—Hex tiꞌ, heyohtaj tato wabꞌetojan sunil tzet heyala, wanikojan hereyal. 2 Wal tinanh haxa naj hereyal tiꞌ chexijbꞌani, wal hanintiꞌan icham inxahan, sajxa xil inwiꞌan, yajaꞌ wal ebꞌnaj inkꞌaholan ayko ebꞌnaj heyetbꞌihoj. Hanintiꞌan yettaxtikꞌa tzeh hinan wokan ijbꞌalo teyinh masanto tinanh. 3 Tinanh xin, ayinikojan tesataj, tato ay hunujex wilojan hunu hewakax maka heburro, maka ta ay hunu mak wetahan, maka waqꞌ ekꞌojan yaꞌ yanma hunu maka, maka ta ay chꞌen melyu inchahan tet hunu mak yu inwatxꞌenayojan hunu tzet ye tuꞌ. Ta hak tuꞌ halwe sata Komam Jahawil yebꞌ sata yaꞌ rey issikꞌiko Komam tiꞌ, tato ay bꞌay inwatxꞌehan hakaꞌ tuꞌ, chisje intohlanan tinanh, xhi yaꞌ Samuel.

4 Istaqꞌwi ebꞌnaj tet yaꞌ:

—Mamin, machi hunelo tiꞌ konhhawetahanh maka hawaqꞌ ekꞌoyaꞌ janmahanh, machi hunelo tiꞌ haqꞌan melyu jetanh yu hawatxꞌenayo hunu tzet ye tuꞌ, xhi ebꞌnaj.

5 Yalnipaxo yaꞌ Samuel:

—Haꞌ Komam Dios chaqꞌ isbꞌa yinh yebꞌpaxo yinh yaꞌ rey issikꞌiko Komam tiꞌ tato hanintiꞌan machi inmulan, xhi yaꞌ.

Istaqꞌwi ebꞌnaj Israel:

—Yeli, kaw hak tuꞌ yehi, xhi ebꞌnaj.

6 Yalnipaxo yaꞌ Samuel tet konhobꞌ Israel:

—Haꞌ Komam Jahawil sikꞌnilo yaꞌ Moisés yebꞌ yaꞌ Aarón yu yinilti ebꞌnaj jichmam bꞌey Egipto, haꞌ Komam chaqꞌ isbꞌa yinh. 7 Yuxin tinanh kaw hajbꞌawe hetxikin heyabꞌen tzet chiwalan teyet sata Komam Jahawil yinh sunil iskꞌulal iswatxꞌe Komam jinh yet konhiskolni yebꞌ yinh ej jichmam. 8 Hayet ay jichmam Jacob yebꞌ yuninal bꞌey Egipto kaw etalax ebꞌnaj yu ebꞌnaj ah Egipto tuꞌ, yah yaw ebꞌnaj jichmam tet Komam ta chikolwa yinh ebꞌnaj, ischejnito Komam yaꞌ Moisés yebꞌ yaꞌ Aarón yinilti ebꞌnaj jichmam sat txꞌotxꞌ Egipto tuꞌ, yiniti Komam ebꞌnaj bꞌay ayonh tiꞌ. 9 Yajaꞌ isnahulnheto ebꞌnaj Komam Jahawil isDiosal, yuxin alaxiko ebꞌnaj yu Komam yul isqꞌabꞌ naj Sísara, yahawil yeko yinh issoldado naj isreyal konhobꞌ Hazor, yanipaxiko Komam ebꞌnaj yul isqꞌabꞌ ebꞌnaj filisteo yebꞌ yul isqꞌabꞌ naj isreyal txꞌotxꞌ Moab; yaniko hunteqꞌan konhobꞌ tuꞌ howal yinh jet Israelal. 10 Yuxin ah yaw ebꞌnaj Israel tet Komam Jahawil, yalni ebꞌnaj: “Mamin, jako komulanh yul hasat, yuto kach kobꞌejkanojanh yu jinayo kobꞌahanh tet tioxh Baal yebꞌ tioxh Astarot. Wal tinanh Mamin, kólonhilojanh yul isqꞌabꞌ ebꞌnaj chiꞌaniko howal jinh tiꞌanh, kat koyijenanh tzet chawala,” xhi ebꞌnaj.

11 »Yuxin yati Komam yaꞌ Jerobaal, yaꞌ Barac, yaꞌ Jefté yebꞌ hanin Samuel intiꞌan, yunhe hekol-laxilo yul isqꞌabꞌ ebꞌnaj ayko ishowal teyinh hoynhehexayoj, hak tuꞌ xin chexehikꞌo yinh aqꞌankꞌulal. 12 Haxa yet heyilni istit naj Nahas, isreyal ebꞌnaj amonita howal teyinh, heqꞌanni huneꞌ hereyal wetan, yu yok heyahawil, waxanhka xin haꞌ Komam Jahawil, koDiosal, haꞌ heYahawil sikꞌniko naj hereyaloj. 13 Tinanh xin haꞌ tiꞌ ay hereyal, saybꞌilikoj, huneꞌ qꞌanbꞌil heyu. Heyohtaxa tato Komam Jahawil aqꞌni huneꞌ herey. 14 Haꞌ tinanh xin xiwanhwe tet Komam Jahawil, kat heyinayo hebꞌa tet kat heyabꞌen tzet chala, mach xin manhkꞌomo cheyute hebꞌa tet. Tato hex yebꞌ hereyal cheyije tzet chal Komam Jahawil, koDiosal, kaw saqꞌal chexelikoj. 15 Yajaꞌ ta mach cheyabꞌe tzet chiyal Komam Jahawil, chemanhkꞌon tzet chala, chiyahti Komam ishowal teyinh hakaꞌ yu yaniti ishowal yinh ebꞌnaj komam jichmam.

16 »Wal tinanh xin echmawej, yuto chisye Komam Jahawil hunteqꞌan kꞌaybꞌalkꞌule heyilaꞌ. 17 Haꞌ tinanh heyohtaj tato istiempohal iskꞌuplax ixim trigo, machi haꞌ nhabꞌ chaqꞌa, yajaꞌ chinqꞌanan tet Komam tato chati kꞌuh kat ismaqꞌwahi, kat yaniti huneꞌ niman nhabꞌ, yunhe hetxumniloj kat heyohtanheniloj tato heyako hemul sata Komam Jahawil yet heqꞌanni herey tet Komam, xhi yaꞌ Samuel.

18 Isqꞌanni yaꞌ Samuel kꞌuh yebꞌ haꞌ nhabꞌ tet Komam, yaniti Komam kꞌuh yebꞌ haꞌ nhabꞌ yinh huneꞌ tzꞌayik tuꞌ. Hayet yilni konhobꞌ Israel huneꞌ tuꞌ, isxiwkanh tet Komam Jahawil yebꞌ tet yaꞌ Samuel. 19 Yalni sunil anma tet yaꞌ Samuel:

—Mamin, qꞌan nimankꞌulal tet Komam Jahawil, koDiosal, haxinwal mach chonhkamanh hanhonh hachejabꞌ honhtiꞌanh, yuto kaw maꞌahkanh komulanh sata Komam yet koqꞌannihanh koreyalanh tet Komam, xhi anma.

20 Istaqꞌwi yaꞌ Samuel tet konhobꞌ Israel:

—Mach chexxiwi, yeli heyako hemul tet Komam Jahawil, yajaꞌ tinanh xin, mach chepohilo hebꞌa yinh Komam, wal xin yijewe tzet chiyal Komam yinh sunil heyanma. 21 Mach chexoktzujno yinta hunteqꞌan tzet chihal-lax diosal, yuto matzet chaqꞌ teyet, mach chu kexiskolni, yuxin matzet chaliloj. 22 Haꞌ Komam Jahawil, niman yelapno isbꞌi Komam, yuxin mach chonhishinkꞌulnhe, choche Komam chexok iskonhobꞌoj. 23 Wal hanintiꞌan, haꞌojabꞌ Komam chikolwa winhan yunhe mach chiwako inmulan, yunhe mach chinbꞌejkanojan intxahlihan teyinh, kat kexinkuynihan hebꞌeybꞌalnhen iskꞌulal yebꞌ istoholal. 24 Hanhehojabꞌ tet Komam bꞌay wal hexiwi, cheyijen yinh isyelal yinh tzet chala yinh sunil heyanma, yu sunil nimeta iskꞌulal xaꞌiswatxꞌe jinh. 25 Yajaꞌ ta chechilbꞌa heyok hewatxꞌen istxꞌojal, chextanhiloj, kat istanhpaxilo hereyal, xhi yaꞌ Samuel.^a