Yet ayxako isKaxhahil istrato Komam Dios xol ebꞌnaj filisteo
5
Haꞌ bꞌey Eben-ezer yito ebꞌnaj filisteo isKaxhahil istrato Komam, yapni bꞌey Asdod yu ebꞌnaj. 2 Haxa yet yapni bꞌey konhobꞌ tuꞌ, yanikto ebꞌnaj yul yatut istioxh chiyij Dagón, yanayo ebꞌnaj iskꞌatanh istioxh tuꞌ. 3 Haxa yinh hunxa tzꞌayik yinh kaw sahabꞌ apni ebꞌnaj ay yul konhobꞌ tuꞌ yul yatut istioxh tuꞌ, yilni ebꞌnaj tato pakꞌanxayo istioxh ebꞌnaj sat txꞌotxꞌ, sata isKaxhahil istrato Komam, yinikanh ebꞌnaj istioxh tuꞌ, islinhbꞌankanh ebꞌnaj bꞌaytikꞌa aya. 4 Haxa yet hunxa tzꞌayik xin, kaw sahabꞌ topaxo ebꞌnaj bꞌey yatut istioxh tuꞌ, pakꞌanxapaxayo tioxh Dagón tuꞌ sat txꞌotxꞌ sata isKaxhahil istrato Komam Dios, wal iswiꞌ yebꞌ isqꞌabꞌ qꞌahtoj, pakꞌankanilto yul ismarcohal teꞌ pulta, haxanhe xin isnimanil aykanayoj. 5 Hatax tuꞌ xin, hayet chiꞌokto ebꞌnaj sacerdote yet Dagón yebꞌ konhobꞌ ay bꞌey tuꞌ yul yatut tioxh tuꞌ, mach chiyayo yoj yibꞌanh ismarcohal pulta tuꞌ masanto tinanh.6 Lahwi tuꞌ yanayo Komam Dios isyaꞌtajil yibꞌanh anma ay bꞌey Asdod yebꞌ yibꞌanh sunil anma ay yul ismajul Asdod tuꞌ, yelilo malilal yul iskꞌul anma, chixin kam anma tuꞌ yu. 7 Hayet yilni ebꞌnaj ay bꞌey konhobꞌ Asdod huneꞌ tuꞌ, yalni ebꞌnaj: «Matxahojabꞌ chikan isKaxha isDiosal ebꞌnaj Israel tiꞌ koxol, yuto kaw ayayo isyaꞌtajil jibꞌanh yu yebꞌ yibꞌanh kodiosal Dagón,» xhi ebꞌnaj.
8 Iskutxbꞌaniko ebꞌnaj ebꞌnaj yahawil ebꞌnaj filisteo, isqꞌambꞌen ebꞌnaj tet ebꞌnaj:
—¿Tzet chijute isKaxhahil isDiosal ebꞌnaj Israel tiꞌ? xhi ebꞌnaj.
Istaqꞌwi ebꞌnaj yahaw konhobꞌ tuꞌ:
—Iweto bꞌey konhobꞌ Gat, xhi ebꞌnaj.
Hak tuꞌ yu yinito ebꞌnaj isKaxhahil istrato Komam Dios bꞌey konhobꞌ Gat. 9 Haxa yet yapni isKaxhahil istrato Komam bꞌey tuꞌ, yaniko Komam huneꞌ niman xiwkilal yinh anma ay yul konhobꞌ, yelilo malilal yul iskꞌul, yinh sunil ichamta anma masanta yinh nixhte unin. 10 Yuxin ishekꞌilo ebꞌnaj isKaxhahil istrato Komam, yinito ebꞌnaj teꞌ bꞌey konhobꞌ Ecrón, yajaꞌ yet yapni isKaxhahil istrato Komam bꞌey tuꞌ, yah yaw anma ah Ecrón hakaꞌ tiꞌ: «Maꞌilaxti isKaxha isDiosal ebꞌnaj Israel koxol tiꞌ yunhe konhistanhtzenilo kosunil,» xhi anma.
11 Iskam anma ay yul konhobꞌ Ecrón yu xiwkilal yebꞌ yu isyaꞌtajil yati Komam yibꞌanh anma tuꞌ, yuxin yawte ebꞌnaj ebꞌnaj yahawil ebꞌnaj filisteo tuꞌ, yalni ebꞌnaj tet ebꞌnaj: «Iweto isKaxhahil isDiosal ebꞌnaj Israel bꞌey tiꞌ, kat heyaqꞌni meltzohoj, haxinwal mach chonhkam kosunil,» xhi ebꞌnaj.
12 Kaw xin chiꞌapni yel yaw anma satkanh yu isyaꞌil tzet ayayo yibꞌanh. Haxa anma maxhto chikam xin, kaw elilo malilal yul iskꞌul.