—Aqꞌ hunu hatrato jetanh, kat jokkanojanh hachejabꞌoj, xhi ebꞌnaj. 2 Istaqꞌwi naj Nahas, isreyal ebꞌnaj amonita tet ebꞌnaj:

—Chintaqꞌwehan tzet cheyoche, yaj chiwiltijan isbꞌaqꞌ hesat yinh hewatxꞌqꞌabꞌ hesunil, yunhe yel ispixan heyet Israelal, xhi naj.^a

3 Istaqꞌwi ebꞌnaj ichamta winaj ay bꞌey Jabes tuꞌ hakaꞌ tiꞌ:

—Ta hak tuꞌ chonhhawechmahanh hujebꞌo tzꞌayik, chijatojanh kochejabꞌanh yalaꞌ tet sunil konhobꞌ Israel; yajaꞌ tato machi mak chikolwa jinhanh, wal tuꞌ chijako kobꞌahanh yul heqꞌabꞌ, xhi ebꞌnaj.

4 Hayet yapni ebꞌnaj chejabꞌ bꞌey Gabaa, iskonhobꞌ yaꞌ Saúl, yalni ebꞌnaj huneꞌ tiꞌ tet konhobꞌ, hayet yabꞌen anma huneꞌ tuꞌ yah yaw anma, yok oqꞌoj. 5 Wal yaꞌ Saúl lanhan yokto yaꞌ yul konhobꞌ, ispeto yaꞌ munil tzujaniko yaꞌ yinta noꞌ wakax, isqꞌambꞌen yaꞌ:

—¿Tzet yinh yuxin chiꞌoqꞌ anma? xhi yaꞌ.

Yal-lax tet yaꞌ tzet yal ebꞌnaj ah Jabes tuꞌ. 6 Hayet yabꞌen yaꞌ Saúl huneꞌ tuꞌ, yul Yespíritu Komam Dios yinh yaꞌ yu yaqꞌni yip yaꞌ; istit lemna ishowal yaꞌ, 7 yiniti yaꞌ kakꞌonh noꞌ wakax, ispotxꞌnikamo yaꞌ noꞌ, istzokꞌnayo yaꞌ isnimanil noꞌ, yinito ebꞌnaj chejabꞌ noꞌ chibꞌe tuꞌ yelaxo yul sunil ismajul Israel, yalni ebꞌnaj hakaꞌ tiꞌ: «Hak tiꞌ chiꞌutelax iswakax ebꞌnaj Israel mach chiꞌoktzujno yinta yaꞌ Saúl yebꞌ yinta yaꞌ Samuel, yet chito yinh howal,» xhi ebꞌnaj.

Yok huneꞌ niman xiwkilal yinh anma Israel yu Komam Jahawil, hunxanhe nabꞌalehal yuteyo isbꞌa ebꞌnaj, yok tzujno ebꞌnaj yinta yaꞌ Saúl. 8 Hayet isbꞌisni yaꞌ Saúl ebꞌnaj winaj iskutxbꞌako isbꞌa bꞌey konhobꞌ Bezec, 300 mil isbꞌisil ebꞌnaj tit yul ismajul ebꞌnaj Israel, yok 30 (lahonhebꞌ iskawinaj) mil isbꞌisil ebꞌnaj tit yul ismajul Judá. 9 Yalni yaꞌ Saúl tet ebꞌnaj chejabꞌ tit bꞌey konhobꞌ Jabes:

—Hak tiꞌ cheyute heyalni tet ebꞌnaj Jabes, “Hayet hekal yalanh chuman xakexkolchalo yul isqꞌabꞌ ebꞌnaj amonita,” kexchi, xhi yaꞌ.

Ismeltzo ebꞌnaj chejabꞌ tuꞌ bꞌey Jabes, yalni ebꞌnaj tzet yal yaꞌ Saúl tet ebꞌnaj. Hayet yabꞌen ebꞌnaj huneꞌ tuꞌ kaw tzalakanh ebꞌnaj. 10 Yalni ebꞌnaj Jabes tet naj Nahas, isreyal ebꞌnaj amonita hakaꞌ tiꞌ:

—Hayet hekal chijako kobꞌahanh yul haqꞌabꞌ, kat hawatxꞌe hakaꞌ tzet choche hakꞌul jinhanh, xhi ebꞌnaj.

11 Haxa yet hunxa tzꞌayik, ispohni yaꞌ Saúl ebꞌnaj issoldado, oxebꞌ majan yuteyo yaꞌ ebꞌnaj, yokto lemna ebꞌnaj yul iscampamento ebꞌnaj amonita yet maxhto chisajbꞌiloj, yichiko ebꞌnaj ispotxꞌnikamo ebꞌnaj masanta yet chumanil, haxa ebꞌnaj mach kami pujnato ebꞌnaj, yajaꞌ machi bꞌay katawanh yukano ebꞌnaj. 12 Yalni ebꞌnaj Israel tet yaꞌ Samuel:

—¿Mak anmahil ebꞌnaj halni tato mach istzano yaꞌ Saúl yok koreyaloj? Iti ebꞌnaj bꞌey tiꞌ, kat kopotxꞌnikamojanh ebꞌnaj, xhi ebꞌnaj.

13 Yalni yaꞌ Saúl:

—Haꞌ tinanh mach chu iskam hunu jet konhobꞌ Israel, yuto yinh huneꞌ tzꞌayik tiꞌ makonhiskolilo Komam Jahawil, xhi yaꞌ.

14 Yalni yaꞌ Samuel tet konhobꞌ Israel:

—Tonhwe bꞌey konhobꞌ Gilgal, haꞌ tuꞌ chischahkano yaꞌ Saúl ismunil yinh reyalil, xhi yaꞌ.

15 Isto sunil anma Israel bꞌey konhobꞌ Gilgal, haꞌ bꞌey tuꞌ xin alaxiko yaꞌ Saúl reyal yinh anma Israel sata Komam Jahawil, yaqꞌni ebꞌnaj Israel isxahanbꞌal yet aqꞌankꞌulal tet Komam. Istzala yaꞌ Saúl yebꞌ sunil anma Israel tuꞌ.