—Haꞌ Komam Jahawil chachsikꞌnilo hawok isreyalo konhobꞌ Israel tinanh. 2 Hayet chikopohlenkano kobꞌa tiꞌ chachahleꞌ habꞌa yebꞌ kawanh ebꞌnaj bꞌay mujan ix Raquel bꞌey txꞌotxꞌ Selsa, yul ismajul istxꞌotxꞌ jichmam Benjamín, chiyalno ebꞌnaj tawet: “Xaꞌilcha noꞌ burro kextit hesayaꞌ, yuxin matxa tzet chal iskꞌul hamam yinh noꞌ tinanh; wal xin hachxa ayachiko yinh iskꞌul hamam tinanh yinh tzet chu hawilchahi,” xhi ebꞌnaj. 3 Hanikꞌixto chaxhto yinh habꞌel tuꞌ xin yet chaxhapni bꞌey teꞌ hih yet wonhan Tabor chachahno oxwanh ebꞌnaj winaj chito yinh iswiꞌ wonhan Bet-el, yu yaqꞌni isxahanbꞌal tet Komam Dios. Huneꞌ naj iqꞌnhe oxkꞌonh noꞌ nixhte chiw, hunxa naj iqꞌnhe oxebꞌ ixim nime pan, haxa naj yox iqꞌnhe huneꞌ xhalu vino. 4 Hayet chachyilni ebꞌnaj tuꞌ, kat istioxhli ebꞌnaj tawet, kat yaqꞌni ebꞌnaj kabꞌebꞌ ixim pan tawet, kat hachahnilo ixim tet ebꞌnaj. 5 Lahwi tuꞌ xin chachapno bꞌey konhobꞌ Gabaa, bꞌay chiyiyo isbꞌa anma tet Komam Dios, bꞌay ay iscampamento ebꞌnaj filisteo. Hayet chachokto yul konhobꞌ tuꞌ, chawilno hunbꞌulan ebꞌnaj ischejabꞌ Komam Dios, lanhan ispaxayti iswiꞌ wonhan. Bꞌabꞌel xin ebꞌnaj chiꞌaniko teꞌ salterio, pandereta, teꞌ suꞌ yebꞌ teꞌ arpa sata ebꞌnaj chalni tzotiꞌ chitit tet Komam. 6 Yinhnhena tuꞌ kat yul Yespíritu Komam Dios tawinh yinh sunil yip, kat hawalni tzotiꞌ chitit tet Komam Dios yinta ebꞌnaj, nanxa xin anmahil chachelikoj.^a 7 Hayet chul Yespíritu Komam tawinh tuꞌ, haꞌ tzet kꞌul chawabꞌe, haꞌ chawatxꞌe, yuto ayko Komam Dios hawetbꞌihoj. 8 Lahwi tuꞌ kat habꞌabꞌito bꞌey konhobꞌ Gilgal, haꞌ tuꞌ xin chikochah kobꞌa kat waqꞌnihan xahanbꞌal yebꞌ yebꞌalqꞌabꞌe yet aqꞌankꞌulal tet Komam Dios. Hujebꞌ tzꞌayik xin chinhawechmahan bꞌey tuꞌ, haxa yet chinapnihan takꞌatanh chiwalnihan tawet tzet wal hawatxꞌeni, xhi yaꞌ Samuel.

9 Hayet lahwi istaqꞌlikano naj Saúl tet yaꞌ Samuel yet isto naj yinh isbꞌel, ishelni Komam yanma naj Saúl. Yijni isbꞌa sunil tzet yal yaꞌ Samuel tet naj yinh huneꞌ tzꞌayik tuꞌ. 10 Haxa yet yapni naj Saúl yebꞌ ischejabꞌ bꞌey konhobꞌ Gabaa, yelti ebꞌnaj ischejabꞌ Komam chawal yinh naj. Yay Yespíritu Komam yibꞌanh naj Saúl yinh sunil yip, yok naj yalno tzotiꞌ chitit tet Komam yinta ebꞌnaj ischejabꞌ Komam tuꞌ. 11 Haꞌ mak ohtanhe naj Saúl tuꞌ, hayet yalni naj tzotiꞌ chitit tet Komam, yichiko yalni anma tet hunun hakaꞌ tiꞌ: «¿Tzet chiyaqꞌle iskꞌahol naj Cis? ¿Tom haꞌ hun naj Saúl tiꞌ yinta ischejabꞌ Komam Dios?» xhi anma tet hunun.

12 Ay xin huneꞌ naj ay bꞌey tuꞌ, qꞌambꞌen hakaꞌ tiꞌ:

«¿Mak xin ismam ebꞌnaj ischejabꞌ Komam Dios tiꞌ?» xhi naj. Yu huneꞌ tuꞌ yuxin chiyal anma hunteqꞌan tzotiꞌ hakaꞌ tiꞌ: «¿Tom haꞌ hunpaxo naj Saúl yinta ebꞌnaj ischejabꞌ Komam Dios?» xhi.

13 Lahwi yalni naj Saúl tzotiꞌ chitit tet Komam, yahapno naj iswiꞌ wonhan. 14 Isqꞌambꞌen huneꞌ yuxhta ismam naj Saúl tuꞌ tet, yebꞌ tet ischejabꞌ hakaꞌ tiꞌ:

—¿Bꞌay makexbꞌeyi? xhi naj. Istaqꞌwi naj Saúl:

—Konhbꞌeyanh kosayaꞌanh noꞌ burro kꞌaynatoj, yajaꞌ mach ilcha noꞌ juhanh, yuxin konhtohanh koqꞌambꞌehanh tet yaꞌ Samuel, xhi naj.

15 Isqꞌambꞌen naj yuxhta ismam naj Saúl tuꞌ hunelxa:

—¿Tzet xin yal yaꞌ Samuel tuꞌ teyet? Halwelo wetan, xhi naj.

16 Istaqꞌwi naj Saúl tet naj:

—Mayalilo yaꞌ jetanh tato xaꞌilcha noꞌ burro tuꞌ, xhi naj. Yaj xin mach yalilo naj Saúl tato haꞌ naj chiꞌok isreyalo konhobꞌ Israel, hakaꞌ yalni yaꞌ Samuel tet naj.

17 Lahwi tuꞌ iskutxbꞌaniko yaꞌ Samuel konhobꞌ Israel sata Komam Dios bꞌey konhobꞌ Mizpa, 18 yalni yaꞌ tet konhobꞌ Israel hakaꞌ tiꞌ:

«Haꞌ Komam Dios koDiosal hanhonh Israelonh tiꞌ, chihalni hakaꞌ tiꞌ: “Haninan kexwiltijan hex Israel hex tiꞌ bꞌey Egipto, kexinkolnilojan yalanh yip Egipto tuꞌ. Kexinkolnipaxojan yalanh yip ebꞌnaj rey kexaqꞌni ekꞌoyaꞌ,” xhi Komam. 19 Haxapaxo tinanh cheyintanhenkanilto koDiosal konhkolnilo yul isqꞌabꞌ isyaꞌtajil yinh bꞌiskꞌulal. Heyintanhekanilto Komam, heqꞌanni hunu herey chiꞌok heyahawoj; yuxin tinanh kutxbꞌaweko hebꞌa sata Komam Dios yinh hunun majan hex Israelex tiꞌ, yebꞌ hunun ebꞌnaj mame yebꞌ yuninal,» xhi yaꞌ Samuel.

20 Lahwi tuꞌ ischejni yaꞌ Samuel ta chihitziko hunun majan ebꞌnaj Israel; kꞌuxan xin yaykꞌay suerte yibꞌanh ebꞌnaj Benjamín. 21 Yalnipaxo yaꞌ tato chihitziko ebꞌnaj Benjamín tuꞌ, hak tuꞌ xin yibꞌanh naj Matri yebꞌ yuninal aykꞌay suerte. Yalnipaxo yaꞌ Samuel ta chihitziko naj Matri yebꞌ yuninal, hak tuꞌ xin yibꞌanh naj Saúl aykꞌay suerte, iskꞌahol naj Cis, issaylax naj Saúl bꞌey tuꞌ, yajaꞌ mach ayoko naj xol ebꞌnaj. 22 Yuxin isqꞌambꞌe ebꞌnaj tet Komam Dios Jahawil tato apni naj Saúl bꞌey tuꞌ, yalni Komam tet ebꞌnaj tato apni naj, yajaꞌ ebꞌabꞌil isbꞌa naj xol isqꞌuybꞌe anma Israel tuꞌ. 23 Yok ebꞌnaj yinh anhe issayno naj Saúl tuꞌ, yiniti ebꞌnaj naj, yalaxiko naj xolbꞌal konhobꞌ; haꞌ xin naj Saúl tuꞌ nimejal istel naj xol sunil konhobꞌ Israel tuꞌ. 24 Yalni yaꞌ Samuel tet konhobꞌ Israel:

—Ilwe yaꞌ rey sikꞌbꞌiliko yu Komam Jahawil lah, machi hunuxa mak hakaꞌ yaꞌ tiꞌ, xhi yaꞌ Samuel. Hayet yilni anma yaꞌ Saúl tuꞌ, yah yaw yinh kaw ip yu tzalahilal, yalni hakaꞌ tiꞌ:

—¡Tzalajonhwej yinh koreyal tiꞌ! xhixanhe anma.

25 Lahwi tuꞌ xin, yalni yaꞌ Samuel isleyalil yaꞌ rey tet konhobꞌ Israel, istzꞌibꞌnhenkano yaꞌ yul huneꞌ hum, yanikto yaꞌ yul Yatut Komam Jahawil. 26 Lahwi tuꞌ yalni yaꞌ Samuel tato chimeltzo anma Israel tuꞌ yatut. Hakpax tuꞌ yaꞌ Saúl, meltzo yaꞌ yatut bꞌey konhobꞌ Gabaa, yaniko Komam Dios yinh isnabꞌal haywanh ebꞌnaj winaj kaw helan yinh howal isto yinta yaꞌ Saúl. 27 Yajaꞌ ay hunteqꞌan ebꞌnaj txꞌoj isnabꞌal halni yinh yaꞌ Saúl hakaꞌ tiꞌ: «¿Tom haꞌ naj tiꞌ chonhkolnoj?» xhi ebꞌnaj. Kaw machi xin yelapno yaꞌ Saúl tuꞌ yul sat ebꞌnaj, machi xin sabꞌehal yaqꞌ ebꞌnaj tet yaꞌ. Wal yaꞌ Saúl hakaꞌtanhe mach yabꞌe yaꞌ tzet hal-lax yinh yaꞌ tuꞌ.