—¿Tzettaxka wal jutenanh isKaxhahil isDiosal ebꞌnaj Israel tiꞌ? ¿Yebꞌ tzet chu jaqꞌni meltzohojanh bꞌaytikꞌa aya? xhi ebꞌnaj.

3 Istaqꞌwi ebꞌnaj:

—Tato cheyaqꞌ meltzoho isKaxhahil istrato isDiosal ebꞌnaj Israel tiꞌ, mach cheyaqꞌ meltzoho yinh haknhetiꞌ, wal xin yilal ay sabꞌehal cheyato yintaj yu hetohlan hemul, hak tuꞌ chu hekawxokanh, cheyohtanheniloj tzet yinh xin mach chiꞌel isyaꞌtajil ayayo teyibꞌanh tiꞌ, xhi ebꞌnaj.

4 Isqꞌambꞌen ebꞌnaj filisteo tuꞌ:

—¿Tzet xin chijaqꞌanh istoholo komul tiꞌanh? xhi ebꞌnaj.

Istaqꞌwi ebꞌnaj:

—Cheyaqꞌ howebꞌo yechel yabꞌil malilal oro yebꞌ howebꞌo yechel noꞌ txꞌow oro, hakaꞌtikꞌa isbꞌisil ebꞌnaj yahawil ebꞌnaj filisteo tiꞌ, yuto lahannhe isyaꞌtajil ay teyibꞌanh yebꞌ ebꞌnaj. 5 Yuxin chewatxꞌe yechel yabꞌil tiꞌ yebꞌ yechel noꞌ txꞌow chiꞌetanto sat txꞌo txꞌotxꞌ, kat heyaniko ismay isDiosal ebꞌnaj Israel, hak tuꞌ xin chisbꞌej yanayo isyaꞌtajil teyibꞌanh, yebꞌ yibꞌanh hediosal yebꞌ yibꞌanh hetxꞌotxꞌ. 6 ¿Tzet yinh xin cheyaqꞌ kabꞌkono heyanma hakaꞌ naj faraón yebꞌ anma ah Egipto? Yuto hato yet yanayo Komam Dios isyaꞌtajil yibꞌanh ebꞌnaj ischahnito ebꞌnaj ebꞌnaj Israel. 7 Aqꞌwe watxꞌe hunu carruaje kaw akꞌto, kat heyiniti kakꞌonho noꞌ wakax ay yunin, noꞌ maxhto chiꞌalaxiko hunelo te teꞌ yibꞌanh isnuqꞌ, kat hehunbꞌan noꞌ, kat hekꞌalniko teꞌ carruaje tuꞌ yinta noꞌ, mach xin chechato yunin noꞌ yintaj, chemajchekano noꞌ yul ispeyabꞌ. 8 Kat heyahnato isKaxhahil istrato Komam yul carruaje tuꞌ, haxa hunteqꞌan oro cheyaqꞌ istoholo hemul tuꞌ, cheyayto yul hunuxa kaxha, kat heyahnato yinh iskꞌul kaxha tuꞌ, lahwi tuꞌ kat hebꞌejtzonto noꞌ wakax iqꞌnhe teꞌ carruaje tuꞌ ischukil. 9 Kat heyilni bꞌay kaw isto noꞌ, tato haꞌ bꞌey yul isbꞌelal konhobꞌ Bet-semes yul ismajul ebꞌnaj Israel chito noꞌ, chal yelapnoj tato haꞌ isDiosal ebꞌnaj tuꞌ aniti isyaꞌtajil tiꞌ jibꞌanh, yajaꞌ ta nan bꞌehal bꞌay chito noꞌ, tonhe chiꞌekꞌ hunteqꞌan isyaꞌtajil tiꞌ jibꞌanh chal tuꞌ, maxhtaj isDiosal ebꞌnaj chonhetani, xhi ebꞌnaj.

10 Yok ebꞌnaj filisteo iswatxꞌeno hakaꞌ yu yalni ebꞌnaj tuꞌ, yiniti ebꞌnaj kakꞌonh noꞌ wakax ay yunin, ismajchen ebꞌnaj yunin noꞌ yul ispeyabꞌil, ishunbꞌan ebꞌnaj noꞌ, iskꞌalniko ebꞌnaj teꞌ carruaje yinta noꞌ. 11 Yanahto ebꞌnaj isKaxhahil istrato Komam yul teꞌ carruaje tuꞌ, yanipaxahto ebꞌnaj hunxa teꞌ kaxha bꞌay ayayto yechel noꞌ txꞌow yinh chꞌen oro, yebꞌ yechel malilal yabꞌil elilo yinh anma. 12 Isbꞌejtzonto ebꞌnaj noꞌ wakax tuꞌ, isto noꞌ yul isbꞌelal Bet-semes, kaw xin chimuꞌlah noꞌ, toholnhetikꞌa xin isto noꞌ yul bꞌeh, mach ishekꞌilo isbꞌa noꞌ. Nahat xin tzujan ebꞌnaj filisteo yilni isto noꞌ, masanta apni ebꞌnaj ismohonal Bet-semes. 13 Haxa ebꞌnaj ay bꞌey Bet-semes tuꞌ lanhan iskꞌupni ebꞌnaj ixim trigo yul hokan. Hayet istꞌanhxito ebꞌnaj, yilnito ebꞌnaj isKaxhahil istrato Komam, istzalakanh ebꞌnaj. 14 Yapni linhno noꞌ wakax yebꞌ teꞌ carruaje bꞌey hokan yet naj Josué yul ismajul Bet-semes, ay xin huneꞌ chꞌen niman chꞌen bꞌey tuꞌ. Haꞌ xin ebꞌnaj ay bꞌey Bet-semes tuꞌ ok ebꞌnaj istzokꞌo teꞌ carruaje siꞌal, isnhusnito ebꞌnaj noꞌ wakax tuꞌ yinh xahanbꞌalil tet Komam. 15 Haꞌ xin ebꞌnaj levita inayti teꞌ isKaxhahil istrato Komam, yinipaxayti ebꞌnaj huneꞌxa kaxha bꞌay ayayto hunteqꞌan oro tuꞌ, yanayo ebꞌnaj yibꞌanh huneꞌ chꞌen niman chꞌen. Haꞌ yinh huneꞌ tzꞌayik tuꞌ yaqꞌ ebꞌnaj ay bꞌey Bet-semes isxahanbꞌal yebꞌ yebꞌalqꞌabꞌe chinhuslax tet Komam. 16 Hayet yilni ebꞌnaj howanh yahaw ebꞌnaj filisteo huneꞌ tuꞌ, ispaxto ebꞌnaj bꞌey konhobꞌ Ecrón, yinhtikꞌa huneꞌ tzꞌayik tuꞌ apni ebꞌnaj.

17 Haꞌ howebꞌ yechel yabꞌil malilal nabꞌa oro yaqꞌ ebꞌnaj filisteo tuꞌ yu istoholo ismul tet Komam, hunun yet hunun konhobꞌ: huneꞌ yet konhobꞌ Asdod, huneꞌ yet konhobꞌ Gaza, huneꞌ yet konhobꞌ Ascalón, huneꞌ yet konhobꞌ Gat, yebꞌ huneꞌ yet konhobꞌ Ecrón. 18 Haxa yechel noꞌ txꞌow lahan isbꞌisil hakaꞌ iskonhobꞌ ebꞌnaj howanh yahawil filisteo tuꞌ, haꞌ ton konhobꞌ hoyaniko iskꞌubꞌal yebꞌ ej yaldeahil. Haxa huneꞌ chꞌen niman chꞌen bꞌay alaxayo isKaxhahil istrato Komam Dios, aytoyo chꞌen yul hokan sat istxꞌotxꞌ naj Josué, yul ismajul Bet-semes tinanh.

19 Ay xin ebꞌnaj kam bꞌey konhobꞌ Bet-semes, yuto tꞌanhxayto ebꞌnaj yul isKaxhahil istrato Komam Jahawil, yok anma oqꞌo yinh ebꞌnaj, yuto ok kamik yu Komam, 70 (lahonhebꞌ iskanhwinaj) ebꞌnaj kami.^a 20 Yalni anma ay bꞌey Bet-semes hakaꞌ tiꞌ: «¿Maktaxka chu islinhbꞌan isbꞌa sata Komam Dios, Komam kaw machi nino istxꞌojal? ¿Bꞌaytuꞌwal chijato isKaxhahil istrato Komam tiꞌ, kat yelkano koxol?» xhi ebꞌnaj. 21 Yanito ebꞌnaj hunteqꞌan ischejabꞌ bꞌey konhobꞌ Quiriat-jearim, yalnito ebꞌnaj hakaꞌ tiꞌ: «Mayaqꞌ meltzoho ebꞌnaj filisteo isKaxhahil istrato Komam, yuxin hulanhwe heyiqꞌatoj,» xhi ebꞌnaj.