2. CHIꞌALAXIKO EBꞌNAJ REY YAHAWILO YINH EBꞌNAJ ISRAEL
(8:1–12:25)
Isqꞌan ebꞌnaj Israel isreyal
8
Haxa yet ichamxa yaꞌ Samuel, yaniko yaꞌ kawanh iskꞌahol yahawilo ebꞌnaj Israel. 2 Naj bꞌabꞌel kꞌahole, Joel isbꞌi, haxa naj iskabꞌ, Abías isbꞌi. Haꞌ xin bꞌey konhobꞌ Beerseba chil ebꞌnaj yinh tzet chꞌeliko anma. 3 Yajaꞌ mach lahano isbꞌeybꞌal ebꞌnaj hakaꞌ ismam, wal xin yako yanma ebꞌnaj yinh chꞌen melyu, ischahni ebꞌnaj chꞌen tohlabꞌal yinh isnabꞌnhehal, matxataj istoholal chiswatxꞌe ebꞌnaj yet chiyilni ebꞌnaj yinh tzet chiꞌeliko anma. 4 Yuxin iskutxbꞌako isbꞌa ebꞌnaj ichamta winaj Israel, isto ebꞌnaj yilno yaꞌ Samuel bꞌey Ramá, 5 yalni ebꞌnaj tet yaꞌ: «Hach tiꞌ kaw icham hachxa, wal ebꞌnaj hakꞌahol mach chiswatxꞌe ebꞌnaj hakaꞌ habꞌeybꞌal. Yuxin tinanh makonhhulanh koqꞌanaꞌanh tawet tato chasayiko hunu mak chiꞌok koreyalojanh, kat yilni yinh tzet chiꞌah koxolanh, hakaꞌ yeko isreyal hunteqꞌanxa nan konhobꞌal,» xhi ebꞌnaj.6 Yajaꞌ mach ischah iswiꞌ yaꞌ Samuel tzet yal ebꞌnaj tato choche ebꞌnaj hunu isrey chiꞌok yahawilo yinh ebꞌnaj, yuxin txahli yaꞌ Samuel tet Komam. 7 Yalni Komam tet yaꞌ: «Yije tzet chisqꞌan ebꞌnaj, yuto maxhtaj hach chaxhisyah ebꞌnaj, wal xin haninan chinisyahan ebꞌnaj, yuto matxa choche ebꞌnaj tato chinokan yahawilo ebꞌnaj. 8 Hatax yet winiltijan ebꞌnaj bꞌey Egipto kinisbꞌejnikanojan ebꞌnaj, yinayo isbꞌa ebꞌnaj tet hunteqꞌan komon tioxh; hakaꞌ kinyutehan ebꞌnaj tuꞌ, hak tuꞌ chachyute ebꞌnaj tinanh. 9 Yuxin yije tzet chal ebꞌnaj, yajaꞌ xin yalanhto chawaqꞌni yohtanhelo ebꞌnaj tzet chiꞌutelax ebꞌnaj yu isrey tuꞌ,» xhi Komam.
10 Yok yaꞌ Samuel yalno tet ebꞌnaj Israel, ebꞌnaj isqꞌan isreyal tuꞌ, yinh sunil tzet yal Komam Jahawil. 11 Yuxin yal yaꞌ Samuel tet ebꞌnaj Israel:
—Hak tiꞌ chexyute naj rey chiꞌok heyahawilo hakaꞌ tiꞌ: Chilo naj hekꞌahol, kat yaniko naj ebꞌnaj yinh chꞌen carruaje yet howal, yebꞌ xin ay ebꞌnaj chiꞌahto yibꞌanh noꞌ cheh, kat isto yinh howal, aypaxo ebꞌnaj xin chiꞌok tanheno naj rey tuꞌ. 12 Ay ebꞌnaj xin chiꞌok yahawilo yinh mil ebꞌnaj soldado, aypaxo ebꞌnaj xin chiꞌok yahawilo yibꞌanh cincuenta ebꞌnaj. Aypaxo ebꞌnaj xin chiꞌok tꞌoko txꞌotxꞌ yinh ismunil naj rey, aypaxo ebꞌnaj xin chiꞌok iskꞌupukanh sat istzꞌunubꞌ naj. Aypaxo ebꞌnaj chiꞌok iswatxꞌeꞌ chꞌen yet howal, aypaxo ebꞌnaj xin chiwatxꞌen chꞌen chꞌen chiꞌok yinh iscarruaje ebꞌnaj yet howal. 13 Kat yinipaxilo naj hekutzꞌin, kat yok ebꞌix iswatxꞌeno anh kaw xuqꞌ sam, ay ebꞌix chiꞌokpaxo watxꞌeꞌ tzet chilolaxi yebꞌ watxꞌe pan. 14 Chiyilo naj hetxꞌotxꞌ kaw kꞌul, yebꞌ teꞌ uva yebꞌ teꞌ olivo tzꞌunbꞌil heyu, kat yaqꞌni naj teꞌ tet ebꞌnaj chimunla yintaj. 15 Chisqꞌanni naj isdiezmohal hetrigo yebꞌ heyuva, kat yaqꞌni naj tet ebꞌnaj yahawil soldado, yebꞌ tet ischejabꞌ. 16 Kat yinipaxilo naj ebꞌnaj hechejabꞌ yebꞌ ebꞌix hechejabꞌ yebꞌ ebꞌnaj hetzehtaj, kat yaniko naj yinh ismunil, kat yinipaxilo naj heburro. 17 Chisqꞌannipaxo naj isdiezmohal hemeꞌ, kat heyok ischejabꞌo naj. 18 Haꞌ yinh hunteqꞌan tzꞌayik tuꞌ, chiꞌah heyaw yu isyaꞌtajil chiyaqꞌ naj rey teyet, naj hesikꞌilo tuꞌ, yajaꞌ machi yabꞌe Komam tzet cheyala, xhi yaꞌ Samuel.
19 Yajaꞌ wal anma Israel, mach yabꞌeto tzet yal yaꞌ Samuel, yalni hakaꞌ tiꞌ:
—Machi yelapno hunteqꞌan chawal tiꞌ, wal xin chijochehanh hunu koreyalanh, 20 hakaꞌ hunteqꞌanxa konhobꞌ. Haꞌ naj chiꞌok jahawilojanh, kat konhyijbꞌananh naj yinh howal, xhi ebꞌnaj.
21 Hayet yabꞌen yaꞌ Samuel tuꞌ, yalnipaxo yaꞌ tet Komam Jahawil yinh sunil tzet yal ebꞌnaj. 22 Istaqꞌwi Komam tet yaꞌ:
—Yije tzet chiyal ebꞌnaj, kat hasayniko hunu isreyal ebꞌnaj, xhi Komam.
Yuxin yal yaꞌ Samuel tet ebꞌnaj Israel tuꞌ:
—Asiꞌwej paxanhweto yul konhobꞌ bꞌay ay hex, xhi yaꞌ.