꞌabꞌ ebꞌnaj filisteo tiꞌ? Wal tinanh tonh bꞌey Silo kat jiniti isKaxhahil istrato Komam, haxinwal yet ayko koxol chonhiskolilo yul isqꞌabꞌ ebꞌnaj ayko ishowal jinh,» xhi ebꞌnaj.

4 Ischejnito ebꞌnaj Israel hunteqꞌan ebꞌnaj chejabꞌ bꞌey Silo yinoti isKaxhahil istrato Komam Jahawil, Komam kaw aykano yip, ayko xolbꞌal kawanh ebꞌnaj querubín. Isto naj Ofni yebꞌ naj Finees, ebꞌnaj iskꞌahol yaꞌ Elí yinta isKaxhahil istrato Komam. 5 Haxa yet yapni isKaxhahil istrato Komam bꞌey campamento tuꞌ, sunil ebꞌnaj Israel ah yaw yinh kaw ip yu tzalahilal, isbꞌili txꞌo txꞌotxꞌ yu yel yaw ebꞌnaj.

6 Hayet yabꞌen ebꞌnaj filisteo yel yaw ebꞌnaj Israel yinh tzalahilal tuꞌ, yalni ebꞌnaj: «¿Tzet yinh yuxin chiꞌel yaw ebꞌnaj hebreo yinh tzalahilal yul iscampamento tuꞌ?» xhi ebꞌnaj. Lahwi tuꞌ yabꞌenilo ebꞌnaj tato ilaxto isKaxhahil istrato Komam bꞌey iscampamento ebꞌnaj Israel tuꞌ. 7 Kaw xin xiwkanh ebꞌnaj filisteo tuꞌ, yalni ebꞌnaj hakaꞌ tiꞌ: «Maꞌapni isDiosal ebꞌnaj hebreo tiꞌ yul campamento, wal tinanh kaw kꞌanchꞌanonh, maxhto hunelo chu hakaꞌ tiꞌ. 8 Kꞌanchꞌanonh, ¿mak chu konhiskolnilo yul isqꞌabꞌ isDiosal ebꞌnaj, huneꞌ Dios kaw aykano yip tuꞌ? Haꞌ ton isDiosal ebꞌnaj tuꞌ tanhtzenilo ebꞌnaj ah Egipto bꞌey txꞌotxꞌ desierto, yanayo sunil isyaꞌtajil yibꞌanh ebꞌnaj. 9 Wal tinanh jiqꞌawe jip hanhonh filisteo honh tiꞌ, jaqꞌaꞌwe howal yinh sunil jip, haxinwal mach chonhok ischejabꞌo ebꞌnaj hebreo tuꞌ, hakaꞌ yu yok ebꞌnaj kochejabꞌoj,» xhi ebꞌnaj.

10 Yaniko ebꞌnaj filisteo tuꞌ howal yinh ebꞌnaj Israel, isqꞌoji ebꞌnaj yinh ebꞌnaj, yelkanh ebꞌnaj Israel tuꞌ, isto ebꞌnaj yatut. Kaw niman ebꞌnaj Israel kami, 30 mil isbꞌisil ebꞌnaj ispotxꞌ ebꞌnaj filisteo. 11 Yinito ebꞌnaj filisteo tuꞌ isKaxhahil istrato Komam, ispotxꞌnikamo ebꞌnaj naj Ofni yebꞌ naj Finees, ebꞌnaj kawanh iskꞌahol yaꞌ Elí.

12 Yajaꞌ xin ay huneꞌ naj soldado benjaminita elkanh xol howal tuꞌ, isto naj yinh anhe bꞌey Silo, yapni naj bꞌey Silo yinh huneꞌ tzꞌayik tuꞌ. Istzilnilo naj xil isqꞌap, yanahto naj txꞌotxꞌ xol xil iswiꞌ yu isyenilo naj bꞌiskꞌulal.^b 13 Hayet yapni naj yul konhobꞌ tuꞌ, tzꞌonhanayo yaꞌ Elí yul huneꞌ xhila istiꞌ bꞌeh yechman tzet chiyuhi, yuto ayko yinh iskꞌul yaꞌ yinh isKaxhahil istrato Komam. Hayet yapni naj soldado bꞌey Silo tuꞌ, yok naj yalno tet anma tzet yehi, yah yaw anma tuꞌ sunil. 14 Hayet yabꞌen yaꞌ Elí yahwi anma tuꞌ isqꞌambꞌen yaꞌ:

—¿Tzet yinh xin chiwejcha anma tuꞌ? xhi yaꞌ.

Yapni naj soldado tuꞌ yinh anhe iskꞌatanh yaꞌ Elí, yalni naj sunil tzet yuhi. 15 Wal yaꞌ Elí tuꞌ 98 (waxajlahonhebꞌ ishokꞌal) ishabꞌil yaꞌ, yuxin xatanh ismujlubꞌal yaꞌ, matxa chu yilni. 16 Yalni naj soldado tuꞌ tet yaꞌ:

—Hanintiꞌan manelkanhan bꞌay ok howal, haꞌ tuꞌ inpetohan tinanh, xhi naj.

Isqꞌambꞌen yaꞌ Elí tet naj:

—¿Tzet mayu? xhi yaꞌ.

17 Yalni naj tet yaꞌ:

—Ebꞌnaj Israel, maꞌelkanh ebꞌnaj tet ebꞌnaj filisteo, kaw xin niman ebꞌnaj soldado makami, makampaxo ebꞌnaj kawanh hakꞌahol, naj Ofni yebꞌ naj Finees, mayinito ebꞌnaj filisteo tuꞌ isKaxhahil istrato Komam Dios, xhi naj.

18 Hayet yabꞌen yaꞌ yalni naj yinh teꞌ Kaxha, yelto pakꞌna yaꞌ yintaj, yibꞌanh isxhila istiꞌ pulta, isqꞌahilto isnuqꞌ yaꞌ, iskam yaꞌ. Kaw xin ichamxa yaꞌ yebꞌ kaw al isnimanil yaꞌ. Wal yaꞌ Elí tuꞌ 40 (kawinaj) habꞌil ok yaꞌ juesal yinh konhobꞌ Israel. 19 Wal ix yixal iskꞌahol yaꞌ Elí, naj Finees, ayxa tzet yeh ix, toxa xin chiwatxꞌi iskꞌul ix; yuxin hayet yabꞌen ix tato ilaxto isKaxhahil istrato Komam yebꞌ ta kam yaꞌ Elí yebꞌ naj yichamil ix, istit isyaꞌil iskꞌul ix, yay nhohno ix, ispitzkꞌa nichꞌan yunin ix. 20 Hayet yilni ebꞌix chiꞌilni ix tuꞌ tato lanhan iskam ix, yalni ebꞌix tet ix: «Mach chaxhxiwi, yuto mapitzkꞌa huneꞌ nichꞌan hawinaj unin,» xhi ebꞌix. Yajaꞌ mach taqꞌwi ix, matxa yabꞌeto ix. 21 Yaniko ix Icabod isbꞌiho nichꞌan yunin pitzkꞌa tuꞌ, yalni ix hakaꞌ tiꞌ: «Maꞌilaxilo ismay konhobꞌ Israel tinanh,» xhi ix. Yuto ilaxto isKaxhahil istrato Komam Dios, yu kam ismam yichamil ix, yebꞌ yichamil ix tuꞌ. 22 Yuxin yal ix hakaꞌ tiꞌ: «Maꞌilaxilo ismay konhobꞌ Israel tiꞌ, yuto maꞌilaxto isKaxhahil istrato Komam Dios,» xhi ix.