2 Kaw niman tiempo kankano isKaxhahil istrato Komam Jahawil bꞌey konhobꞌ Quiriat-jearim, 20 (hunkꞌal) habꞌil kankanoj. Wal sunil anma Israel chꞌah iskꞌul yu bꞌiskꞌulal issaynikꞌo Komam Jahawil. 3 Yuxin yal yaꞌ Samuel tet anma Israel hakaꞌ tiꞌ: «Tato yinh kaw sunil heyanma chexmeltzoko yul isqꞌabꞌ Komam Jahawil, iwelo hunteqꞌan komon tioxh texol yebꞌ yechel tioxh Astarot, kat heyok yijemal tet Komam, hanhe tet Komam xin bꞌay cheyiyo hebꞌa; ta hak tuꞌ, haꞌ Komam chexkolnilo yul isqꞌabꞌ ebꞌnaj filisteo,» xhi yaꞌ.

4 Hak tuꞌ xin yu yok ebꞌnaj Israel yinolo yechel tioxh Baal yebꞌ tioxh Astarot, hunteqꞌan chal ebꞌnaj isdiosaloj, hanhe xin tet Komam ok ebꞌnaj yiqꞌayo isbꞌa.^b 5 Lahwi tuꞌ, yalni yaꞌ Samuel tato chiskutxbꞌako isbꞌa anma Israel bꞌey konhobꞌ Mizpa, yu istxahli yaꞌ yinh anma Israel tet Komam Jahawil.

6 Hak tuꞌ yu iskutxbꞌan isbꞌa anma Israel bꞌey Mizpa, yinahti ebꞌnaj ha haꞌ isjobꞌnayo ebꞌnaj haꞌ sat txꞌotxꞌ sata Komam Jahawil, mach xin waꞌ ebꞌnaj yu istxahli huneꞌ tzꞌayik tuꞌ tet Komam, yalni ebꞌnaj: «Kaw xajako komulanh yul hasat, Mamin,» xhi ebꞌnaj. Haꞌ bꞌey Mizpa tuꞌ xin yil yaꞌ Samuel yinh tzet chiꞌeliko anma Israel yinh tzetaj chiswatxꞌe. 7 Hayet yabꞌenilo ebꞌnaj filisteo tato iskutxbꞌako isbꞌa anma Israel bꞌey konhobꞌ Mizpa, istit ebꞌnaj yahawil ebꞌnaj filisteo yinh ebꞌnaj, hayet yabꞌen ebꞌnaj Israel huneꞌ tuꞌ, isxiwkanh ebꞌnaj. 8 Yalni ebꞌnaj Israel tuꞌ tet yaꞌ Samuel: «Machojabꞌ chabꞌej hatxahli jinhanh tet Komam Jahawil, koDiosal yu konhiskolnilo yul isqꞌabꞌ ebꞌnaj filisteo,» xhi ebꞌnaj.

9 Yiniti yaꞌ Samuel huneꞌ noꞌ nichꞌan yunin meꞌ chitotxutxwi, yaniko yaꞌ noꞌ yinh xahanbꞌal tet Komam Jahawil, istxahli yaꞌ tet Komam tato chikolwa yinh anma Israel, yabꞌen Komam istxah yaꞌ Samuel tuꞌ. 10 Hayet lanhan isnhusni yaꞌ Samuel xahanbꞌal tuꞌ, yapni lemna ebꞌnaj filisteo yanoko howal yinh ebꞌnaj Israel, yajaꞌ maqꞌwa huneꞌ kꞌuh yinh sat ebꞌnaj yu Komam, isxiwkanh ebꞌnaj, yelkanh ebꞌnaj tet ebꞌnaj Israel. 11 Yel ebꞌnaj Israel bꞌey Mizpa, yok tzujno ebꞌnaj yinta ebꞌnaj filisteo, isqꞌoji ebꞌnaj yinh ebꞌnaj. Ispotxꞌnikamo ebꞌnaj Israel ebꞌnaj filisteo tuꞌ masanta apni ebꞌnaj yalanhayto konhobꞌ Bet-car. 12 Issayni yaꞌ Samuel huneꞌ chꞌen chꞌen, islinhbꞌankanh yaꞌ chꞌen yiktabꞌal konhobꞌ Mizpa yebꞌ konhobꞌ Sen, yaniko yaꞌ Eben-ezer isbꞌiho chꞌen, yalni yaꞌ hakaꞌ tiꞌ: «Haꞌ Komam Jahawil chikolwa jinh masanta tinanh,» xhi yaꞌ.^c

13 Hak tuꞌ yu isqꞌoji ebꞌnaj Israel yinh ebꞌnaj filisteo; matxa xin hul ebꞌnaj sat istxꞌotxꞌ ebꞌnaj Israel, yuto ayko ishowal Komam Jahawil yinh ebꞌnaj yulbꞌal istiempohal ayko yaꞌ Samuel yahawilo yinh ebꞌnaj Israel. 14 Haꞌ sunil istxꞌotxꞌ yebꞌ iskonhobꞌ ebꞌnaj Israel iqꞌbꞌililo yu ebꞌnaj filisteo, chiꞌichiti bꞌey konhobꞌ Ecrón, masanta bꞌey Gat, okpaxo yu ebꞌnaj Israel hunelxa. Hak tuꞌ yu yinilo ebꞌnaj Israel istxꞌotxꞌ tet ebꞌnaj filisteo. Yokkano aqꞌankꞌulal xol ebꞌnaj Israel yebꞌ ebꞌnaj amorreo.

15 Yulbꞌal istiempohal itzitz yaꞌ Samuel tuꞌ ok yaꞌ yilaꞌ yinh tzet chiꞌeliko ebꞌnaj Israel yinh tzet chiswatxꞌe. 16 Hunun habꞌil xin isbꞌeykꞌo yaꞌ Samuel bꞌey Bet-el yebꞌ Gilgal yebꞌ bꞌey Mizpa, yilni yaꞌ tzet chiꞌeliko ebꞌnaj Israel bꞌey hunun konhobꞌ tuꞌ. 17 Lahwi tuꞌ kat ismeltzo yaꞌ bꞌey konhobꞌ Ramá, yuto haꞌ tuꞌ ay yatut yaꞌ. Haꞌ bꞌey tuꞌ xin chiyil yaꞌ tzet chiꞌeliko anma Israel, iswatxꞌenkanh yaꞌ huneꞌ ismexhahil yet xahanbꞌal tet Komam Jahawil.