Alaxiko naj Saúl reyal
9
Ay huneꞌ naj Israel titna yinh yaꞌ Benjamín chiyij Cis, kaw xin niman yelapno naj yul sat anma. Naj Cis tuꞌ iskꞌahol naj Abiel ye naj, naj Abiel iskꞌahol naj Zeror ye naj, naj Zeror iskꞌahol naj Becorat ye naj, naj Becorat iskꞌahol naj Afía ye naj, haxa naj Afía tuꞌ, iskꞌahol huneꞌ naj Benjaminita ye naj. 2 Naj Cis tuꞌ, ay huneꞌ iskꞌahol naj tzeh kaw kawla winaj, chiyij Saúl. Xol ebꞌnaj Israel, machi hunuxa mak kawla winaj hakaꞌ naj Saúl tuꞌ, yebꞌ xin kaw nimajal istel naj, hanhe xin yinh iswixikꞌ naj chiꞌahapno istel ebꞌnaj Israel.3 Ay huneꞌ tzꞌayik tiꞌ xin, kꞌayto isburro naj Cis, yuxin yal naj tet naj Saúl, naj iskꞌahol tuꞌ:
«Watxꞌe habꞌa yuto chaxhto hasayaꞌ noꞌ burro; ito hunu ebꞌnaj chejabꞌ tawintaj,» xhi ismam naj tuꞌ.
4 Isto naj Saúl, isqꞌaxponikꞌto naj bꞌey txꞌotxꞌ chewal txꞌotxꞌ yet yaꞌ Efraín, yekꞌto naj yul ismajul txꞌotxꞌ Salisa, yajaꞌ xin mach ilcha noꞌ yu naj. Yapni naj bꞌey txꞌotxꞌ Saalim, mach ilchapaxo noꞌ yu naj; lahwi tuꞌ yapni bꞌey istxꞌotxꞌ ebꞌnaj benjaminita, machipaxo noꞌ bꞌey tuꞌ. 5 Haxa yet yapni naj bꞌey txꞌotxꞌ Zuf, yalni naj Saúl tet ischejabꞌ tzujan yintaj:
—Meltzojonhto bꞌey tiꞌ, yuto ekꞌbꞌal ayonhxamiko yinh iskꞌul inmaman sata noꞌ burro tuꞌ, xhi naj.
6 Istaqꞌwi naj chejabꞌ tet naj:
—Yul huneꞌ konhobꞌ tiꞌ ay huneꞌ ischejabꞌ Komam Dios kaw ay yelapno yul sat anma, yuto sunil tzet chiyal yaꞌ chiyij isbꞌa. Tonh jilaꞌ yaꞌ, haꞌ yaꞌ chihalno jet tzet bꞌehal chikochatoj, xhi naj.
7 Istaqꞌwi naj Saúl tet naj:
—Kꞌultikꞌa, tonh jilaꞌ yaꞌ, yajaꞌ ¿tzet wal jaqꞌni tet yaꞌ, yuto matxa hunu ixim pan ayayto yul kotzꞌispa tiꞌ? Machi hunu tzet tzꞌaj jaqꞌaꞌ tet ischejabꞌ Komam Dios tuꞌ, xhi naj Saúl.
8 Istaqꞌwi naj chejabꞌ tet naj:
—Ay oxebꞌ chꞌen nixhte plata iqꞌbꞌil wuhan, lah, haꞌ chijaqꞌ tet yaꞌ, kat yalnolo yaꞌ tzet bꞌehal chikochatoj, xhi naj chejabꞌ tuꞌ.
9 (Yet payat, yet chito ebꞌnaj Israel isqꞌambꞌe isbꞌa tet Komam Dios, chalni ebꞌnaj: «Kata, tonh bꞌey yaꞌ chiyu yilni,» xhi. Haꞌ huneꞌ mak tuꞌ, haꞌ ton yaꞌ chihal-lax ischejabꞌ Komam.)
10 Istaqꞌwi naj Saúl tet naj chejabꞌ tuꞌ:
—Kꞌultikꞌa, tonh jilaꞌ yaꞌ, xhi naj.
Isto ebꞌnaj yul konhobꞌ bꞌay ay ischejabꞌ Komam Dios tuꞌ.
11 Hayet lanhan yahto ebꞌnaj yinh iswitzal konhobꞌ tuꞌ, ischahni isbꞌa ebꞌnaj yebꞌ hunteqꞌan ebꞌix qꞌopo, lanhan isto iqꞌo haꞌ. Isqꞌambꞌen ebꞌnaj tet ebꞌix:
—¿Aymikꞌo ischejabꞌ Komam Dios yul konhobꞌ tiꞌ? xhi ebꞌnaj.
12 Istaqꞌwi ebꞌix:
—Hoꞌ ayko yaꞌ, ay yaꞌ hesatakꞌto tiꞌ, yajaꞌ chelahiko hetohi, haxinwal cheyil yaꞌ, yuto mahul yaꞌ yul konhobꞌ tiꞌ yu yilni yaꞌ yaqꞌni konhobꞌ isxahanbꞌal yinh istzalanil. 13 Chinhe kexapni yul konhobꞌ tuꞌ, kat hesaynilo yaꞌ yalanhto maxhto chiꞌahto yaꞌ bꞌey tzalan waꞌoj bꞌay lanhan yechmalax yaꞌ yu anma. Hato xin yet chiꞌapni yaꞌ, kat isqꞌanni yaꞌ iskꞌulal Komam Dios yibꞌanh xahanbꞌal tuꞌ, katto iswaꞌ anma; yuxin chelahiko hetohi, kꞌuxanto cheyilaꞌ yaꞌ, xhi ebꞌix.
14 Isto ebꞌnaj, yahapno ebꞌnaj yul konhobꞌ tuꞌ. Hayet yekꞌto ebꞌnaj yul konhobꞌ ischalen isbꞌa ebꞌnaj yebꞌ yaꞌ Samuel yet lanhan isto yaꞌ bꞌey tzalan bꞌay chiꞌaqꞌlax xahanbꞌal.
15 Yajaꞌ huneꞌ tzꞌayik yalanhto maxhto chiꞌapni naj Saúl saywal yinh yaꞌ Samuel, yalni Komam Jahawil tet yaꞌ Samuel hakaꞌ tiꞌ: 16 «Yet hekal hakaꞌ huneꞌ hora tiꞌ, chinchejtijan huneꞌ naj benjaminita takꞌatanh; hayet chihul naj chawayo aceite yibꞌanh iswiꞌ naj yuto haꞌ naj chiꞌok yahawilo yinh inkonhobꞌ Israelan, kat iskolnilo naj yul isqꞌabꞌ ebꞌnaj filisteo, yuto chiwilan isyaꞌtajil chaqꞌle inkonhobꞌan; xaꞌahpax apno yel yaw ebꞌnaj inkꞌatanhan,» xhi Komam tet yaꞌ.
17 Hayet yilnito yaꞌ Samuel naj Saúl tuꞌ, yalni Komam tet yaꞌ: «Haꞌ naj tiꞌ walan tawet. Haꞌ naj chiꞌok yahawilo yilni inkonhobꞌan,» xhi Komam.
18 Ishitziko naj Saúl iskꞌatanh yaꞌ Samuel xolbꞌal ispultahil konhobꞌ tuꞌ, isqꞌambꞌen naj tet yaꞌ Samuel:
—Mamin, halnino wetan bꞌaytuꞌwal ay yatut yaꞌ ischejabꞌ Komam Dios, xhi naj.
19 Istaqꞌwi yaꞌ Samuel tuꞌ:
—Hanintonan huneꞌ chawal tiꞌ. Tonh, bꞌabꞌanh, kat kowaꞌo bꞌey tuꞌ, haxa yet hekal chiwalan tawet tzet chawoche haqꞌambꞌeꞌ, lahwi tuꞌ kat hapaxtoj. 20 Wal noꞌ burro oxebꞌxa tzꞌayik iskꞌayto tinanh, matxa chawako yinh hakꞌul yinh noꞌ, yuto xaꞌilcha noꞌ. Wal tinanh, sunil tzet ochebꞌil yu ebꞌnaj Israel, hawet yehi yebꞌ hunteqꞌanxa yuninal hamam, xhi yaꞌ Samuel.
21 Istaqꞌwi naj Saúl:
—Hanintiꞌan yikꞌal yaꞌ Benjamín wehan, haꞌ huneꞌ majan hanhonh Israel honhtiꞌanh kaw hanikꞌnhe kobꞌisilanh xol jet Israelal. Hakpax tuꞌ wichmaman bꞌay pohchanaj intijan kaw matzet chal yelapno xol ebꞌnaj titna yinh yaꞌ Benjamín. ¿Tzet yinh xin chawal sunil hunteqꞌan tiꞌ wetan? xhi naj Saúl.
22 Lahwi tuꞌ yinito yaꞌ Samuel naj Saúl yebꞌ naj chejabꞌ tuꞌ bꞌey salón, yaqꞌni yaꞌ istzꞌonhobꞌal naj kaw ay yelapno xol ebꞌnaj kutxaniko bꞌey tuꞌ. Aymi hunu 30 (lahonhebꞌ iskawinaj) ebꞌnaj kutxikoj. 23 Yalni yaꞌ Samuel tet naj watxꞌem itah:
—Iti noꞌ chibꞌe waqꞌan tawet, noꞌ walan tato nan chawaqꞌa, xhi yaꞌ.
24 Kaw yinh anhe xin yiti naj huneꞌ noꞌ isbꞌul yebꞌ tzet ayayo yibꞌanh, yanayo naj yinh sat naj Saúl, yalni yaꞌ Samuel:
—Haꞌ tiꞌ tzet chaloh pohbꞌilxalo wuhan. Waꞌanh, nanxatikꞌa ye wuhan yu haloni yinh huneꞌ qꞌinh tiꞌ, xhi yaꞌ Samuel.
Iswaꞌ naj Saúl yinta yaꞌ Samuel yet huneꞌ tzꞌayik tuꞌ. 25 Haxa yet yayti naj Saúl yinta yaꞌ Samuel yinh tzalan, yapni yul konhobꞌ, istzotel yaꞌ Samuel yebꞌ naj Saúl yibꞌanh yakꞌalil teꞌ nha. 26 Haxa yet hunxa tzꞌayik yinh kaw sahabꞌ sakꞌayal, yet lanhan issajlehiloj, yawtelax naj Saúl yu yaꞌ Samuel yibꞌanh yakꞌalil teꞌ nha, yalni yaꞌ tet naj Saúl:
—Ahanhwanoj kat hatohi, xhi yaꞌ.
Yahwano naj Saúl, yelti naj yul nha yebꞌ yaꞌ Samuel. 27 Haxa yet yapni bꞌey istxam konhobꞌ, yalni yaꞌ Samuel tet naj Saúl:
—Hal tet naj hachejabꞌ tiꞌ bꞌabꞌojabꞌ to naj, wal hach xin kananhkano hunepoxa, yuto ay tzet chiwalan tawet yinh tzet yal Komam Dios wetan tawinh, xhi yaꞌ. Wal naj chejabꞌ tuꞌ bꞌabꞌito naj.